20
Juan mil años Taɨfe maɨana cɨode
Naie facaise monamona jaɨenicɨ billana cɨodɨcue. Enɨruemo eo ana ite ifo llave naimɨemo ite. Aillue lloeo ie onollɨmo ite. Aillue jaiona eruaɨdɨmɨena gaɨtade. Naimɨedɨ Taɨfe. Rɨaɨ uaimona Satanás. Jɨaɨcɨ dragón. Mil años iese illena lloeo dɨga naimɨena maɨte. Ana ite ifomo naimɨena dotade. Llave dɨga ifona ɨbaide. Comɨnɨna ramo faɨñellena, naimacɨna jeacɨnona fɨnotañellena, naimɨe uaina itatañede. Mil años comɨnɨna jɨfuenide. Mil años fuilla mei, dallu naimɨena jino oretaite, comɨnɨna ramo faɨllena.
Ie mei monamo dɨga jueces illanuaɨna cɨodɨcue. Jusiñamui uai dɨga nainomo itɨnodɨ maraiñede rafue fɨnodɨnomo jamai duere sefuillɨcɨnona lloitɨmacɨ. Ie facaise jai meineganona jɨaɨ cɨodɨcue. Eo duere sefuilla facaise “Jesús comɨnɨdɨcaɨ” naimacɨ llua jira, Jusiñamui uaina naimacɨ llua jira, naimacɨ ɨfogɨaɨna jaitajanona, naimacɨna meineganodɨmacɨ. Monaillaimona bite ocainana sedañedɨmacɨ. Ie joreñona sedañedɨmacɨ. Ie cuetataga ra naimacɨ uiecomo, naimacɨ onollɨmo iñede. Navui fiodaitɨmacɨ; ia iemona bie facaise jai jillobitɨmacɨ. Imacɨ abɨaɨ dɨga Jusiñamui naimacɨna jillotaite. Cristo dɨga mil años enɨruemo itɨnona sedaitɨmacɨ. Naimacɨdɨ nano jillodɨno. Naie mil años nia fuiñenia, jɨaɨe jai fiodaitɨno nia jilloñeitɨmacɨ; ia mil años fuilla mei, jilloitɨmacɨ. ¡Nano jillodɨno caɨmare marena iitɨmacɨ! Dane fiodaiñenamona Jusiñamui illanomo jaca iitɨmacɨ. Faɨfiñeitɨmacɨ. Comɨnɨna sedajanona, comɨnɨ Jusiñamuina raise uiñollena, comɨnɨ Cristona raise uiñollena, naimacɨna canoitɨmacɨ. Cristo dɨga mil años naimacɨna sedaitɨmacɨ.
Bie mil años fuilla mei, Jusiñamuidɨ ana ite ifomona Taɨfe jino oretaite. Nana enɨruemo ite naɨraɨaɨna jɨfuiaɨbite. Gog railla illaɨcomɨnɨna, Magog railla naɨraɨaɨ dɨga, jɨfueite. Naimacɨ naɨraɨaɨna ofitaite. Eo ailluena naimacɨ illa jira, conillɨena caɨ facadonina isoi, naimacɨna facadonidɨcue. Jusiñamuina ɨɨnotɨno dɨga jobairillena, ofitɨmaci. Danomo ofillanona, Jusiñamuina ɨɨnotɨnona cɨrɨbitaitɨmacɨ. Jerusaléna, Jusiñamui isiruiga naɨraɨna, cɨrɨbitaitɨmacɨ. Naie facaise monamona boode ra billanona, jobairiacadɨnona fuidoite. 10 Comɨnɨna eo jɨfuecabite; ia ie facaise Jusiñamuidɨ Taɨfena eo boode iraimo dotaite. Azufre boa isoi irai boode. Nainomo monaillaimona bite ocainana jaie dotade. Naimɨe facaina taɨnona lloraɨma jaie dotade. Nainomo ua jaca duere sefuitɨmacɨ
Juan aillue raɨrabɨcɨna cɨode. Nainomona Jusiñamui duere fɨnollɨcɨnona lluana cacade
11 Naie facaise aillue userede raɨrabɨcɨna cɨodɨcue. Illaɨmana naimɨe illamona, nainomo Jusiñamuina jɨaɨ cɨodɨcue. Naimɨe siño illamona, mona enɨrue dɨga jai iñede. 12 Naie facaise Jusiñamui uicomo nana fiodaitɨno naidaillana cɨodɨcue. Jamai bue isoiñedɨno itɨmacɨ. Jamai bue isoidɨno itɨmacɨ. Naimacɨmo juez isoi Jusiñamui llollena, itɨmacɨ. Ie rabenicuaɨmo naimacɨ jai fɨnoca rafuena jɨbuide. Naimacɨ fɨnoca rafue nainomo jai cuega. Iemei Jusiñamui jɨaɨe rabenicona jɨbuide. Naimɨe dɨga jaca ille comɨnɨ mamecɨaɨ nainomo jai cuega. Naimacɨ mamecɨaɨ nainomo iñenia, naimacɨ fɨnoca rafue dɨese Jusiñamui naimacɨmo duere sefuillena llote. 13 Monaillaimo ite corobaitɨno abɨaɨ, joreñuaɨ dɨga, jilloitɨmacɨ. Raɨgano abɨaɨ joreñuaɨ dɨga jilloitɨmacɨ. Naimacɨ fɨnoca rafue dɨese Jusiñamui naimacɨmo duere fɨnollena lloite. 14 Naimacɨ abɨaɨ naimacɨ joreñuaɨ dɨga iraimo dotaite. Jaca faɨfitɨmacɨ. Naiemona jaca jilloñeitɨmacɨ. Jusiñamuimona eneno jaca itɨmacɨ. 15 Monamo ite rabenicomo cueñega comɨnɨ mamecɨaɨ dɨese itɨnona iraimo dotaite.