4
Da One In Charge
Poin Finga Da Israel Peopo
1 You Israel peopo, lissen wat Da One In Charge tell. Cuz he stay poin finga at da guys dat live inside da land. He tell:
“No can trus dem guys!
Cuz dey no stay tight wit me!
No mo nobody inside da land know me, God!
2 Dose guys put kahuna on top each odda.
Dey bulai each odda an murda each odda.
An dey rip off peopo.
Dey fool aroun behind dea wife o husban back.
Dey bus up peopo an kill um one afta anodda.
3 Cuz a dat, all da peopo stay sad inside.
Eryting dat live inside da land goin come dry up—
Da wild animals inside da boonies,
Da birds inside da sky,
An da fish inside da watta, dey all goin mahke.
4 “Fo shua no good somebody poin finga.
No good somebody tell anodda guy he da one get da blame fo someting,
Yoa pries guys, dey da ones I stay talking about,
Cuz yoa peopo jalike da kine peopo
Dat even poin finga one pries guy.
5 You guys trip an fall down day time.
An nite time, da guys dat talk fo God trip an fall down jalike you guys.
Az why I goin wipe out da Israel nation
Dass jalike yoa muddah!
6 My peopo stay coming wipe out
Cuz dey donno me.
An cuz you pries guys no like know me,
Az why I no like let you guys be my pries guys.
You guys foget da teaching
Dat come from me, yoa God, Da One In Charge,
Az why I goin foget yoa kids.
7 Wen get mo plenny pries guys,
Dey ony do mo plenny bad kine stuff agains me.
Dey trade dea awesome kuleana fo shame kine stuff.
8 “Wen da peopo do bad tings,
Dey go bring animals fo sacrifice.
Ony den, da pries guys get plenny fo eat.
So fo dem, az good wen peopo do wass wrong!
9 Same same, wat goin happen
To da peopo an to da pries guys?!
I goin punish all a dem
An pay dem back fo da bad kine stuff dey wen do!
10 Dey all goin eat, but dey no goin get enuff.
Dey goin fool aroun, but dat no goin give um mo kids.
Az cuz dey wen bag from me, Da One In Charge,
Fo go fool aroun
11-12 wit odda gods.
“Dey drink da ol wine an da new wine.
Az why my peopo no undastan notting.
My peopo aks da idol kine gods dey make from wood
Bout wass good fo dem do!
Dey tink one stick can tell um
Wat goin happen bumbye!
Inside, dey ony like fool aroun wit odda gods.
Dat make um no lissen me, dea God fo real kine.
13 Dey make sacrifice on top da mountains.
Dey burn incense on top da hills,
Unda da oak tree, da poplar tree, an da terebint tree,
Dey do um wea get good shade.
“Az how come yoa girls come hoaz,
An az why yoa daughtah-in-laws go fool aroun
Behind dea husban back.
14 I no goin punish yoa girls
Wen dey fool aroun fo money,
O yoa daughtah-in-laws
Wen dey fool aroun behind dea husban back.
Cuz dea guys do da same ting,
Dey fool aroun da hoaz too,
An make sacrifice wit da hoaz
Dat fool aroun inside da temple
Fo da idol kine gods.
Da peopo no undastan.
Az why dey goin come all wipe out!
15 “No matta you Israel peopo fool aroun lidat,
I no like fo da Judah peopo make lidat an get da blame.
No go Gilgal fo pray to dea fake gods!
No go Bet-Aven fo pray to dea fake gods!
An no make one promise an tell,
‘Fo shua Da One In Charge stay alive,
An he goin punish me if I no do um!’
16 Da Israel peopo, dey hard head.
Jalike one young hard head girl cow.
So den, how Da One In Charge goin lead da Israel peopo
To one big grass field, jalike dey bebe sheeps?! No can!
17 Da Efraim peopo stay fool aroun da idol kine gods.
Let um stay lidat!
18 Even wen dey no mo booze, dey still stay fool aroun.
Dea leadas ony like make shame fo real kine.
19 One whirlwind goin blow dem away.
Wen dey make dea sacrifices to da idols, dey goin come shame cuz a dat.”