80
Isaraele wali agalime Ngode Datagaliwabehondo bi lalu ti lone hongo howa holoma̱ya biamogo bibe lenego ogo
1 Isaraele wali agalinaga Haru Haga-o iname bi langeremaru hale habe.
Ina nogo sibi ale bu kamarunaga haru haga í̠ni kegonigo
iname dugu bialu laramaru hale habe.
Dahuliyali babaganehe kirali kago labo dindiha helowa
í̠ni de handape howa handayaho kegoni.
2 Ina Eberaimi hameiginibi Beniyamini hameiginibi Manase hameiginibi bu kamaruhondo í̠ni mo walia halu
í̠naga dara holene ogoni inahondo mo walia habe.
I̱naga hongo holene timbuniore ngegoni mo walia halu
ina bayale holoma̱ya biamogo bibe.
3 Ngode Datagaliwabe-o ina lone í̠ni keria haru dai bibe.
Ina bayuwa holoma̱ya í̠naga dara holene walia halu
ina biamogo bibe.
4 Anduane Homogo Ngode Datagaliwabe Hongo Haiheore-o
i̱naga wali agali kamarume í̠hondo bi laramago hale howa
í̠ dara nahe handa taraho kegoni dege
keba haho wiaaboore hole kebe.
5 Dara holene ngirigo tomo ale nalu de iba ngirigo iba ale nalu kamagoni.
6 Hameigini tara tara ina baba mandagi handa a̱i na̱i palearume anda ibalu
inanaga dindi wimago ti i̱ hole lowa garere bilo
í̠na mo garere bia harigoni.
Ani biyago handayagola inanaga waitigi bu hearume
inanaga dongone hondo wahalu mege bialu hondo oba hayagoni.
7 Ani biyago Ngode Datagaliwabe Hongo Haiheore-o
í̠naga dara holene walia halu ina lone haru dai bibe.
Í̠na ina dara halu lone pu ereba naholoma̱ya haru daibu helabe.
8 Pu mbira lini daga mini gerebi mbira Iyibi dindini hearia egene dogodo yalu ibuwa
maru dindi ogoriani hene hearu dugu ba tagitagi buwa
gerebi lini daga pu ogoni dugu ba tagi hariru henedagoria hongo aribia harigoni.
9 Gerebi lini daga pu ogoni ibu bayuwa anda helonaga hama ba a̱i̱ na̱i̱ buwa hangarigoni.
Hengegola pu o biagoni anda halu
pini dindiha unuraore dalipe halu bayaore anda hayagoni.
Pu biagonaga yuni maganeru yulume hayagola
dindi bibahende namulai hayagoni.
10 Ibunaga maganerume hari wiaru angua hai halu
ibunaga maganeme ira tamia timbuni gibi hearu angua hai hayagoni.
11 Gerebi lini daga pu ogoni ibunaga magane yulu yalu pialu
amu iba solowara mini Medidereniana bedagoria dogolo paga hayagoni.
Ani bialu hoyulo yalu pialu puni Iba Yuberedisi poragoria yulu paga hayagoni.
12 Bayaore ani anda hayagoyu
ai gerebi lini mabu ogoninaga pabe ho mabu biago aginaga podope haribe.
Pabe biagoni podope hariyagome
ai wali agali ti hariga o biagoniha pume halu
gerebi lini do wiaruni bame gi dege palia habehe ngagoni.
13 Nogo gabua bu karume geme hengedo ngagola
ema bialu piaga ale karume nama aribia halu kagoni.
14 Ani bidago Ngode Datagaliwabe Hongo Haiheore-o
ainde lone mini wiadai bialu ina darabi o bu kamagoni
lone daraho dai bibe.
Í̠na Dahuliya andagani kegoni howa ina kamago de handadali halu
ina biamogo bule ibabe.
Irane ina í̠naga pu gerebi lini daga ale í̠nime hangarigo kamagoni.
15 Pu mbira lini daga mini gerebi biago í̠ninaga hongome hangarigoni
ina o bu kamagonigo ina pele ngule ibabe.
Pu o biagoni áyu dege hongone hongo halu anda helo
mo anda harigonibi kamagoni.
16 Inanaga waitigi hearume gerebi lini daga pu biagoni dibupe howa ira bo delalu kagoni.
Tigua ani bialu kago
Ngode Datagaliwabe í̠na inanaga waitigi uruni handabe manga halu
bibahendeore bo mburilai habe.
17 Uruni ani bo mburi lalu ina í̠ninaga waneigini holoma̱ya dabene biago kamaruni
ina mo anda halu mo hongo harigoni kamago
ai áyu ina de hondo halu biamogoore bibe.
18 Í̠na ani biamogo biriyagua iname í̠ helo wahalu lone napoleore beremagoni.
Ani buleberemago í̠na ina hongohe helabe.
Í̠na ani heledegola iname í̠naga mini mo yaraga halu haabo holeberema.
19 Anduane Homogo Ngode Datagaliwabe Hongo Haiheore-o
í̠na í̠ni keria ina haru dai bibe.
Ina nahome yo pialu poloma̱ya
ina dara halu biamogo bibe.