HEBREOS COMƗNƗMO ORETAGA RABE
1
Jesucristo rafuena jai caɨ cacajamona, Jusiñamuiña jai uiñotɨcaɨ
1 Jusiñamuidɨ caɨna ie rafuena jai uiñotade. Iena omoɨmo ja lloitɨcue. Caɨ jaiagaɨ mɨcorɨaɨmo Jusiñamuidɨ ie rafuena llote. Naimacɨmo ie rafuena llollena, jɨaɨcaɨño ie jaɨenisaɨna orede. Jɨaɨcaiño nɨcaɨ anado Jusiñamui ie rafuena llote. Iena llollena, jɨaɨcaiño ie facaina lloraɨnɨ mɨcorɨaɨna orede;
2 iadedɨ enɨruemo ie Jito billamona, Jusiñamui rafuena jai caɨ cacajamona, Jusiñamuina birui jai uiñotɨcaɨ. Ie Jito uaido, mona dɨga, enɨruena jaie fɨnode. Ie Jito uaido nana rana jaie fɨnode. Na comɨnɨ dɨga jɨaɨ fɨnode. Jusiñamuidɨ nana ra, nana comɨnɨ dɨga ie Jito anamo ɨco illena jai llote.
3 Ie Jito uaido nana naie rana fɨnocana uite. Naimɨe muidona Jusiñamui marena ebirenana uiñotɨcaɨ. Jusiñamui marena naimɨe illa isoi, naimɨemona Jusiñamuina uiñotɨcaɨ. Enɨruemo billanona, caɨ comecɨmo ite jeacɨno facaina naimɨe fiodaite. Monamo abɨdo jaillanona, illaɨmana naimɨe illamona, Jusiñamui abɨmo naimɨe jaide. Naimɨeri Jusiñamui iobillamona, Jusiñamui abɨmo naimɨe jaide. Illaɨmana naimɨe dane illa jira, Jusiñamui abɨmo naimɨe jaide.
Jusiñamui Jito Jusiñamui jaɨenisaɨ baɨfemo faɨte
4 Jusiñamui Jitona naimɨe illamona, naimɨe illano Jusiñamui jaɨenisaɨ illano baɨfemo faɨte. Ie illanomona naimɨe Jusiñamui jaɨenisaɨ baɨfemo faɨana uiñotɨcaɨ.
5 Jusiñamuidɨ: “Cue Jitodɨo” Cristomo llote; iadedɨ ie jaɨenisaɨmo iese lloñede. Jɨaɨcaiño llote: “Naimɨe Moodɨcue. Naimɨe cue Jito” llote. Ie jaɨenisaɨ ie Jito baɨfemo faɨñena jira, ie jaɨenisaɨmo iena jaca lloñede.
6 Ie dajede Jito enɨruemo oretaja facaiseconi Jusiñamui llote:
Nana cue jaɨenisaɨ naimɨemo iobillacɨnona fecaja;
7 iadedɨ jɨaɨe rafuedo ie jaɨenisaɨna ñaɨte:
Cue ocuilla rafuena naimacɨ fɨnollena, cue ocuilla dɨese naimacɨna oretacabitɨcue.
8 Ie Jitona ñaɨanona raite:
Cue isoi o illa jira, comɨnɨna o sedajafue jaca iite.
Eo marecɨnodo comɨnɨna jaca sedadɨo.
9 Mare rafue fɨnuana jitaidɨo.
Maraiñedɨcɨnona fɨnuana jitaiñedɨo.
Ie jira ona caɨmare jai itatatɨcue.
Monamo o abɨdo billanona, cue jaɨenisaɨ baɨfemo ona caɨmare itatatɨcue
raite.
10 Jɨaɨcaiño Jusiñamui ie Jitona raite:
Cue isoi o illa jira, o uai dɨga nanodofoconi enɨruena jaie fɨnodɨo.
Mona jɨaɨ fɨnodɨo.
11 Bie enɨruedɨ mona dɨga ɨco fuite.
Ɨniroi fuilla isoi, iñeite;
iadedɨ odɨ jaca iitɨo.
12 Enɨruena mona dɨga meidotaitɨo;
iadedɨ odɨ jaca daje isoitɨo.
Jaca iitɨo
raite.
13 Ie Jitomo biena llote; ia ie jaɨenisaɨmona damɨemo iese lloñede. Ie Jitomo llote:
Illaɨmana o illamona, cue nabei dɨne ana raɨ.
Nana o dɨbeimo iñedɨnona o anamo itataitɨcue.
14 Ie jaɨenisaɨmo iena lloñede; iadedɨ naimacɨna oretacabite, ie Jitona ɨɨnotɨnona canollena. Ie jira nana naiemona, ie Jito ie jaɨenisaɨ baɨfemo faɨana uiñotɨcaɨ.