40
God Give Good Kine Words To His Peopo
(Matthew 3:3; Mark 1:3; Luke 3:4-6; John 1:23; 12:15; Rome 11:34; 1 Corint 2:16; James 1:10-11; 1 Peter 1:24-25)
Dis wat yoa God tell you guys:
“Make my peopo come so notting bodda dem!
Help um feel good inside!
You guys, talk to da Jerusalem peopo
An tell all dem
Fo dem feel good inside.
Tell dem dat da hard work dey wen do
Cuz dey owe me plenny, all pau awready.
Da bad tings dey wen do,
Dey awready get punish fo all dat.
Me, Da One In Charge, I wen awready pay dem back double
Fo all da bad kine stuff dey wen do.”
 
Somebody yell,
“Ova dea inside da boonies,
Move eryting outa da way, fo Da One In Charge!
Strait thru da Arabah Valley,
Make one big road fo oua God!
Fill up ery gulch dat cross dat road!
Cut thru all da mountains an hills
Fo make da road level!
Wea da groun not level, make um smooth!
Make all da rough places come flat!
Da One In Charge goin let erybody see how awesome he stay.
Erybody inside da world goin see dat, same time.
Cuz dass wat Da One In Charge wen tell!”
 
Somebody tell, “Call out!”
An I aks um, “Wat I goin tell?”
He tell me fo tell dis:
“All da peopo, jalike da grass.
Dey do ony wat dey can do,
But dey jalike da wild flowas
Dat grow inside one field.
Da grass come all dry,
An da flowas come poho an fall down,
Weneva Da One In Charge blow on top um.
Fo shua, da peopo, dey jalike da grass.
Da grass come all dry,
An da flowas come poho an fall down,
But wat oua God tell,
Dat goin stay foeva.
 
“You Mount Zion peopo dat tell good kine stuff,
Go up on top one high mountain
Fo tell erybody!
You Jerusalem peopo dat tell good kine stuff,
Talk loud! No sked!
Tell da peopo inside da towns all ova da Judah land,
‘Look! Dis yoa God!’
10  Az cuz Da One In Charge, da Boss, stay come wit powa.
He stay in charge cuz he strong.
He stay ready fo pay good
Da ones dat help him an work fo him.
11  He take kea his peopo,
Jalike one sheep guy take kea his sheeps.
He carry da bebe sheep in his arm,
An carry dem on top his ches,
An show da way to da muddah sheeps
Fo dem res.
 
12 “Da One In Charge, he da One
Put all da ocean watta inside his hand
Fo tell how plenny get.
Wit his open hand he check out da sky
Fo tell how wide dat.
He put all da dirt inside da world inside one box
Fo tell how plenny get.
He put all da mountains an hills on top da scale
Fo tell how heavy dem.
13  You tink get somebody
Dat can tell Da One In Charge how fo use his Spirit?!
No mo nobody can!
You tink get somebody
Dat smart enuff fo teach Da One In Charge someting?!
Not even!
14 You tink get somebody
Da One In Charge wen aks him wat fo do,
An da guy help Da One In Charge fo undastan stuff?!
Nah, no mo nobody!
You tink get somebody
Wen teach Da One In Charge da right way fo judge wass right an wass wrong,
O wen teach him bout da world?!
Who help him know how fo undastan stuff?!
No mo nobody lidat!
 
15 “Da way Da One In Charge tink bout da peopo
Inside all da countries,
Dey jalike one drop watta from inside one bucket,
Jalike litto bit dirt
Dat fall down on top one scale,
An no change notting.
He even weigh da islans
Jalike dey small kine dus,
Da kine dat come outa da air.
16 All da trees on top da Lebanon mountains
Not enuff fo make one fire on top one altar.
An all da animals dat live ova dea,
Dey not enuff fo make da kine sacrifice
Dat you burn up.
 
17 “Wen Da One In Charge look da peopo in all da diffren countries,
Jalike dey notting!
Da way he tink bout dem,
He know dey no worth notting,
Jalike dey notting to him.
 
18  “If you guys like tell,
‘God, he jalike one guy,’
Den, who dat guy?! No moa!
If you goin tell he look jalike someting,
Den, wat da ting you guys tink he look jalike,
Fo you look at him an da ting, togedda?! No moa!
19 Da One In Charge,
He not one idol kine god!
Fo make one idol,
One guy melt metal fo make um.
Den somebody put gold all ova on top um
An melt silva fo make chain.
20 O if somebody no mo enuff fo pay fo dat kine statue
Fo make one gif to his god,
He go find da kine wood dat no goin rot.
Den he go look fo somebody
Dat know how fo make one idol kine god
Dat can stan an no goin fall down.
 
21 “You guys neva know all dis, o wat?!
You neva hear bout dis?!
Nobody eva tell you guys from da start, o wat?!
You guys neva tink bout,
From da time God wen make da world, till now?!
22 God, da One stay live above da earth an da sky!
Unda him, look jalike one big circle,
An da peopo dat live dea,
Fo him dey look jalike small grasshoppas.
He da One stretch da sky jalike one big curtain,
Jalike wen you spread out da cloth
Fo set up da kine tent you goin live inside.
23 He da One make da importan peopo come notting.
He make da judge guys all ova da world jalike dey notting.
24 Dey jalike plants
Dat somebody stick inside da groun,
O throw da seed,
An den dey start fo grow one root inside da groun.
Right den an dea, dey pau,
Jalike God blow on top um
An dey come all dry,
An den one storm come
An blow um away,
Jalike da junk kine stuff from da wheat.
 
25 “Da Good An Spesho God tell dis:
‘If you guys like tell,
“God, he jalike one guy,”
Den, who da guy
Dat you tink I jalike him?! No moa!’
Az wat da Spesho One tell.
26 Eh, you guys, look up inside da sky!
Who you tink wen make all dis stuff?!
Az da same One bring out da stars one by one.
Get plenny a dem, jalike one army!
He call da name fo ery star.
Cuz God stay strong an get plenny powa,
Ery star stay dea wen he call dea name.
 
27 “You Israel peopo dat come from Jacob,
How come you guys tell,
‘Da One In Charge no can see wat stay happen to me!
My God no give a rip bout my rights!’
28 You guys neva know all dis, o wat?!
You neva hear bout dis?!
Da One In Charge, he da God dat stay foeva!
He da One wen make
Even da mos far places inside da whole world.
He no goin come tired o wore out.
Nobody can check out da way he undastan eryting!
29 He da One make da tired peopo come strong.
He give da weak peopo mo an mo powa.
30 Even da teenage guys get tired an wore out,
An da young guys trip an fall down.
31 But da peopo dat wait fo Da One In Charge help dem,
Dey goin change fo dem come mo strong still yet.
Dey goin fly up jalike da eagle
Wit dea wide wing.
Dey goin run an no come tired.
Dey goin walk an no come wore out.”
40:3 40:3: Matt 3:3; Mark 1:3; John 1:23 40:3 40:3: Luke 3:4-6 40:6 40:6: James 1:10-11; 1Pet 1:24-25 40:10 40:10: Isa 62:11; JShow 22:12 40:11 40:11: Ezek 34:15; John 10:11 40:13 40:13: Rome 11:34; 1Cor 2:16 40:18 40:18: JGuys 17:29