2
Fo Ony Try Feel Good Erytime,
Dat No Mean Notting Too
1 I wen tink lidis: “Now, I goin try tes dis! I goin see wat make me feel good inside. I goin ony try fo feel good inside.” But I ony find out, dat no make sense too.
2 I tell, “Wen I laugh, az stupid! An wen I feel good inside, wat fo?”
3 I wen try fo feel good from suck um up da wine. I try find out wass goin happen if I do stupid kine stuff. (But same time, I make shua my head show me erytime wass da bestes ting fo do.) I like fo find out wass good fo da peopo do, cuz ony short time dey live hea unda da sky.
4 Den I wen do big projecks fo see wat happen. I build big houses fo me. I plant grape farms fo me.
5 I make gardens an parks fo me, an plant all kine fruit trees inside um.
6 I make big ponds fo me fo give watta fo da trees an make um grow.
7 I wen buy boy an girl slaves, an get odda slaves dat born fo me inside my house. An I own mo cows, sheeps, an goats den anybody befo me inside Jerusalem.
8 I pile up plenny silva an gold stuffs fo me, an I get da rich kine stuffs from odda kings an odda districks. I get guys an wahines fo sing, an plenny wahines fo come my odda wifes—enuff fo make one guy feel real good inside.
9 Fo shua I come mo importan den anybody befo me inside Jerusalem. All dat time I wen know wat fo do erytime.
10 I neva hold back fo get someting I like get.
I neva hold back fo get good fun.
I stay good inside from all da work I do!
Dass da pay I get fo all my work!
11 But wen I look eryting I get, from wat my hands stay do,
An wat I work fo get,
You know wat?!
No make sense all dat—jalike I stay chase da wind!
I no mo notting unda da sun dat goin las!
No Make Sense If You Know
Wat Fo Do Erytime O If You Stupid
12 Den I change my mind. I start fo tink bout wat “fo know wat fo do erytime,” mean, wat “fo ack pupule” mean, an wat “fo ack stupid kine” mean.
You tink da nex king can do someting
Dat dis king neva do awready?!
No ways!
13 Dis wat I wen see:
Az mo betta know wat fo do erytime,
Den stay stupid.
Jalike mo betta light den dark.
14 Da guy dat know wat fo do erytime
Get eyes dat see stuff.
But da stupid guy, jalike he walk in da dark.
But I tink dis too:
Dat da two a dem goin come out same same!
15 Den I tink lidis:
“Me an da stupid guy goin come out same same!
Den wat good I goin get outa dat, dat goin las long time,
Jus cuz I know wat fo do erytime?”
Den I tell,
“Dis no make sense too.”
16 No mo nobody goin rememba da guy dat know wat fo do erytime,
An same ting fo da stupid guy.
Bumbye, erybody goin foget da two a dem.
Jalike da stupid guy an da guy dat know wat fo do erytime goin mahke too!
Work No Mean Notting
17 Az why I tink, “Poho, dis life!” Cuz da stuff peopo do unda da sun, bodda me plenny! No mo notting make sense. Jalike us chase da wind!
18 I tink, “Poho, eryting I wen work fo unda da sun. Cuz I gotta leave um fo da guy dat goin come afta me.
19 An who goin know if dat guy know wat fo do erytime, o if he one stupid kine guy? All dis no matta fo shua cuz da guy goin stay in charge a all da tings dat I work real hard fo, an all da tings I learn how fo do unda da sun.” Dis no make sense too.
20 So I come all bum out cuz I tink bout da hard work I wen do unda da sun.
21 Cuz if somebody do dea work an know wat fo do erytime, an know plenny, an know how fo do stuff real good, den dey gotta leave all da stuff dey own fo somebody dat neva work fo get um. Dis no make sense too. An come out bad too.
22 Wat get fo all da work an worry dat somebody do unda da sun?
23 Ery day gotta work an suffa an stay sad inside, an even nite time my head get plenny stuff fo tink bout an no can res. Dis no make sense too.
24 So den, da bestes ting fo do, go eat, go drink, an stay good inside bout hard work! No mo notting mo betta. I see dass jalike one present from God too.
25 Cuz no mo nobody eat o stay good inside if God no help um.
26 If somebody do stuff dat make God stay good inside, God goin make dem know wat fo do erytime, know plenny, an stay good inside. But fo da guy dat do bad kine stuff, God give um da job fo ony stack up plenny stuffs, fo dem give um to some odda guy dat make God stay good inside. Dis no make sense too. Dey ony stay chase da wind.