Jesus Guys
Wat Dey Wen Do
Acts
1
Jesus Promise Fo Sen God Spirit
Aloha, Teofilus! I wen write anodda book fo you befo time, an I wen tell you all da stuff dat Jesus do an teach from da start, till da time God take him up inside da sky. Befo he go up, he tell da guys dat he wen pick fo sen um all ova, wat dey gotta do. Da Good An Spesho Spirit wen tell Jesus all dat. Afta Jesus suffa, he let da guys he wen pick see him, an he show proof dat he stay alive fo real kine. He stay show up by dem fo forty days, an tell um how eryting stay wen God stay king.
One time wen Jesus stay wit his guys, he tell um, “No go way from Jerusalem, but wait ova hea till you guys get da Spirit my Faddah promise fo sen. You guys wen hear me tell bout dat Spirit. Befo time, John Da Baptiza Guy baptize peopo wit watta, but pretty soon God goin baptize you guys diffren kine: he goin let his Good An Spesho Spirit take charge a you.”
Jesus Go Up Inside Da Sky
One time, da guys dat Jesus pick come togedda wit him, an dey tell, “You Da One In Charge. You goin come king now fo da Israel peopo, jalike had one king befo time, o wat?”
He tell dem, “Not yoa kuleana fo know da time o da day da Faddah pick. He da One goin do dat. But you guys goin get spesho kine powa wen da Good An Spesho Spirit take charge a you. An den you guys goin tell da peopo in Jerusalem wat you know bout me, an same ting fo da peopo all ova Judea, Samaria, an all ova da world.” Afta he tell dat, God take him up in front dem, an den one cloud move unda him, fo dem no see him no moa.
10 Dey still stay look in da sky real good wen he stay go. Right den an dea two guys wit white clotheses stan by dem. 11 Dey tell, “You guys from Galilee, how come you stay stan hea an stay look in da sky? Dis guy Jesus, God wen take him from you, up inside da sky. He goin come back da same way you see him go.”
Dey Pick One Guy Fo Take Judas Place
(Songs 41:9; 69:25; 109:8)
12 Den da guys Jesus wen pick go way from da Olive Ridge, an go back Jerusalem, bout half mile. 13  Wen dey come dea, dey all go da place upstairs wea dey was staying. Had Peter, John, James, an Andrew; Philip an Thomas; Bartolomew an Matthew; Alfeus boy James, Simon da Jew Sovereignty guy, an James boy Judas. 14 Plenny times dey all pray togedda, wit da wahines, an Jesus muddah Mary an his braddahs.
15 Dat time had bout hundred twenny peopo dat trus Jesus. Dey come togedda, an Peter stan up fo talk. 16 He tell, “My braddahs an sistahs, wat da Bible tell wen happen awready, an dass how gotta be. King David tell long time befo time bout da guy Judas, cuz da Good An Spesho Spirit wen tell David all dat. Judas, he da guy wen bring da guys dat bus Jesus, an wen show dem wat one him. 17 But Judas, he come from us guys an he work wit us.”
18  (Da guys dat like kill Jesus wen give Judas money fo da bad ting he make plan fo do, an he buy one field wit da money. But he fall down dea, an he bus open, an his guts all come out. 19 An erybody inside Jerusalem hear bout dat. Az why dey name da field “Akeldama,” dat mean “Blood Field.”)
20  Den Peter tell, “David wen write down inside da Songs Fo God,
“ ‘His place goin stay empty,
No let nobody stay dea.’
“An David write too,
“ ‘Good fo anodda guy take ova his kuleana fo lead.’
21  “Az why us gotta pick one guy dat wen stay wit us all da time Jesus, Da One In Charge, come an go from us. 22 Az from da time John baptize him, till he go up to da sky. One a da guys gotta go wit us fo tell wat he wen see wen Jesus come back alive one mo time.”
23 So dey pick two guys: Joseph, da guy dey call Barsabbas o Justus, an Mattias. 24 Den dey go aks God fo help dem, an tell, “You Da One In Charge, an you know how erybody stay inside. Show us da guy you pick from da two guys, 25 fo him work fo you an tell bout you cuz Judas no stay. Judas wen go awready da place dass fo him.” 26 Den dey pull straw an Mattias win, so he come togedda wit da eleven guys dat Jesus wen sen all ova.
1:1 1:1: Luke 1:1-4 1:4 1:4: Luke 24:49 1:5 1:5: Matt 3:11; Mark 1:8; Luke 3:16; John 1:33 1:8 1:8: Matt 28:19; Mark 16:15; Luke 24:47-48 1:9 1:9: Mark 16:19; Luke 24:50-51 1:13 1:13: Matt 10:2-4; Mark 3:16-19; Luke 6:14-16 1:18 1:18: Matt 27:3-8 1:20 1:20 a: Songs 69:25; Songs 109:8 1:21 1:21 a: Matt 3:16; Mark 1:9; Luke 3:21; Mark 16:19; Luke 24:51