12
1 Da Israel peopo, dey ack jalike da wind stay dea food.
All day dey chase da east wind.
Dey bulai mo an moa, an dey beef mo an moa.
Dey make one deal wit da Assyria peopo.
Den dey sen olive oil Egypt side.
2 Da One In Charge goin poin finga da Judah ohana leada guys.
He goin punish da Jacob peopo fo da kine stuff dey do.
He goin pay dem back fo wat dey wen do.
3 Wen Jacob wen stay inside his muddah,
He grab his braddah heel.
An wen he grow up, he wresso wit God.
4 Jacob wen wresso wit one angel guy an win!
Den he cry an beg da angel fo do someting good fo him.
Laytas, Jacob find God Bethel side.
An talk wit him ova dea.
5 Da One In Charge, he da God Ova All Da Armies.
Da One In Charge, nobody foget who him!
6 You guys, gotta go back by yoa God.
Stay tight wit him, an do da right kine tings.
Erytime trus yoa God an wait fo him.
7 Da biznis guys use scales dat bulai.
Dey like scam peopo real bad an hurt um.
8 Az why da Israel peopo talk big. Dey tell,
“Fo shua, I rich!
But fo all da tings I wen get from my work,
No can find notting bad dat I wen do!”
9 Da One In Charge tell, “Me, Da One In Charge, yoa God.
I wen bring yoa ancesta guys outa Egypt.
Bumbye I goin make you guys live inside tents one mo time,
Jalike wen yoa ancesta guys make da spesho religious ceremony,
Da one Fo Live In Shacks.
10 I wen talk to da guys dat talk fo me.
Fo tell you guys take kea.
I make dem dream plenny stuff.
I show um how fo tell stories fo teach fo me.”
11 You guys tink da Gilead peopo do real bad kine stuff?
Eh, da peopo ova dea, dey no worth notting!
Da Gilgal peopo wase time wen dey kill bulls fo make sacrifice.
Dea altars look jalike stones dey pile up
All aroun one field dey wen plow.
12 Jacob wen run away to da Aram land.
He work ova dea fo get one wife.
He take kea dea sheeps fo pay fo her.
13 But wen Da One In Charge bring da peopo dat come from Jacob outa Egypt,
He sen one guy Moses dat talk fo him,
An dass how he wen take kea all a dem.
14 But da Efraim peopo, dey make Da One In Charge come real piss off wit dem.
Da One In Charge put da blame on all dem
Cuz dey make peopo bleed an mahke.
He goin pay dem back
Cuz dey talk bad to him.