22
Judíuaɨ illaɨcomɨnɨ Jesúna gaɨtallena siadua rafue
(Mt 26.1-5, 14-16; Mr 14.1-2, 10-11; Jn 11.45-53)
1 Naie facaise pascua railla rafue iaɨrei ite. Naie facaise llomenico guille rafue jɨaɨ ite. Naie rafue ia, sɨritate rana jaca guiñedɨmacɨ. Egiptomona naimacɨ jaiagaɨ jillobillana comecɨllena, naie rafue ite.
2 Judíuaɨ illaɨcomɨnɨ Jesúna meineiacadɨmacɨ; iadedɨ comɨnɨna jacɨruillanona, naimɨena nia meineñedɨmacɨ.
3 Ie facaiseconi Taɨfe ie anamo Judas Iscariote mɨcorɨna itatate. Judadɨ Jesús ie doce llofueoicaigano imɨe.
4 Jusiñamui dɨga nanoca ñaɨraɨnɨ dɨne jaide. Jusiñamui jofona sedaraɨnɨ dɨne jɨaɨ jaide. Jesúna gaɨtatallena, naimacɨ dɨga ñaɨaide.
5 Iobillanona, naimɨemo ucubena fecaacadɨmacɨ.
6 Judas dɨnena:
—Jee —raite. Jesús dɨga ailluena comɨnɨ iñena facaiseconi naimɨena gaɨtatallena sedade.
Jesúdɨ ie fiodaille rafuena llua rafue
(Mt 26.17-29; Mr 14.12-25; Jn 13.21-30; 1 Co 11.23-26)
7 Llomenico guille rafue illanona, judíuaɨ comɨnɨ toɨca llauda fauillarui ride.
8 Jesúdɨ Pedro iaɨmaiaɨ Juan dɨga oretajano, raite:
—Caɨ rafue guille uicodo fɨnollesa omɨco jai.
9 Naimɨemo jɨcanotɨiaɨmaiaɨ:
—¿Nɨnomo naiena coco fɨnuana jitaidɨo?
10 Uai ote:
—Ero, Jerusalémo omɨco ria, nogodo jɨnuina uitɨmɨena cɨoitomɨco. Naimɨe jailla jofomo naimɨena raca.
11 Jofo namamo llono: “Coco llofueraɨma cocona omo jɨcanotade: ‘¿Nɨmai cue guiraco? ¿Nɨnomo guitɨcue, cue llofueoicaigano dɨga?’ ” Iese llono.
12 Ie mei omɨcomo afebebamo ite aillue cuartona acataite. Na raruiaɨ dɨga ite. Nainomo caɨ guille fɨno.
13 Jaidɨaɨmaiaɨ. Naimɨe llua isoi baitɨiaɨmaiaɨ. Pascua rafue guille fɨnodɨaɨmaiaɨ.
14 Guille facaiseconi ia, Jesús ie llofueoicaigano dɨga nainomo guisaide.
15 Mesamo guitɨmacɨmo, ie llofueoicaiganomo llote:
—Nia cue fiodaiñenia, omoɨ dɨga bie rafue guillena eo jitaidɨcue.
16 Ie comɨnɨna cue Moo ɨco sedalle facaise ia, nana bie rafue fuite.
17 Jiroracomo jai totaca vino llɨnocaida, Jusiñamuimo iobillacɨnona fecaja mei, raite:
—Mai llɨno. Biemona nana dajena omoɨ jiro.
18 Omoɨna bene dane iese caɨmare nabaiñeitɨcue. Cue Moo sedajanomo omoɨ dɨga ɨco cue ia, nainomo omoɨna dane iese caɨmare marena nabaitɨcue. —Iena jirodɨmacɨ.
19 Llomenicona llɨnuanona, Jusiñamuimo iobillacɨnona fecaja mei, iena taɨrude. Naimacɨmo fecajano raite:
—Biedɨ cue abɨ facai ie. Omoɨ facaina fiodaitɨcue. Cue abɨmo omoɨ comecɨna facajano, iena guiño.
20 Naimacɨ guilla fuilla mei, jiroracomo vino dɨga dane oruitajanona, naimacɨna jirotate. Raite:
—Cue fiodaillamona, dama cue dɨaillamona, jeacɨno anamona jilloitomoɨ. Jusiñamuidɨ omoɨmo jɨaɨe rafue birui itatajanona, omoɨ jeacɨno oni dotajana jai llote. Bie vinodɨ naie rafue facai ie. —Iena jirodɨmacɨ.
21 Jesús llote:
—Ero, cuena gaɨtataitɨmɨe caɨ dɨga guite.
22 Monamona billanona ɨimana jaidɨcue. Jusiñamui jitailla isoi jai jaioicaidɨcue; iadedɨ Jusiñamuimona cuena gaɨtataitɨmɨe eo duere sefuite.
23 Iemei: “¿Nɨmɨe Jesúna gaɨtatalle?” danɨ coninɨri siadosɨde.
Naimacɨ moto imɨena bu ille rafue
24 Ie facaise coninɨri siaduana raitɨmacɨ:
—¿Caɨ moto imɨena bu ille?
25 Iena cacajanona, Jesús raite:
—Naimacɨ jitailla ra fɨnollena, judíuaɨñedɨno illaɨmaɨaɨdɨ naimacɨ anamo itɨnona ocuicabide. “Caɨ anamo itɨnona canocabidɨcaɨ” raitɨmacɨ;
26 iadedɨ omoɨmo iese iñede. Omoɨ moto itɨmɨe omoɨ moto imɨeñedɨmɨena jailla. Omoɨmona bu imɨena iacania, omoɨ mullaɨmana naimɨe jaicabillasa. Omoɨmona bu imɨena iacania, omoɨna naimɨe canocana jaicabillasa.
27 Ero, jɨaɨe rafuedo iena lloitɨcue. Naimɨena ecallena, naimɨena canollena, patrón anamo ie mullaɨaɨ itɨmacɨ. Naimacɨ baɨfemo patrón illamona, naimacɨna canollena, ie mullaɨaɨ facaina maɨjɨñede. Cue anamo itomoɨ; ia omoɨna canollena, omoɨ mullaɨma isoi itɨcue.
28 Birui duere cue sefuidɨcuemo, cuena faɨnonocaiñedomoɨ.
29 Cue Moo cuena illaɨmana jai itatate. Omoɨna fetodɨcue,
30 jɨaɨruido cue illaɨma illa facaiseconi cue ecɨmo omoɨ caɨmare marena iocɨre illena. Nainomo omoɨ judíuaɨ doce naɨraɨaɨna sedaitomoɨ.
Jesúdɨ Pedro naimɨena januana llua rafue
(Mt 26.31-35; Mr 14.27-31; Jn 13.36-38)
31 Jesús llote:
—Simón Pedro, ero, Taɨfedɨ Jusiñamuimo ona jɨcanote, o ramo faɨllena;
32 iadedɨ ori jai jɨɨdɨcue, cuena nia ɨɨnocana o jaillena. Ɨco cuena raise o ɨɨnoñena mei, cue dɨbeimo o comecɨ iuai dane o meidoia, iemona jɨaɨe creyentiaɨ comecɨaɨna ocuiñotaitɨo.
33 Pedro uai ote:
—Nama, cárcelmo o ia, nainomo jɨaɨ iitɨcue. O fiodaia, jɨaɨ fiodaitɨcue. Ona faɨnonocaiñeitɨcue.
34 Jesús uai ote:
—Pedro, jitɨramo ɨitava nia ñaɨñenia, dacaiño amani cuena janoitɨo.
Jesús fiodailla facaise iaɨrei illa rafue
35 Ie llofueoicaiganomo Jesús llote:
—Omoɨmo ite rafuena uiñoiacadɨcue. Cue rafue llollena, navui omoɨna oredɨcue. “Ucubena uiñeno, bolsa uiñeno, meidolle zapatos uiñeno” omoɨmo llotɨcue. Naie facaiseconi omoɨ, ¿bue rana jitaidomoɨ?
Uai otɨmacɨ:
—Caɨ buena jitaiñedɨcaɨ.
36 Jesús raite:
—Biruimona omoɨ duere sefuitomoɨ. Ie jira abɨna rairuicana jai. Birui ucube omoɨmo ia, nɨne omoɨ jaia, iena uiño. Bolsa bumo ia, iena uiño. Abɨna rɨidollena, omoɨmo lloebɨ iñenia, janore ɨniroina feca, lloebɨ ollena.
37 Cuena jaie cuegafuiaɨ ja suite. Isaías mɨcorɨ cuena jaie cuega: “Maraiñede rafue fɨnoraɨma isoi naimɨe duere sefuite”.
38 Raitɨmacɨ:
—Ero, Nama, mena lloebɨ caɨmo birui ite.
Jesús uai ote:
—Mena ia, macaɨbaite.
Jesúdɨ Getsemanímo Jusiñamuimo jɨɨa rafue
(Mt 26.36-46; Mr 14.32-42)
39 Guille mei, ie llofueoicaigano dɨga, Jesús jino jaide. Olivos railla anedumo naimɨe jaisoilla isoi jaide.
40 Nainomo ria, naimacɨmo llote:
—Taɨfe omoɨna ramo faɨ raillano, iena omoɨ ɨɨnoñellena, Jusiñamuimo jɨɨ —llote.
41 Naimɨe janorede nofɨcɨ baɨ faɨa uailla dɨnori baɨ jaide. Caiñɨcɨ ɨfodo ana raɨta, Jusiñamuimo jɨɨde:
42 —Ore Moo, o jitaia, cue duere sefuillamona cuena jillota. Cue jitailla isoi cuena fɨnoñeno; iadedɨ o jitailla isoi cuena fɨno.
43 Naimɨe comecɨna ocuiñotallena, ie facaiseconi monamona Jusiñamui jaɨenicɨ bite.
44 Jesús comecɨ jarire illamona, naimɨe rɨocɨ faɨtemo, dɨfai dɨruena enɨruemo uaide.
45 Jɨɨa mei, ie llofueoicaigano dɨne abɨdo bite. Ocosinaillamona, jai ɨnɨdɨmacɨ.
46 Naimacɨmo jɨcanote:
—¿Bue ñellena ɨnɨdomoɨ? Mai casi. Taɨfe ramo omoɨna faɨ raillano, iena omoɨ ɨɨnoñellena, Jusiñamuimo jɨɨ.
Jesúna gaɨtalle rafue
(Mt 26.47-56; Mr 14.43-50; Jn 18.2-11)
47 Nia Jesús lloia, dɨga comɨnɨ naimɨe dɨne bitɨmacɨ. Judas Iscariote mɨcorɨ naimacɨna ɨfode. Naimɨedɨ Jesús llofueoicaigamɨe. Naimɨena llibanollena. Jesús dɨne iaɨrei bite.
48 Jesús raite:
—Judas, cuena llibanuanona, cuena gaɨtataiacadɨo.
49 Ie llofueoicaigano naie rafuena jai cɨodɨmacɨ. Jɨcanotɨmacɨ:
—Nama, ¿caɨ atɨca lloebɨ dɨga ona rɨidoitɨcaɨ?
50 Ie facaise naimacɨmona damɨedɨ Jusiñamui dɨga nanoca ñaɨraɨma ie mullaɨma ie nabei jefona jaɨbonote.
51 Jesús dɨnena raite:
—Dama ite. —Ie jefona naimɨe jetajamona, naimɨena jillotate.
52 Dɨga illaɨcomɨnɨ Judas dɨga Jesús dɨne bitɨmacɨ. Naimacɨmo Jesús llote:
—Fɨɨriraɨmadɨcueta cuena omoɨ gaɨtajaɨbilla. Omoɨ lloebɨna atɨdomoɨ. Omoɨ butaralluna jɨaɨ atɨdomoɨ.
53 Nagarui Jusiñamui jofomo omoɨ motomo llofuecabitɨcue; iadedɨ cuena gaɨtañedomoɨ. Jusiñamui jitailla jira, cuena omoɨ gaɨtaja facaise jai ride. Taɨfe anamo jai itomoɨ.
Pedrodɨ Jesúna janua rafue
(Mt 26.57-58, 69-75; Mr 14.53-54, 66-72; Jn 18.12-18, 25-27)
54 Naimɨena gaɨtaja mei, Jusiñamui dɨga nanoca ñaɨraɨma jofomo uitɨmacɨ. Pedro aarena naimacɨ jɨnafona racade.
55 Naɨraɨbɨrɨ motomo irai bonua mei, ana raɨdɨmacɨ. Pedro naimacɨ dɨga jɨaɨ raɨde.
56 Nainomo ite mullaɨñodɨ irai bouamona, Pedromo eruaɨllano raite:
—Bimɨedɨ Jesús dɨga jaisoɨdɨmɨe.
57 Pedro abɨ janote:
—Naimɨena uiñoñedɨcue.
58 Dallu illanona, jɨaɨmɨe Pedrona cɨuanona llote:
—Jesús ie llofueoicaigano imɨedɨo.
Pedro dɨnena uai ote:
—Imɨeñedɨcue.
59 Daje hora illanona, jɨaɨmɨe raite:
—Bimɨe galileo imɨena jira, bimɨedɨ Jesús dɨga ua jaisoidɨmɨe.
60 Pedro dɨnena raite:
—O lluana uiñoñedɨcue. —Ieconi naimɨe ñaɨtemo, ɨitava ñaɨte.
61 Jesús dobaidacaida, Pedromo erodacaide. Iemei Pedro Jesús lluana uibiñote. Jesús naimɨemo jaive llote: “Ɨitava nia ñaɨñenia, dacaiño amani cuena janoitɨo”.
62 Pedro jino jaillanona, eo sunaillamona, eo eede.
Jesúna jɨfanodua rafue
(Mt 26.67-68; Mr 14.65)
63 Ie facaise Jesúna gaɨtadɨno naimɨena jɨfanododɨmacɨ. Naimɨena jɨaɨ fatɨmacɨ.
64 Ie uisɨna maɨtɨmacɨ. Llotɨmacɨ:
—Siño jitodɨosa, ¿bu o faja? caɨmo llono.
65 Iese jɨfanodocana uitɨmacɨ.
Jesúdɨ judíuaɨ illaɨcomɨnɨ dɨne illa rafue
(Mt 26.59-66; Mr 14.55-64; Jn 18.19-24)
66 Monaidemo judíuaɨ illaɨcomɨnɨ ofidɨmacɨ. Jusiñamui dɨga nanoca ñaɨraɨnɨ ofidɨmacɨ. Moisés mɨcorɨ llogacɨno llofueraɨnɨ ofidɨmacɨ. Naimacɨ dɨne naimɨena gaɨtadɨno Jesúna uitɨmacɨ. Naie illaɨcomɨnɨ dɨnena raitɨmacɨ:
67 —Ua Cristodɨona, iena caɨmo llono.
Jesús uai ote:
—Omoɨmo iena cue lloia, ɨɨnoñeitomoɨ.
68 Buena omoɨmo cue jɨcanoia, cue uaina oñeitomoɨ.
69 Monamona jaie billanona, ɨimana jaidɨcue. Cuena omoɨ meiniamona, illaɨma isoi Jusiñamui ecɨmo raɨre iitɨcue.
70 Nana jɨcanotɨmacɨ:
—“¿Jusiñamui Jitodɨcue” raitɨo?
Uai ote:
—Raise cacadomoɨ. Imɨedɨcue.
71 Iena cacajano, raitɨmacɨ:
—Naimɨe lluana jai cacadɨcaɨ. Jɨaɨe comɨnɨ naimɨena llogɨduana jai jitaiñedɨcaɨ. “Jusiñamui Jitona itɨcue” naimɨe llua jira, Jusiñamuina jai jeare ñaɨte. Naimɨe Jusiñamui Jitoñede.