2
Nana comɨnɨ facaina jɨɨitɨcaɨ
Dɨga rafue omo lloitɨcue; iadedɨ daje rafue motomo ite. Nanoca rafue. Iena omo lloitɨcue. Jusiñamui dɨga omoɨ ñaɨa, nana comɨnɨ facaina jɨɨ. Naimacɨri iobillacɨnona Jusiñamuimo feca. Uri caɨ illena, Jusiñamuina raise caɨ sedallena, Jusiñamui jitailla rafuena caɨ fɨnollena, illaɨcomɨnɨ facaina caɨ jɨɨ. Iese caɨ jɨɨia, Jusiñamuimona mare. Naimɨedɨ caɨ Jilloitaraɨma. Naimɨedɨ nana comɨnɨ naimacɨ jeacɨnomona jilluana jitaide. Uanaicɨnona naimacɨ uiñuana jɨaɨ jitaide. Nana naɨraɨaɨ imacɨ Jusiñamuidɨ jaca dajede. Comɨnɨ dɨga Jusiñamui facaisena ñaɨraɨma jaca dajede. Naimɨedɨ Cristo Jesús. Comɨnɨ Jusiñamui facaisena naimɨe ñaɨcabite. Comɨnɨ facaisena ñaɨraɨma jaca dajede. Naimɨedɨ Cristo Jesús. Naimɨe ɨimananona, comɨnɨ facaisena ñaɨrede. Ie muidona comɨnɨ dɨga Jusiñamui jai nabairede. Jusiñamui dɨga comɨnɨ jɨaɨ jai nabairedɨmacɨ. Caɨ jeacɨnomona caɨ eneno illena, Jesucristo nana caɨ facaina jai fiodaite. Naimɨe jitailla facaiseconi Jusiñamuidɨ comɨnɨna bie rafuena jai uiñotade. Bie rafue cue llollena, Jusiñamui cuena fetode. Judíuaɨñedɨnomo cue llollena, bie rafue naimacɨ ɨɨnollena, uanaicɨnona naimacɨ uiñollena, cuena orede. Taɨnona lloñedɨcue.
Ie jira naga roracomo ite ɨiñɨaɨ, caɨ comɨnɨ onollɨaɨ a ñuitacabilla isoi, comecɨaɨmo jeacɨno iñenanomona, Jusiñamuimo jɨɨana jitaidɨcue. Naimacɨ comecɨaɨmo icɨrillacɨno iñedemo, Jusiñamuimo jɨɨ. Naimacɨ comecɨaɨmo uaitajacɨno iñedemo, Jusiñamuimo jɨɨ. 9-10 Rɨñonɨaɨmo jɨaɨ lloitɨcue. Roracomo omoɨ jaia, abɨ ɨeduamo comecɨaɨna facañenamona, omoɨ ɨfotɨena fɨno. Jamai ebinai raillano, abɨ ɨeduamona abɨna fɨnora jɨtañeno. Jamai ebinai raillano, abɨ ɨeduamona eo raifide ɨniroina jɨtañeno; iadedɨ mare rafuena omoɨ fɨnuamona, ebinaitomoɨ. “Jusiñamuina ɨɨnotɨcaɨ” omoɨ raillanona, naimɨe jitailla isoi, marena omoɨ fɨnolle. 11 Rollena comɨnɨ ofia, ñaɨñenanomona, uaitañenamona omoɨ fueo. 12 Omoɨ ofia, omoɨ ɨiñɨaɨna llofuiana jitaiñedɨcue. Nainomo omoɨ ñaɨñena. Ɨiñɨaɨ omoɨ anamo illana jitaiñedɨcue. Iese omoɨ rɨñonɨaɨmo lloiacadɨcue. 13 Jusiñamui Adán mɨcorɨna nano fɨnua jira, iese llotɨcue. Adán mɨcorɨ fɨnua mei, Eva mɨcorɨna jɨaɨ fɨnode. 14 Taɨfedɨ Adán mɨcorɨna jɨfueñede; iadedɨ Eva mɨcorɨna jɨfuete. Ie mei naie rɨño jeacɨnona fɨnode. 15 Iemona jilloite; iadedɨ uruiaɨ jococana jaite. Rɨñonɨaɨdɨ Jusiñamuina ɨɨnoia, jɨaɨe comɨnɨna isiruia, Jusiñamui jitailla rafuena fɨnoia, ie abɨna eenoia, jilloitɨmacɨ.