27
God Goin Get Da Israel Peopo
Outa Trouble
(Rome 11:26-27)
1 Dat time, Da One In Charge goin go afta
Da peopos dat donno him fo punish dem.
He goin ack mean to dem,
Cuz he get mo powa den dem,
An can wipe um out,
Jalike fo go afta da sea monsta Leviatan,
Dat move an turn jalike one snake fo run away,
Da One In Charge,
He goin kill da sea monsta.
He goin wack um wit his sword,
Da real big an strong sword.
2 Dat time, all you guys, sing!
Sing bout da grape farm
Dat give plenny fruit,
An make peopo stay feel good inside
Wen dey go dea.
3 Da One In Charge tell, “Me, Da One In Charge, I da One
Stay take kea my peopo,
Jalike da guy dat stay watch da grape plants
An give um watta all da time.
I take kea my peopo, day time an nite time,
Fo make shua nobody jam um up.
4 I no stay huhu wit my peopo no moa.
If get peopo dat ack jalike
Thorns an stickas
Dat come up inside one grape farm,
I goin attack um an burn um all up!
5 But even da thorn an sticka kine peopo,
Dey can come tight wit me
An let me take kea dem too.
Dass how dey no need fight wit me no moa,
Cuz eryting goin come good wit me an dem.”
6 Bumbye, da Jacob ohana
(Dass da Israel peopo),
Dey goin come importan.
Dey goin come plenny peopo,
Jalike one plant dat get one root fo grow,
Den get bud an flowa,
An fill up da whole world
Wit plenny fruit.
7 Da time Da One In Charge wen bus up da Israel peopo,
You tink he wack um mo hard,
Den wen he bus up da odda peopo
Dat wen bus up da Israel peopo?
No way!
Da time he wen wipe out da Israel peopo,
You tink he wipe um out mo plenny,
Den wen he wipe out da odda peopo
Dat wen wipe out dem?
Not even!
8 God, presha da Israel peopo,
But ony litto bit, wen you make dem go way from dea land.
You make da Israel peopo go away
Jalike wit one strong wind from da east side.
9 Dass wat God goin do fo pay da price,
Fo hemo da shame fo da Jacob ohana.
Dass wat goin happen
Wen God throw out all da bad kine stuff dey wen do.
Den, God goin make all da stones
Inside da altars fo da odda gods
Come jalike chalk wen somebody smash um.
Da poses wea dey pray to da wahine god Asherah
An da altars wea dey burn da incense fo da odda gods,
Dey no goin stan dea no moa.
10 Da big town dat get strong wall
Wea nobody can come inside,
Nobody stay dea.
Jalike da boonies, ony da cows stay dea.
Da peopo, all gone awready.
Get small cows stay eat grass dea.
Dey eat all da stuff from da tree branches.
Den dey lay down ova dea.
11 Da Israel peopo, dey jalike small branches
From da trees dat come dry an dey broke.
Da wahines come pick um up fo make fire.
Az cuz da Israel peopo, dey not da kine peopo
Dat undastan stuff,
Dass why God dat wen make dem
No feel pity fo dem.
He no like do notting fo dem.
12 Dat time, Da One In Charge goin pick his peopo
Jalike wen peopo wack da wheat o barley dey wen harves
Fo get da good wheat one side an da junks da odda side.
He goin take you Israel peopo, one by one,
An bring you togedda, Jerusalem side,
Even from da big Eufrates Riva
An from da stream dass da borda fo da Egypt land.
13 Dat time, one big sheep horn trumpet goin blow.
Da Israel peopo dat stay go all ova da place inside Assyria
An da ones dey wen make go Egypt side,
Dey all goin go God spesho hill inside Jerusalem town,
An go down in front Da One In Charge
Fo show love an respeck fo him ova dea.