31
Bummahs! Fo Da Peopo Dat Trus Egypt
1 Bummahs! fo da peopo dat tink
Da Egypt peopo goin help um erytime!
Dey stay shua dey goin come okay
If dey buy plenny horse dea.
Dey trus da Egypt war wagons cuz dey get plenny,
An plenny guys fo ride horse.
But dey no go by Da One In Charge,
Da Good an Spesho One fo da Israel peopo.
Dey no aks him wat fo do!
2 But no matta wat dose guys tink,
Da One In Charge know wat fo do erytime,
An he can make bad tings happen too.
Wen Da One In Charge tell someting,
He no need change his mind bumbye.
He goin go agains da ohanas dat do bad kine stuff.
An agains da peopo dat help dem.
3 Still yet, da Egypt guys, dey ony peopo.
Dey not God.
Dea horses, dey ony animals,
Dey not spirits.
Wen Da One In Charge put up his hand fo bus um up,
Da guys dat help dem,
Jalike dey goin trip.
An da guys dey help,
Jalike dey goin fall down.
All a dem goin come wipe out togedda.
4 Dis da ting Da One In Charge tell me:
“Jalike how da lion make noise
Wen he catch one sheep,
An jalike peopo call plenny sheep guys
Fo come help dem catch da lion,
But da lion, he no sked dem.
He no kea dat dey stay yell,
No bodda him dey make big noise.
Same ting, wen Da One In Charge,
Da God Ova All Da Armies, come,
He goin come down an fight,
An no sked, jalike da lion,
On top da hill wea da Temple stay.
5 Jalike wen da muddah birds stay fly ova da nes
So notting hurt da bebe birds,
Same ting wit Da One In Charge
Da God Ova All Da Armies,
He no goin let notting hurt da Jerusalem peopo.
He goin take kea dem
An get dem outa trouble.
He goin pass ova dem jalike Moses time,
An save dem.”
6 You Israel peopo, go back by Da One In Charge! You wen go agains him, an dass real bad.
7 Cuz wen you go back, all you guys goin go agains da idol kine gods dat you guys wen make outa silva an gold. Az was bad, you wen do dat!
8 “God goin use one sword dat peopo neva make
Fo kill plenny Assyria guys.
He goin use one sword dat neva come from dis world
An dat goin wipe um out.
Da Assyria army guys goin run away from dat sword.
Odda peopo goin take da young guys from Assyria away
An make um work fo dem.
9 Da big rock wea da Assyria guys like hide,
Dey goin run pass um
Cuz dey plenny sked.
Wen dea officer guys see Da One In Charge flag fo war,
Dey goin come sked an lose fight.”
Dis word come strait from Da One In Charge:
Wea can see da light from his fire
Inside da Temple on top Mount Zion.
Can see wea he burn up his rubbish
Inside Jerusalem town.