5
Weneva dey pick one guy from da Jew guys fo come be da Main Pries Guy, dat guy get da job fo help da peopo do da kine stuffs da peopo gotta do fo God. Dis Main Pries Guy, he give dea gifs to God, an he make sacrifices fo da bad kine stuff dey wen do. Dis kine guy goin make nice to da peopo dat stay jam up cuz dey donno wat dey suppose to do. Da Main Pries Guy, he same same jalike da peopo, he not strong too. Dass why he make nice to dem. An dass why he gotta make one sacrifice fo him jalike fo da peopo, cuz he do bad kine stuff jalike dem.
You know, dat Main Pries Guy, he get plenny respeck. But he no can come da Main Pries Guy jus cuz he like. Az cuz dass one spesho job. God gotta be da One fo pick da guy, jalike da firs time he pick Aaron.
Same ting fo Christ, da Spesho Guy God Wen Sen. He neva make um fo him stay awesome fo come da Main Pries Guy. But was God dat make um come awesome. God tell um,
“Today I tell
Dat you my Boy!”
An get anodda place inside da Bible dat God talk lidis:
“You goin stay one pries foeva,
Da Melkizedek kine pries.”
Wen Jesus stay hea inside da world, he pray real hard, an he cry real loud, cuz he know dat God can take him outa dea fo him no gotta mahke. An God lissen him, cuz Christ all da time show him respeck, an ony do wat God tell um fo do. No matta Christ God Boy, wat he wen suffa teach him fo lissen God. Christ wen come perfeck, an now he da One dat take all da peopo dat lissen him outa da bad kine stuff dey stay do. An he help um stay perfeck lidat foeva. 10 Az why God make Jesus da Main Pries Guy, jalike da Melkizedek kine pries.
Watch Out! No Go Da Wrong Way!
11 Get plenny mo stuffs we like tell bout all dis, Christ an da Melkizedek guy. But not easy fo tell um cuz you guys no can undastan real good. 12  You know, time awready fo you guys come teachas. But you guys still yet need somebody fo teach you guys one mo time da easy kine stuffs bout wat God tell. You guys jalike bebes dat need milk, cuz you guys no can handle da solid stuff still yet. 13 Wat dat mean, “bebes dat ony breas feed”? Anybody dat donno da right tings fo do, dey jalike one small bebe. 14 An wat dat mean, “handle da solid stuff”? Dat kine stuff fo da grown up kine peopo. Dey jalike da ones dat work out all da time fo come mo strong. Dey do good kine stuff erytime an no do bad kine stuff. Dass how dey know how fo figga wass good an wass no good.
5:3 5:3: Pries 9:7 5:4 5:4: Outa 28:1 5:5 5:5: Songs 2:7 5:6 5:6: Songs 110:4 5:7 5:7: Matt 26:36-46; Mark 14:32-42; Luke 22:39-46 5:12 5:12: 1Cor 3:2