20
Da Ten Main Rules
Den God tell all dis:
Rule Numba One
“Dis me, Da One In Charge, yoa God, dat stay talk. Was me wen get you guys outa da Egypt land, wea you guys was slaves. You no go take odda gods fo you, cuz me, I da ony God fo you.
Rule Numba Two
“No make idol kine gods fo you dat look jalike someting from up dea inside da sky, o from down hea on top da earth, o from inside da watta dat stay undaneat da groun. No go down in front da odda gods fo show um love an respeck, an no work fo dem. Cuz I yoa God, az me, Da One In Charge! An if you go down in front da odda gods, I one jealous God! Az why I goin punish da peopo dat do bad kine tings an da ones dat hate me. An if dea kids do da same ting, I punish dem too, an same ting wit dea grankids, an even dea great-grankids. But wen peopo show me love an aloha an do wat I tell um fo do, I stay tight wit dem, an dea kids, an dea grankids fo tousan generation!
Rule Numba Three
“No go use my name an ack jalike dat give you da right fo do any kine stuff. Cuz me Da One In Charge, an anybody use my name fo do any kine stuff, no way I goin let dem go an no punish um.
Rule Numba Four
(Matthew 5:21, 27, 43; 15:4; 19:18-19; Mark 7:10; 10:19; Luke 18:20; Jesus Guys 4:24; 14:15; Rome 7:7; 13:9; Efesus 6:2-3; James 2:11; Jesus Show 10:6; 14:7)
“No foget da Res Day. Make shua da Res Day stay spesho fo me. Work six days an do eryting you gotta do. 10 But da Numba Seven Day, dass da Res Day. Stay spesho fo me, yoa God, Da One In Charge. Dat day, no do work notting—you, yoa boy, yoa girl, yoa slave guy, yoa slave wahine, yoa animals, da visita guy from anodda place dat stay yoa town, erybody! 11  Me, Da One In Charge, I wen work six days fo make da sky an da earth an da ocean, an all da tings inside dem. But da Numba Seven Day, I res. Dass why I tell da Res Day good, an I make um spesho fo me.
Rule Numba Five
12  “Show respeck fo yoa faddah an yoa muddah. If you do dat, den you goin live long time on top da land dat me, yoa God, Da One In Charge, stay give you.
Rule Numba Six
13  “No go murda nobody.
Rule Numba Seven
14  “No go fool aroun wit anodda guy o wahine behind yoa husban o wife back.
Rule Numba Eight
15  “No go steal notting.
Rule Numba Nine
16  “Wen you gotta tell someting in front one judge fo show proof wat anodda guy wen do, no bulai.
Rule Numba Ten
17  “No go tink, ‘I like take da odda guy stuffs, an I goin take um!’ Dat mean, no go afta his wife, o his slave guy, o his slave wahine, o his cow, o his donkey, o wateva kine ting da odda guy get.”
Da Peopo No Can Handle Fo God Talk To Dem
18  All da peopo hear da thunda an see da lightning. Dey all hear da sheep horn trumpet an see da smoke all ova da mountain. Da peopo, dey stay sked an shaking. Dey go stan back far away from da mountain. 19 Dey tell Moses, “Mo betta you da one talk to us, not God. We goin lissen. But mo betta God no talk to us, cuz bumbye us goin mahke!”
20 Moses tell da peopo, “No sked! You guys know how come God come hea? He stay hea fo put presha on you guys fo you learn someting! An he like you guys no foget how you feel wen you stay sked a him, cuz if you get awesome respeck, bumbye you no goin go do someting bad.” 21 Da peopo stay far away from dea. But Moses, he go strait ova dea, nea da dark cloud wea God stay.
Da Rules Fo Da Altar
22 Den Da One In Charge tell Moses fo tell da Israel peopo dis: “You guys see awready, dat I talk to you guys from outa da sky. 23 Dass why you guys betta not make idol kine gods outa silva o gold fo you pray to dem jalike you pray to me. 24 Dis how you gotta do fo me: Pile up dirt fo make one altar fo me. On top da altar, kill sheeps an goats an cows fo make sacrifice—da kine wea you burn up da whole animal afta you kill um, an da kine you make fo show dat you an me stay tight togedda. Den ery place I goin tell you guys fo come, fo tink bout who me an talk bout me, I goin come by you dea an do good tings fo you. 25  If you guys like pile up rocks fo make one altar fo me, no cut da rocks, cuz if you use one tool fo cut da rocks, den no goin be spesho fo me. 26 No make one big altar fo me wit steps fo go up, cuz no good you let somebody see yoa olos unda yoa robe wen you go up dea.”
20:4 20:4: Outa 34:17; Pries 19:4; 26:1; Rules2 4:15-18; 27:15 20:5 20:5: Outa 34:6-7; Census 14:18; Rules2 7:9-10 20:7 20:7: Pries 19:12 20:8 20:8: Outa 16:23-30; 31:12-14 20:9 20:9: Outa 23:12; 31:15; 34:21; 35:2; Pries 23:3 20:11 20:11: Start 2:1-3; Outa 31:17 20:12 20:12 a: Rules2 27:16; Matt 15:4; 19:19; Mark 7:10; 10:19; Luke 18:20; Efes 6:2; Efes 6:3 20:13 20:13: Start 9:6; Pries 24:17; Matt 5:21; 19:18; Mark 10:19; Luke 18:20; Rome 13:9; James 2:11 20:14 20:14: Pries 20:10; Matt 5:27; 19:18; Mark 10:19; Luke 18:20; Rome 13:9; James 2:11 20:15 20:15: Pries 19:11; Matt 19:18; Mark 10:19; Luke 18:20; Rome 13:9 20:16 20:16: Outa 23:1; Matt 19:18; Mark 10:19; Luke 18:20 20:17 20:17: Rome 7:7; 13:9 20:18 20:18: Heb 12:18-19 20:25 20:25: Rules2 27:5-7; Josh 8:31