3
Da One In Charge, Da Boss,
Him Da Judge Fo Da Judah Peopo
1 Den Isaiah tell,
“Look! Da Boss, Da One In Charge,
Da God Ova All Da Armies,
He goin take away all da stuff
From da peopo inside Jerusalem an Judah,
All da stuff dey need fo take kea dem,
All da food fo eat an da watta fo drink.
2 He goin wipe out all da real spesho army guys an da regula army guys,
All da judges an da guys dat talk fo God,
All da guys dat can tell wass goin happen bumbye,
All da older leadas,
3 All da army captains,
All da odda kine importan peopo,
All da akamai guys dat tell da peopo wat fo do,
All da guys dat get da smarts fo make real nice tings wit dea hands,
An all da guys dat undastan how fo make magic.
4 He goin take young guys an make dem dea leadas.
Guys dat stay make any kine, dey goin take charge a da peopo.
5 Da peopo goin give each odda hard time,
Fren agains fren.
Da young guys goin make any kine to da ol guys
Jalike dey own dem an dey hate dem.
Da guys dat erybody get respeck fo,
Da no good guys goin bus um up.
6 “One guy goin grab one a his braddahs
From inside dea faddah house
An tell, ‘Come on, you get one robe,
So you be oua leada,
You take kea all dis trouble!’
7 But dat time, da braddah goin yell,
‘I no can help!
I no mo food an clotheses inside my house.
No make me da leada fo all dis peopo.’ ”
8 You know, da peopo inside Jerusalem,
Jalike dey no can walk strait.
Da peopo inside Judah,
Jalike dey stay fall down too.
Cuz wit wat dey tell,
An wit wat dey do,
Dey talk bad bout Da One In Charge
An go agains him.
Dey tink he no good, no matta he awesome.
9 Da way dea face look,
Show dey no stay do da right kine ting.
Dey talk big bout da bad kine stuff dey do,
Jalike da peopo inside Sodom.
Dey no try hide wat dey do.
Bummahs! Dey da ones dat bring da horraz on top dem.
10 Tell da guys dat do da right kine stuff,
Dat eryting goin come out good fo dem.
Cuz dey goin get wat dey work fo,
Wit da good kine stuff dey make.
11 Bummahs! fo da guys dat do bad kine stuff,
Cuz eryting goin come out bad fo dem!
Jalike wat dey do,
Dass wat dey goin get.
12 Da ones dat give my peopo presha,
Dey stay ack jalike dey young kids.
My peopo get wahines in charge a dem.
Lissen, my peopo,
Da ones dat tell you guys wea fo go,
Dey stay take you guys da wrong way.
Dey stay jam up you guys plenny,
So you donno wea da right way fo go.
13 But Da One In Charge, he go in front da court fo make argue.
He stan up fo judge da peopo.
14 Da One In Charge da One goin judge da older leadas
An da odda ones dat stay lead his peopo.
He tell dem, “You, jalike da guys
Dat wen bus up my grape fields.
All da stuff you guys wen rip off
From da peopo dat no mo notting,
All dat stuff you guys take um
Inside yoa houses.
15 Wat you guys tink
Wen you go smash my peopo, aah?!
Da peopo dat no mo notting,
How come you go rub dea face inside da dirt, aah?!”
Da One In Charge, Da God Ova All Da Armies,
Dass wat he tell.
Da One In Charge Talk
To Da Wahines Inside Jerusalem
16 Anodda time, Da One In Charge tell dis:
“Cuz da wahines inside Jerusalem,
Dey ack high makamaka,
Dey walk an hold up dea neck sexy kine.
Dey check out guys wit dea eye.
Dey walk jalike dey fashion models.
Dey wear jangly kine jewel on top dea feets an ankles.
17 I goin put sore all ova dea head.
I goin make all da Jerusalem wahines come bolohead.”
18 Den Isaiah tell,
“Dat time, my Boss goin grab
All da fancy kine stuff dey get
An throw um away,
All da jangly kine jewel on top dea feets an ankles
An da bands fo put aroun dea heads,
An dea moon kine necklaces,
19 An dea earrings an bracelets,
An da nice kine cloth fo cova dea face,
20 Da crowns on top dea head,
An da nice kine chain fo dea ankle,
An da fancy kine cloth fo tie aroun dea wais,
Da perfume bottles,
Da jewel fo make da bad kine spirits go way,
21 An da rings fo dea fingas an dea nose,
22 Da fancy kine clotheses, coats, da purses,
23 Da mirrors, da linen undawears,
Da fancy kine cloth on top dea head, an da shawls.
24 “Now dey get perfume,
But den dey goin smell haunas.
Now dey get one fancy kine cloth aroun da wais,
But layta dey goin get ony one rope.
Now dey get nice style hair,
But den dey goin come bolohead.
Now dey get fancy kine clotheses,
But den dey get ony burmbag clotheses.
Now dey nice looking,
But den dey get burn scar all ova dem.
25 “Yoa army guys, dey goin mahke from da sword wen dey fight.
Even yoa real strong guys goin mahke in da war.
26 Inside da gates a Jerusalem town,
Da wahines goin sit down on top da groun,
An cry an stay sad inside cuz no mo dea guys.”