3
In tsacamilchic a Dios
1 Qui lej t’aja’chic ti cuenta abal i Tata Dios tu lej c’athpich c’anithal cum tu uchal tu tsacamilchic, ani chubax ja’its pel i ey. Yab tu exlanchal i ey an inicchic axi yab im belal a Cristo jant’ini’ ti yab in exlanchal jaye in ey a Dios.
2 Lej ichich hual ebchalabchic, aba ani’ xo’ pelits i ey tu tsacamil a Dios, bel yabaye tu quithat tso’oblinchamal a Dios jahua’ ne’ets qui baju talbel. Expith i tso’obits abal ne’ets qui baju i ey ejtil in ey a Jesucristo tam ca chich jaja’ junil ani qui tsu’chi in lej hual.
3 Max i belal abal chubax antsana’ ne’ets qui baju ejtil in ey jaja’, ojni’ ne’ets qui luba’ qui baju tu t’ocat jant’ini’ ti t’ocat jaja’.
4 Patal jitats ca hualbin in q’uibchale quin tala’ putu c’al in uchbixtal a Dios, cum pel i hualabtalab max yab qui tala’ putu c’al in uchbixtal a Dios.
5 A tso’obits tata’chic abal chich a Jesucristo teje’ tsabal ca tsemets abal tucu paculanchi i hualab, ani yab hua’ats ni jun i hualabtalab c’al jaja’.
6 Max cu junini’ c’uajiy ts’at’bath c’al jaja’ yab ne’ets cu hualbin. Max cu xe’tsin hualbibil, jats cum yabaye i tsu’umal a Jesucristo ani yabaye i exlamal.
7 Ichich hual tsacamilchic, ca lej t’aja’ ti cuenta abal ni jita’ yab ti c’ambiy tin cuenta an hualabtalab. Max i t’ajal alhua’, jats cum alhua’ i ichich jant’ini’ in ichich a Cristo.
8 Max cu xe’tsin hualbibil, jats cum pel tu c’al an teneclab, cum c’al jaja’ jats ti ts’i’quinenec an hualabtalab ani jats expith bel in t’ajal. Chich in Tsacamil a Dios abal quin talabethanchi jahua’ in t’ajal an teneclab.
9 Max chubax pel tu tsacamil a Dios yab ne’ets cu xe’tsin hualbibil, cum tu pitha’its a Dios i ichich ejtil jaja’ in ichich ani pel tu tsacamil yabats i ejtohual cu xe’tsin hualbibil.
10 Antsana’ i tso’ob jita’ pel in tsacamil a Dios ani jita’ pel in tsacamil an teneclab. Max yab cu xe’tsin bolith ani jaye max yab qui c’anitha’ an ebchalabchic c’al a Cristo, yab pel tu tsacamilchic a Dios.
Cu c’anitháxin
11 An cau ax a ats’amalchic ma tam ta ts’i’quiyamal ca bela’ a Cristo jats axe’, cu c’anitháxin jun c’al xi jun.
12 Yab qui t’aja’ ejtil in t’aja’ a Caín tam tin tsemtha’ in ebchal, cum in ey jaja’ ejtil in ey an oc’ox teneclab. In tsemtha’ in ebchal tin ebal am pa’ixnomtalab abal in t’ajamal lej alhua’, ani a Caín iba in t’ajamal alhua’.
13 Ebchalabchic, yab ca jic’pa’ max ti pojcal an inicchic axi yab im belal a Cristo.
14 Cum i c’anithal an ebchalabchic c’al a Cristo i tso’obits abal a Dios tu pithamalits i it ejattalab ani yabats u xe’ets ejtil max u tsemenec al i hualabtalab. Max yab i c’anithal an ebchalabchic c’al a Cristo, antsana’ tu xe’etse ejtil max u tsemenec al i hualabtalab.
15 A Dios tu tsu’tal ejtil max pel tu tsemthom inic max i pojcal an ebchalabchic c’al a Cristo, ani i tso’ob abal i tsemthom inic yab in cua’al i it ejattalab c’al a Dios.
16 Cum a Jesucristo im bina’ tim ba’ ca tsemets ti al an cruz tin ebal huahua’, antsana’ tu tejhua’methanchamal an c’anithomtalab axi lej chubax. Antsana’ pel i uchbilhue qui jum putat bina’ ti ba’ ani ma cu tsemtha abal qui tolmiy an ebchalabchic c’al a Cristo.
17 Max i cua’al jant’o teje’ tsabal ani yab qui yajnanchi an ebchalabchic c’al a Cristo ax in cua’al i yejenchixtalab, jolat qui ulu i c’anithal a Dios cum yab chubax i c’anithal.
18 Ichich hual tsacamilchic, yab expith qui uluq’ui i c’anithal an ebchalabchic c’al a Cristo, jaye qui chubax c’anitha’ ani qui tolmiychic. Tam ojni’ ne’ets qui tejhua’metha’ abal huahua’ u c’anithom.
19 Max antsana’ i chubax c’anithal an ebchalabchic c’al a Cristo, i tso’obits abal chubax pel tu c’al a Dios ani i ats’al chubaxmethachits i ichich tin tamet a Dios.
20 Max i ats’al jolbith ti cuete’ ichich ani qui tsalpay abal yab tu c’al a Dios, bel qui t’aja’ ti cuenta abal a Dios in cua’al in c’athpich tsap ani i ichich iba. In tala’ ejtiyal patal a Dios.
21 Ichich hual ebchalabchic, max yab i ats’al tu jolbith i ejtohual cu utey qui tauna’ a Dios c’al i ichich lej thacat.
22 Ani jaja’ ne’ets tucu pitha’ patal jahua’ qui conchi cum i putuhual c’al in uchbixtalchic ani i t’ajchal in culbetal.
23 In uchbixtalchic jats qui bela’ in Tsacamil Jesucristo ani cu c’anitháxin jun c’al xi jun.
24 Max i putuhual c’al in uchbixtalchic a Dios, u junini’ c’uajat huahua’ c’al a Dios ani jaja’ junini’ c’uajat ti ichich. I tso’obits abal a Dios antsana’ c’uajat ti ichich cum tu pithamalits an Espíritu Santo taja’ ca c’uajiy.