18
Ndeaad Teat Jesús
(Mt. 26:47-56; Mr. 14:43-50; Lc. 22:47-53)
1 Wüx landoj mapiüng aag ayaj Teat Jesús, tawüw quiaj. Tambüw andüyiw necamb nine lam nasoic Cedrón. Tandüyiw quiaj niüng ajlüy acas owil nateaic xiül, maquiiüb minipilan nej.
2 Aaga Judas, leaw apmayac nej teowixaw monajiüt, ayaag quiaj cos ajlüyay canchiüjow quiaj maquiüjpüw Teat Jesús.
3 Quiaj tapeay aaga Judas, aquiiüb mamb noic ajlüy soldados, at acas monjiür nadam nangaj iüm, üüch nejiw mambüw montangtang miteaats maquiiüb fariseos. Ajoyiw linternas, at najquiol irrajayej; aton ajoyiw espadas.
4 Teat Jesús cos lamajaw cuane aliüc miün apmamongoch, quiaj witiüt tamb mangoch nejiw. Tapiüng:
―¿Jane iyambana? ―aj nejiw.
5 Quiaj tasajüw nej:
―Aaga Jesús naw Nazaret ―ajüw nej.
Teat Jesús tasaj nejiw:
―Jogüy xic ―aj nejiw.
Aaga Judas, leaw apmayac nej teowixaw monajiüt, altiül nipilan aton.
6 Wüx tasaj nejiw Teat Jesús: “Jogüy xic”, maj nejiw, tanaámb tanotoj opechiw, ajmiücüw pajcajow tiüt.
7 Condom Teat Jesús tandüy wüx matün manguiay nejiw:
―¿Jane iyambana? ―aj nejiw.
Quiaj tasajüw nej alinomb:
―Aaga Jesús naw Nazaret ―ajüw nej.
8 Quiaj tasaj nejiw Teat Jesús:
―Lanasaj icon jogüy xic. Sitiül xique temeyamban, ijchan mambüw xenipilan ―aj nejiw.
9 Atquiaj tajlüy atnej lamapiüng Teat Jesús wüx tapiüng: “Meáwan leawa teaach xic, nejinguind tiül nejiw ngome apndrom”, aw.
10 Simón Pedro almajoy nots espada, tasoond tiül ombiüm, tandooig miác olaag nop naxey nenüt Malco, mimos minatang miteaats.
11 Quiaj Teat Jesús tasaj a Pedro:
―¡Pedro, isoc alinomb tiül ombiüm nej miespada! ¿Neol, iyaag a ique ngo metam namongoch aaga naél leaw lamapiüng Xeteat netam namongoche? ―aj nej.
Teat Jesús alteombas minatang miteaats
(Mt. 26:57-58; Mr. 14:53-54; Lc. 22:54)
12 Ajcüwa soldados maquiüjpüw minatangüw nejiw, at monjiür nadam nangaj iüm ocueajiw nipilan judío, tasapüw Teat Jesús maoeliw.
13 Condom taquiüjpüw mamb andüy aniüng Anás, miocuats Caifás. Aaga Caifás quiaj, nej minatang miteaats tiül aaga neat quiaj.
14 Nej aaga Caifás quiaj, nejay nesaj monajiüt najneaj mandeow nop naxey ingow ndroj ombas aaga cambaj Israel, maw.
Pedro apiüng ngo majaw jane Teat Jesús
(Mt. 26:69-70; Mr. 14:66-68; Lc. 22:55-57)
15 Simón Pedro aquiiüb alinop minipilan Teat Jesús, tambüw mandüjpiw mamb Teat Jesús. Aaga alinop quiaj, ayaag nej ombas minatang miteaats. Áag tüünd majmel tinden maquiiüb Teat Jesús;
16 pero Pedro tacǘlan mbeay nden. Quiaj aaga naxey neyaag nej ombas minatang miteaats taw, tamb mandeac aweaag nejiür ombeay nden mamelich a Pedro aton.
17 Condom aaga nüx nejiür ombeay nden tatün manguiay a Pedro:
―¿Neol ngome ique nop minipilan aaga Jesús quiaja? ―aj.
Pedro quiaj tapiüng:
―Ngwüy ngome xique ―aw.
18 Ores quiaj naquind, pares tajalüw biümb ajcüwa mos maquiüjpüw monjiür nangaj iüm, alombomoj teatsantsayej. At a Pedro aton alembem quiaj teatsantsüy mbeay biümb.
Minatang miteaats atün manguiay Teat Jesús
(Mt. 26:59-66; Mr. 14:55-64; Lc. 22:66-71)
19 Condom minatang miteaats tatün manguiay Teat Jesús jane minipilan nej, at cuane wüx teamaquiaach.
20 Quiaj tasaj nej Teat Jesús:
―Xique ngo naxot, sandeac niüng ajlüy nipilan; samb tiül tiül ajcüw a sinagogas, aton samb tiül aaga nadam nangaj iüm, niüng canchiüjow meáwan micual miiütaats. Xique ngo nexotüy wüx sandeac.
21 ¿Jow nganüy, neol tetün menguiay xique? Itün menguiayiw ajcüwa tanguiayiw sandeac. Nejiw ich mapiüngüw cuane wüx tandeacas, cos lamajawüw ―aj nej.
22 Wüx ndoj mapiüng aag ayaj Teat Jesús, nop nejiür nadam nangaj iüm taleamb nej, tapiüng:
―¿Neol tesaj atquiaj minatang miteaatsa? ―aw.
23 Quiaj tasaj nej Teat Jesús:
―Sitiül ngo majneaj sasaj, ipiüng cuane ngo majneaj sasaj; sitiül najneaj, ¿neol teleamb xique? ―aj nej.
24 Condom quiaj aaga Anás tüüch mamb Teat Jesús neóel, andüy niüng ajlüy alinop minatang miteaats, aaga Caifás.
Teat Pedro tandüy wüx alinomb mawaiich
(Mt. 26:71-75; Mr. 14:69-72; Lc. 22:58-62)
25 Teat Pedro tealeámban aliün lembem quiaj, teatsantsüy. Quiaj tasajüw nej:
―¿Ngome ique nop minipilan neje aaga naxey quiaja? ―ajüw nej.
Quiaj tapiüng teat Pedro:
―Ngwüy, ngome xique ―aw.
26 Condom nop mimos minatang miteaats, acualaats aaga naxey nandooigaran olaag, andooig nej teat Pedro, tasaj nej:
―¿Ngome ique sajaw almequiiüb nej niüng ajlüy acas owil nateaic xiüla? ―aj nej.
27 Teat Pedro quiaj tandüy wüx alinomb mawaiich, tapiüng ngome nej. Quiaj apaj a gallo.
Teat Jesús alteombas a Pilato
(Mt. 27:1-2, 11-14; Mr. 15:1-5; Lc. 23:1-5)
28 Ǘmban arraw taquiüjpüw mamb Teat Jesús imiün aniüng a Caifás andüy awan niüng ajlüy a gobernador romano. Nejiw ngo majmeliw cos tiül aaga ajlüyay netam marangüw quiaj, sitiül majmeliw aniüng nop ngome nipilan judío wüx aaga nüt quiaj, apmajlüyiw ngo merixix, langondom metiw tiül nangos nüt pascua.
29 Quiaj taw a Pilato mandeacüw maquiüjpüw, tasaj nejiw:
―¿Cuane ngo majneaj arang aaga naxey cama? ―aj nejiw.
30 Quiaj tasajüw nej:
―Sitiül nej ngome aleaic arang ngo naquiüjpan miün niüng ijlüy ―ajüw nej.
31 Quiaj tapiüng a Pilato:
―Icona iquiüjpan mamb, ijawan wüx asoet nej atnej apiüng tiül minawijquian ―aw.
Quiaj tasajüw nej ajcüwa nipilan:
―Xicona ngondom nambiyan nejinguind ―ajüw nej.
32 Atquiaj tajlüy para majlüy atnej lamapiüng Teat Jesús nguineay apmandeow.
33 Condom a Pilato tandilil alinomb tajmel tiül awan, tapaj Teat Jesús matün manguiay, tasaj:
―¿Ique minatangüw nipilan israele? ―aj.
34 Teat Jesús tasaj nej:
―¿Aag ayaj itün menguiay cos indiüm mejawa, ngwüy aljane tasaj ic wüx xique? ―aj nej.
35 Quiaj tapiüng a Pilato:
―¿Neol jow xique mbich nop icona xique? Cos micual miíüt at montangtang miteaats monquiiüb ic miün niüng sajlüy. ¿Neol, cuane iranga? ―aw.
36 Condom tasaj nej Teat Jesús:
―Ngome ningüy wüx aaga iüt cam sarang natang. Jondot wüx aaga iüt cam sarang natang xenipilan apmatsojow; ngome apmüjchiw ndeaan najmel teowixaw monajiüt tiül judíos. Nganüy cos ngwüy, ngome ningüy sarang natang ―aj nej.
37 Pilato tasaj nej:
―¿Naleaingue, ique nop minatang nenajiüt tiül nejiw ipiünga? ―aj nej.
Quiaj tasaj nej Teat Jesús:
―Xique natang atnej lamepiüng quiaj. Áag wijquiatos tiünas wüx aaga iüt cam najüiquich cuane naleaing. Meáwan leawa andiümüw marangüw leawa naleaing, ajcüw ayaj apmandiümüw manguiayiw sandeac ―aj nej.
38 Quiaj tasaj nej a Pilato:
―¡Mbich jane ajaw cuane naleaing! ―aj nej.
Atüniw mandeow Teat Jesús
(Mt. 27:15-31; Mr. 15:6-20; Lc. 23:13-25)
Ndoj mapiüng aag ayaj a Pilato, quiaj taw alinomb masaj nipilan, tapiüng:
―Xique sapiüng aaga naxey cam ngo majiür asoet.
39 Icona ipiüngan alndom natsambiich nop najlüy tiül manchiüc wüx nangos nüt pascua. ¿Jow nganüy, indiüman natsambiich aaga naxey minatangana? ―aj nejiw.
40 Quiaj tepajüw tapiüngüw:
―¡Ngwüy, nde metsambiich aag ayaj! ¡Barrabás aptsajmbiüm! ―awüw.
Pues aaga Barrabás quiaj, need nej.