24
Da One In Charge
Goin Wipe Out Da Earth
(Luke 21:34-35)
1 Da One In Charge, he stay ready fo wipe out da whole world
An make um come empty!
He goin change da mountains an valleys
An all da peopo goin go all ova da place.
2 Goin be same same fo all a dem,
Da pries guys an da regula peopo,
Da slave guys an da boss guys,
Da worka girl an da lady she work fo,
Da guy dat buy stuff an da guy dat sell stuff,
Da guy dat lend stuff an da guy dat borrow,
Da loan shark guys an da guys dey wen lend um.
3 All ova da world, no goin get notting dea,
Jalike somebody wen go rip off eryting!
Dis wat Da One In Charge tell.
4 Da world, jalike stay sad inside, an all dry up.
Ery place peopo live, jalike dey stay tired, an all dry up.
Da big name peopo, jalike dey all tired too.
5 Da whole world,
Jalike stay pilau awready
Cuz a da peopo dat live dea.
Az cuz dey no do da stuff God wen teach um,
An broke da Rules—
Da deal God wen make wit dem foeva.
6 Dass why God put kahuna on top da world
Fo burn up eryting dea.
All da peopo dat live dea,
Dey gotta suffa cuz dey wen do wrong.
Dass why, from da ones dat live on top da earth,
Ony litto bit peopo stay now.
7 Da grape plant no grow nice,
Da juice from da grape fo make wine, look funny kine.
Da kine peopo dat like party an feel good,
Dey stay moan.
8 Good fun, da tammorine, but now no mo noise.
Da noise from da party guys, all gone.
Good fun, da harp, but dat stay pau too.
9 Nobody drink wine an sing no moa.
Wen dey drink beer, taste bad.
10 Da big town stay all bus up,
No mo notting inside dea.
All da door fo ery house stay shut
Fo nobody come inside.
11 Da peopo stay yell on da street,
Cuz no mo notting fo drink.
Befo time dey dance an sing plenny,
But all dat pau,
Jalike wen da sun go down an eryting come dark.
Eryting dat wen make da peopo dance an sing,
Da army guys wen take um to dea country.
12 Inside da big town, eryting stay bus up
An ony get rubbish dea.
Even da town gate stay all smash.
13 An dass how goin be,
Right dea inside da middo a da land,
Wit odda peopos all aroun dea.
Ony litto bit peopo goin stay,
Jalike wen dey wack da olive tree wit sticks
Till ony litto bit olive stay on top,
An jalike wen dey harves da grapes
An leave litto bit grape
Fo da pooa peopo dat no mo notting.
14 Bumbye, da peopo dat still stay inside da land,
Dey goin yell plenny an sing
Cuz dey stay feel good inside.
From da west side nea da big sea,
Da peopo goin yell
Bout how awesome Da One In Charge stay.
15 Dass why you peopo dat live east side
Wea da sun come up,
Make shua da peopo dea show respeck fo Da One In Charge!
An you guys dat live dea on top da islans,
Make shua da peopo dea know wat kine god Da One In Charge,
Da God fo us Israel peopo!
16 From da mos far places on top da earth
We hear peopo sing,
“Da peopo dat do da right ting erytime,
Dey look real good!”
But me, I tell dis:
“Bummahs! Jalike I stay come wipe out!
Cuz get peopo, I no trus dem.
Dey tell, dey stay my side.
But wen I wen trus dem,
Dey trick me.
17 “You peopo dat live on top da earth,
You goin come real sked an shaking,
Jalike you fall inside one deep hole,
An somebody catch you in dea trap!
18 Anybody run away from some skery kine noise,
Dey goin fall down inside da deep hole.
Anybody climb outa da deep hole,
Somebody goin catch dem in da trap.
“Az goin be jalike da time
Da sky wen open fo let da watta come down,
An undaneat da earth, da foundation stay shake!
19 “Da earth stay all bus up.
Da earth stay all crack.
Da earth stay shake plenny.
20 Da earth move dis way an dat way
Jalike one guy dat drink plenny
An jalike one shack ready fo fall down.
Da peopo all ova da world stay go agains God,
Dass someting real bad fo dem
Dat make um fall down,
An dey no can get up no moa.
21 “Dat time, Da One In Charge goin punish
All da bad angel army guys inside da sky dat get powa dea.
An da kings on top da earth dat get powa dea.
22 He goin bring dem togedda
An put um inside one prison,
Jalike dey prisonas all tie up inside one hole.
He goin lock um up dea, jalike inside one prison.
Afta long time, den he goin punish dem.
23 “Den da bright moon no need shine
Cuz no need da light.
An da hot sun no need shine
Cuz no need um fo stay warm.
Az cuz dat time,
Da One In Charge,
Da God Ova All Da Armies,
He goin be da king
On top Zion hill wea da Temple stay
Inside Jerusalem town.
In front da older guys dat lead his peopo
He goin show how awesome he stay.”