110
Anduane Homogola kini mbira ibunime dabenegola iba gana lenego ogo
1 Anduane Homogohanda i̱naga Anduane Homogo kinihondo ogodagua laya.
Í̠ waitigi karu í̠naga geme hengedai habelo i̱na mo heloliya
í̠ i̱naga gi tigahayagi ogoria birabe, laya.
2 Anduane Homogo ibugua í̠na handayaho habelo
Saiono howa dindi dewaore mo tago holebira.
Ibugua ogodagua lalu,
Í̠na í̠ waitigi karuni í̠ andaneha í̠na handayaho habe, leda.
3 Í̠na í̠ waitigi karu bo pole wai tagira porengi
í̠naga wali agali karume wai í̠ha anda ibalu
tini hameme wai ina haru bu ma lolebira.
Mbiraga dadimba ibiragome tanini damiragola
tani ibuha hongo gahenge anda ibagadagua dege
í̠naga igiri daliaheru tiha hongo holene gahenge anda ho howa
Ngode Datagaliwabenaga hari kago iraga halu í̠ keria ibulebira.
4 Anduane Homogohanda í̠hondo bulebero lowialu mbira ogodagua layagoni.
Loma binigo mo miaga mbirali Ngode Datagaliwabehondo loma binigo mo miaga Melegesedege heneyagobi dege
í̠ haho wiaabo holebere, lalu lowini.
Anduane Homogohanda bi ogoni heneneore henene ledago
ibugua bi ogoni lone mende ale lo aribia naholebira.
5 Anduane Homogo ibugua í̠naga gi tigahayagi mo hongo holenaga
ibuni í̠ heba hapara ho kagoni.
Ibu keba harangi ibugua kini tara tara karu balu bope hai holebira.
6 Ibugua wali agali dindi tara tarani bu karume
ko biyarunaga pani tini nelo dabo mulebira.
Ani bialu wai biagane wai hamani
agali dewaore homene bo payapaya bulebira.
Dindi bibahendenaga kini hama pedaruni bibahende
ibugua bope hai holebira.
7 Ani bialu kini ogoni ibu agali balu pialu
iba kaware hariga teneni poragoni dalipe howa hambu nolebira.
Ani bigi biyarume kini ibu hongohe halu
wai bigi biragola wayali haabo holebira.