6
Dey Tink If Dey Strong Dey Okay,
But Fo Real Dey Not Okay
1 Amos tell dis too:
“Bummahs, you guys dat no worry bout notting on top Zion hill, Jerusalem town!
An Bummahs, you guys Samaria town dat stay shua notting goin hurt you!
Bummahs! You da leada guys fo yoa countries,
An da Israel ohana peopo go by you guys fo get help!
2 You guys tell yoa peopo,
‘Go da towns da Assyria army guys take ova awready,
Go Kalneh an scope um out,
An go come back by da big town Hamat,
Den go makai side by da Filisha peopo, Gat town.’
You tink you guys land mo betta den dose countries, o wat?
You guys tink dea land mo big den yoas, aah?
No ways!
3 “Bummahs, you guys! You tink goin be long time
Befo bad tings goin happen to you guys!
But da way you guys ack, you ony make shua
Dat da guys dat like bus you up
Goin take ova you mo fas!
4 “Bummahs, you guys!
You lay down on yoa punee all day, dat get fancy kine ivory all ova.
You guys lay down all day an grind da luau food,
From bebe sheeps an cows!
5 You guys pick up da harp fo jam
An make new kine songs—
An you tink, ‘I can make da music
Same same jalike King David!’
6 You guys drink da wine,
Da whole calabash one time!
You guys use da real expensive kine perfume oil.
But no bodda you dat yoa Israel country an da Joseph ohana, litto mo wipe out.
An still yet, you guys make jalike you no kea, an all dat you do no make you guys come sick!
7 “Fo shua, pretty soon now,
Da Assyria army guys goin come drag you guys outa hea.
You guys goin be da firs one.
Den you no can lay dea an grind at da religious luaus fo da odda gods,
Cuz all dat no goin be no mo fo you guys.
8 “Da Boss, Da One In Charge a me, he wen make one strong promise,
An he no need anodda guy fo help him do um, jus him.
Dis wat Da One In Charge tell: ‘Watch out!
Me, I so mad wit dem Israel guys!
Dey tink dea Israel ohana mo betta den anybody!
Dey get strong wall, but I goin go agains um!
Dea main town, an eryting inside dea,
I goin give all a dat
To da guys dat stay agains um.’ ”
Dass wat Da One In Charge tell. An you know wat?! He da God Ova All Da Armies.
9 Dat time, if ony get ten peopo dat stay inside one house, still yet bumbye dey all goin mahke.
10 Az why, wen somebody mahke, one ohana guy goin come take da body outside da house fo burn da body. Dat ohana guy goin go inside da house an yell to whoeva stay inside da back a da house, “Hui! Still yet get odda peopo wit you?”
Den da guy inside da back a da house goin tell, “No mo nobody! Ony me!”
Da ohana guy goin tell, “Eh, no talk! Make shua nobody use Da One In Charge name inside dis place!”
11 Cuz you know wat? Da One In Charge, he da One tell wat gotta happen,
An cuz a dat, da big houses goin come all bus up
An da small houses goin come jalike rubbish.
12 Eh! You tink one horse can run fas ova one pali?
You tink one farma guy can use cows fo plow da ocean watta?
No ways can!
Jalike wen somebody like judge da right way,
Dey no can, cuz you guys jalike make shua how dey judge, come out bad jalike poison!
Wen get somebody dat stay do da right ting,
You guys make shua dey no can do da right ting,
Cuz you guys make eryting come out jalike one bitta taste!
13 Get Israel guys dat feel real good inside
Cuz dea army guys wen take ova Lo-Debar, da no wort notting town!
But dey bulai. Dey tell, “You know wat?
Us guys so strong, us wen take ova Karnaim, da muscle town!”
14 But you know wat Da One In Charge tell, da God Ova All Da Armies? He tell dis:
“Eh, you guys from da Israel ohana!
I goin bring one army from anodda country
Ova hea fo go afta you guys.
Dey goin make you guys suffa plenny, an chase you all da way
From Hamat Pass, north side,
All da way thru da Arabah Valley, south side!”