8
Da Peopo Dat Come Back From Babylon Wit Ezra
Dis da ohana names dey wen write down, fo da ohana leada guys dat come back wit me from Babylon. Dat time, Artaxerxes was da king.
From da Finehas ohana dat come from Aaron grankid: Gershom.
From da Itamar ohana: Daniel.
From da David ohana: Hattush Shekanaiah boy.
From da Parosh ohana: Zekariah, an dey write down 150 odda guys too from dat ohana.
From da Pahat-Moab ohana: Elihoenai Zerahaiah boy, wit 200 odda guys.
From da Zattu ohana: Shekanaiah Jahaziel boy, wit 300 odda guys.
From da Adin ohana: Eben Jonathan boy, wit 50 odda guys.
From da Elam ohana: Isaiah Atalaiah boy, wit 70 odda guys.
From da Shefataiah ohana: Zebadiah Michael boy, wit 80 odda guys.
From da Joab ohana: Obadiah Jehiel boy, wit 218 odda guys.
10 From da Bani ohana: Shelomit Josifiah boy, wit 160 odda guys.
11 From da Bebai ohana: Zekariah Bebai boy, wit 28 odda guys.
12 From da Azgad ohana: Johanan Hakkatan boy, wit 110 odda guys.
13 From da Adonikam ohana: Elifelet, Jeiel, Shemaiah, wit 60 odda guys. (Dey no come wit da oddas, dey come afta.)
14 From da Bigvai ohana: Utai an Zabud, wit 70 odda guys.
All dese, dey da guys wen come back wit me.
Ezra Guys Make Ready Fo Go
15 Befo we go, I wen tell erybody fo come togedda by da Ahava Watta Ditch. All us guys make camp dea three days. I check da names fo da pries guys an fo da regula peopo. I find out dat no mo nobody goin go from da pries helpa guys from da Levi ohana! 16 So I sen peopo fo tell da leada guys Eliezer, Ariel, Shemaiah, Elnatan, Jarib, da odda Elnatan guy, Nathan, Zekariah, an Meshullam fo meet wit me. I sen odda guys fo tell Joiarib an anodda Elnatan guy fo come too cuz dey know wat fo do erytime. 17 Den I tell all dose guys fo go by Iddo, da leada fo da Levi ohana peopo Kasifia town, an talk to Iddo an his ohana peopo an da guys from Kasifia side dat suppose to work inside da Temple. Dey suppose to aks Iddo guys fo sen us some Levi guys fo work inside da Temple Fo Oua God, Jerusalem side.
18 Oua God, he like do good tings fo us, an help us plenny. Dass why dey sen us one guy Sherebaiah, wit his braddahs an dea boys, all togedda 18 guys. Sherebaiah guys, dey da kine guys dat undastan plenny stuff. Sherebiah come from Mahli, an Mahli come from Levi, Israel boy. 19 Dey sen anodda guy Hashabiah, an Jeshaiah dat come from Merari, wit his braddahs an dea boys, all a dem 20 guys. 20 Dey sen 220 guys fo work inside da Temple too. (Befo time, King David an his govmen guys wen give da Temple worka guys da kuleana fo help da Levi guys.) Dey write down all dea names.
Dey Pray Befo Dey Go
21 By da Ahava Watta Ditch, I tell erybody fo skip food wen dey pray, an fo come togedda in front God an show dat us need him plenny. We aks God fo take us to Jerusalem, fo watch us fo nobody get hurt—us guys, oua kids, an all da stuffs we stay take wit us. 22 I shame aks da King fo sen army guys an horse rida guys fo go wit us an make shua nobody come agains us guys wen we stay go. Cuz us guys wen tell da King befo time, “Oua God, he stay take kea all da peopo dat stay pray to him, but he stay real huhu agains all da peopo dat stay ack jalike he notting.” 23 Dass why us guys skip food fo us pray. We aks God plenny fo take kea us guys. An he lissen an he take kea us.
Ezra Pick Pries Guys
Fo Take Kea Da Temple Stuffs
24 Den I pick twelve a da main pries guys: Sherebaiah, Hashabiah, an ten odda leada guys from da prieses. 25 I make dem in charge a da Temple kine stuffs, da silva, da gold, da gold bowls. Had plenny odda stuffs dat da king an his leada guys, an da Israel peopo dat was dea, wen give us guys fo put inside da Temple Fo God. 26 Wen I give dem all da stuffs dat cost plenny dat we goin take, I weigh eryting. Dis how much eryting weigh:
Silva, 24 ton.
Tings made wit silva, 7,500 poun.
Gold, 7,500 poun.
27 Gold bowl, 20, dat cost 1,000 piece gold money from Persia.
Tings dey make wit da bestes kine bronze metal, shiny kine jalike one mirror, cost plenny jalike dey was gold.
28 I tell da pries leada guys: “You guys stay real spesho fo Da One In Charge now. Same ting wit all dese tings fo da Temple, dey spesho fo Da One In Charge too. All dis silva an gold kine stuff, da peopo wen bring um to Da One In Charge cuz dey like fo do dat. He da God dat oua ancesta guys wen pray to. 29 Take good kea a all dis tings. Wen you come Jerusalem, go check how much dey weigh fo make shua you neva lose notting. Weigh eryting in front da main pries guys, da Levi ohana guys, an da leadas fo da Israel ohanas, right dea by da storage places fo da Temple Fo Da One In Charge, ova dea inside Jerusalem.”
30 Afta dey weigh eryting, da pries guys an da Levi ohana guys take all da silva an gold kine stuff fo put um inside da Temple Fo God inside Jerusalem.
Ezra Guys Go Jerusalem Togedda
31 April 19, us leave oua camp nex to da Ahava Watta Ditch fo go Jerusalem. Da God us guys stay pray to like do good tings fo us an help us plenny. Az why God wen take kea us guys all da way dea. Da peopo dat like go agains us guys an da guys dat like jump us, he no let dem hurt us. 32 Den we reach Jerusalem an res dea three day.
Dey Give Da Stuffs Fo Da Jerusalem Temple To Da Prieses
33 Da day numba four afta we come Jerusalem, we go da Temple Fo Oua God. Ova dea we weigh da silva metal an da gold metal an all da bowls an odda tings. We give eryting to Meremot Uriah boy, da pries guy, an to Eleazar Finehas boy. Two a da Levi ohana guys, Jozabad Jeshua boy an Noadaiah Binnui boy. Dey wen check um too. 34 Dey wen count eryting an weigh eryting fo make shua us guys no lose notting. Right den an dea, dey write da Temple record, dat tell how much da whole ting weigh.
35 Den, all da peopo dat come back from Babylon bring animals fo make one sacrifice. Dey make da kine sacrifice dat you burn up eryting fo da God Fo Da Israel Peopo—12 bulls fo all da Israel peopo, 96 boy kine sheeps, 77 bebe sheeps. Dey kill 12 boy kine goats fo hemo da shame fo da bad kine tings dey wen do. All da sacrifices, dey burn um all up. 36 Den dey take da lettas from da King dat tell da govmen guys wat dey gotta do. Dey give da lettas to da King helpa guys, an da territorial govna guys fo da West Eufrates Side. Da govmen peopo wen do plenny kine stuff fo help da peopo, an fo build da Temple Fo God.