Najneaj nanderac leaw tapiüng
SAN JUAN
wüx Teat Cristo
1
Nanderac tiün marang nipilan
Tanomb wüx nganaw majlüy iüt, nganaw majlüy nicuajind, pero aaga Nanderac quiaj almajlüy. Aaga Nanderac quiaj almajlüy maquiiüb Teat Dios; nej Dios nej. Nej ajlüy nóiquian maquiiüb Teat Dios nde ajlüy. Meáwan leaw almajlüy, tajlüy arang nej. Nicuajind ngondom majlüy leawa almajlüy nganüy, sitiül nej ngo marang. Nej üüch mapac meáwan cuajantanej leaw almajlüy. Aaga neech mapacaran quiaj, arraj nipilan atnej ran arraj cuajantanej. Aaga ran quiaj arraj tiül pojniün; pojniün ngondom mapeniich aaga ran quiaj.
Tajlüy nop naxey nenüt Juan, aaga neech yow nipilan; nej tiün üüch nej miün Teat Dios. Aaga naxey quiaj tiün mandeac wüx aaga almajlüy atnej ran quiaj, para mayariw andeac nej meáwan nipilan. Juan ngome nej aaga ran quiaj. Nej tiün majüiquich cuane amb apiüng aaga ran quiaj, jane wüx andeac. Nej aaga ran quiaj naleaing, tenguial marraj meáwan nipilan; nej tiün wüx aaga iüt cam.
10 Aaga ran quiaj tajlüy wüx iüt cam, pero nipilan ngo majawüw jane nej masey nej tarang meáwan leaw almajlüy. 11 Nej tiün tiül micambaj nej; pero micambaj nej ngo mandiümüw nej. 12 Nganüy meáwan monyar andeac nej, ajcüw ayaj tüjndiw majlüyiw micual nejiw Teat Dios. 13 Cos ngome wijquiatoj awiquiach nejiw nipilan, átan ngome aljane tandiüm majaw wijquiamoj. Aton ngome nop naxey tandiüm majiür micual nej. Ngwüy, nejiw micual nejiw Teat Dios.
14 Aaga Nanderac quiaj tiün wijquiam marang nipilan atnej icoots; at tacül ningüy maquiüjpaats. Tajawaats nej tarang xeyay cuajantanej najneaj. Nej arang leaw naleaing, cos naleaing nej anopǘyan micual Teat Dios. 15 Juan tiün mandeac wüx nej, tapiüng:
―Tandeacas wüx aaga Teat Naxey cam wüx tapiüngas aliüc miün nop natang, xeyay netam ajlüy, ngo mat xic; cos wüx nganaw najlüy, nej almajlüy ―aw.
16 Xeyay ajüiquich mimonajneaj nej tiül meáwan icoots, cos nej üüch icoots meáwan leaw netam, ǘüchan. 17 Aaga ajlüyay poch tüünd teat Moisés tajlüy, para ndom majawaats nguineay netam marangaats. Nganüy aaga jayats poch Teat Jesucristo tüüch icoots para alndom majawaats cuane naleaing, at para mayariiüts mimonajneaj nej. 18 Naleaing nejinguind ngo maxom majaw nejay Teat Dios. Áagan anopǘyan micual nej lamajaw cos almaquiiüb, nej ajüiquichay majaw nguineay ajlüy.
Leawa tandeac Juan Bautista
(Mt. 3:11-12; Mr. 1:7-8; Lc. 3:15-17)
19 Atcüy tapiüng a Juan wüx ajcüwa monajiüt ocueaj nipilan judío tiül Jerusalén tüjchiw mamb acas miteaats ata levitas, matüniw manguiayiw wüx aaga teamandeac quiaj. Tasajüw:
―¿Jowa ique jan ic? ―ajüw.
20 Nej ngo mawaiich, aleáingan tapiüng:
―Xique ngome aaga Cristo lapiürang aliüc ―aw.
21 Tandüyiw wüx matüniw nej manguiayiw:
―¿Jane ic? ¿Ngwüy ique Elíasa? ―awüw.
Juan tandüy wüx mapiüng:
―Ngwüy, ngome xique ―aw.
Condom tandüyiw wüx masajüw nej:
―¿Ngwüy ique alinop nendeac andeac Teat Diosa? ―ajüw nej.
―Ngwüy ―aw.
22 Condom tasajüw nej alinomb:
―Ngwüy naleaing sapiüngan, ipiüng jane ic, isaj xicon. Cos netam napiüngan wüx sanapeayiün niüng ajlüyiw moneech xicon niünan. Ipiüng jan ic ―ajüw nej.
23 Quiaj tasaj nejiw a Juan:
―Xique aaga nendeac tiül wajchiüc atnej tapiüng Isaías wüx tapiüng: “Ileainguijchan mitiiüd Teat Naxey cos aliüc” ―aw.
24 Ajcüwa nasoiquiw mambüw majawüw a Juan quiaj, üüch nejiw mambüw fariseos. 25 Condom tasajüw a Juan:
―Sitiül ngome ique a Cristo, at ngome aaga Elías, at ngome alinop nendeac andeac Teat Dios, ¿neol tapots meaach yow nipilan? ―ajüw nej.
26 Quiaj tasaj nejiw a Juan:
―Naleaing ipiüngan xique süüch yow. Nganüy almajlüy nop tíülan nipilan, icona ngo mejawan jane nej. 27 Xique tapiüngas aliüc miün nop natang netam ajlüy, ngo mat xic, cos wüx nganaw najlüy, nej lajlüy. Sayaag ngondom nacheed aonts apaj nej, cos sayaag nicuajind xic ―aj nejiw.
28 Atquiaj tajlüy tiül cambaj Betábara nonüt necamb lam Jordán niüng tenguial üüch yow nipilan a Juan.
Teat Jesús atnej sap ocueaj Teat Dios
29 Aw alinoic nüt, Juan tajaw Teat Jesús aliüc andüy niüng ajlüy nej. Quiaj tapiüng:
―Ijawan aaga naxey aliüc quiaj. Aag ayaj Teat Dios neech nej miün. Apmarangüch wüx nej atnej arangüch wüx quicheech sap nambiyaran wüx pascua, cos nej apmangüy asoet nipilan. 30 Aag ayaj lanapiüng wüx, cos tapiüngas: “Aliüc miün nop teat naxey xeyay netam ajlüy, ngo mat xic. Nej ombas majlüy, xique teoj; cos wüx nganaw najlüy, nej almajlüy”, saw. 31 Xique ngo najaw jane nej, nguineay apmajawüw nipilan judío. Áag tiünas nüjchiw mayariw yow ―aw.
32 At tapiüng a Juan:
―Xiquiay sajaw Nangaj Espíritu ocueaj Teat Dios tiün imiün cielo atnej noic palom mejquiem wüx ombas nej. 33 Xique nganaw najaw jane nej. Pero cos aaga nesaj xic niün nüüch yow nipilan lamasaj xic: “Wüx apmejaw Nangaj Espíritu miün andüy wüx ombas nop teat naxey macül wüx nej, aag ayaj apmüüch nipilan Nangaj Espíritu ocueaj Teat Dios.” 34 Naleaing, nganüy lanajaw Micual Teat Dios nej, cos xiquiay tajawas atquiaj tajlüy ―aw a Juan.
Teat Jesús tarriiüd acas minipilan nej
35 Aw alinoic nüt Juan alembem quiaj almaquiiüb ijpüw minipilan nej. 36 Quiaj majaw aleamb quiaj Teat Jesús, tapiüng:
―Ijawan, jogüy lapeay aaga nasoic Misap Teat Dios ―aw.
37 Ajcüwa ijpüw minipilan Juan wüx tanguiayiw aag ayaj, quiaj tambüw mandüjpiw Teat Jesús. 38 Teat Jesús wantsat majaw almandüjpiw nej, tasaj nejiw:
―¿Cuane iyamban, teat? ―aj nejiw.
Quiaj tapiüngüw:
―Rabí (amb apiüng nequiaach), ¿nguiane icül? ―ajüw nej.
39 Tasaj nejiw Teat Jesús:
―Tabaatsaron mejawan ―aj nejiw.
Quiaj tambüw majawüw nguiane acül. Condom tacülíwan quiaj maquiüjpüw, cos langwiiüts.
40 Nop tiül aaga ijpüw quiaj leaw tanguiayiw andeac teat Juan, condom tandüjpiw Teat Jesús, aag ayaj teat Andrés, michiig teat Simón Pedro. 41 Condom aaga Andrés quiaj tsajmbiüt mayamb Simón micoj nej, tasaj:
―Lanaxoman aaga Mesías nasoic a Cristo, aag lapiürang aliüc ―aj.
42 Condom teat Andrés taquiiüb mamb teat Simón majaw Teat Jesús. Wüx Teat Jesús tajaw a Simón, quiaj tasaj:
―Ique Simón micual teat Jonás, nde nganüy apmenüt Cefas, aag ayaj nasoic Pedro ―aj nej.
Teat Jesús tarriiüd Felipe y Natanael
43 Aw alinoic nüt Teat Jesús tind amb andüy tiül iüt Galilea, quiaj taxom Felipe, tasaj:
―Mac, tabar ―aj.
44 Aaga Felipe quiaj naw Betsaida tiül micambajüw Andrés y Pedro. 45 Condom aaga Felipe tamb mayamb Natanael. Wüx taxom tasaj:
―Lanaxoman aaga teat naxey leaw tanomb lamandeac wüx nej tiül aaga nawiig tarang Moisés. At ajcüwa mondeac andeac Teat Dios tandeacüw wüx nej. Aag ayaj nenüt Jesús, micual José, naw cambaj Nazaret ―aj.
46 Quiaj tapiüng Natanael:
―Jow aaga cambaj Nazaret quiaj, ¿mbich cuane najneaj alndom maw quiaja? ―aw.
Quiaj tapiüng a Felipe:
―Tabar mejaw ―aw.
47 Wüx Teat Jesús tajaw ajngot a Natanael, quiaj tapiüng:
―Jogüy aliüc nop nipilan judío leaw ngome áag awaiich ―aw.
48 Quiaj tasaj nej Natanael:
―¿Neol teat, nguiane meyaag ximbas? ―aj.
Quiaj tasaj nej Teat Jesús:
―Xique tajawas ic wüx nganaw mapaj ic Felipe, wüx alchetemear teowil toc ―aj nej.
49 Condom quiaj tasaj nej Natanael:
―Rabí, ique aaga Micual Teat Dios, ique minatang nenajiüt tiül nipilan judío ―aj nej.
50 Quiaj tasaj nej Teat Jesús:
―¿Neol, aag sasaj ic tajawas ic teowil toc teyar sandeaca? Naleaing apmejaw aliüc miün apmajlüy xeyay najneajneaj, ngome áagan ayaj ―aj nej.
51 At tasaj nejiw Teat Jesús:
―Naleaing naleaing sasaj icon, nde nganüy andüy quiaj apmejawan lejquiaw nangaj cielo, apmejawan ajcüwa ángeles ocueaj Teat Dios iünüw at andilileaw niüng ajlüy Teat Naxey ―aj nejiw.