54
Bumbye God Peopo Goin Come Awesome
(John 6:45; Galatia 4:27)
1 “Eh, my peopo!
Sing an yell cuz you stay good inside!
Cuz befo time, you guys
Was jalike one wahine dat no mo her kids yet,
Dat neva feel da sore from born one bebe.
But now, eryting goin come good fo you guys,
Jalike if dat wahine dat neva born one bebe,
Now her get mo plenny kids
Den da wahine dat get husban.”
Dass wat Da One In Charge tell.
2 “Make mo big da place fo yoa tent.
Stretch da tent covas mo wide.
No hold back, my peopo!
Make da rope mo long,
An make da pegs mo strong.
3 Cuz you guys goin need mo plenny room,
On da right side an da lef side.
Da peopo dat goin born from you
Goin take ova da land from odda countries,
An go live inside da towns
Dat da odda peopo wen bag from.
4 “Eh my peopo!
No sked, cuz you no goin come shame no moa.
Cuz nobody goin make you come shame.
Jalike da wahine dat no mo her kids,
But now she get um,
She foget her was shame
Befo time wen her was young.
Jalike she goin foget
How bad peopo wen make her feel
Wen her no mo husban.
5 Az cuz fo my peopo,
You jalike da wahine dat get husban now—
Cuz jalike I yoa husban,
Da One wen make you!
Me, Da One In Charge, Da God Ova All Da Armies,
Dass my name!
I da One dat pay da price
Fo get you outa trouble,
I Da Good An Spesho God
Fo da Israel peopo!
Da God Fo Da Whole World,
Dass wat dey call me!
6 Befo time, you guys come real sad,
Jalike you one wife yoa husban wen dump,
An you stay sad inside.
Jalike you was young
An one guy wen marry you,
Den he dump you.
But now, jalike yoa husban call you fo come back.”
Dass wat Da One In Charge tell.
7 Da One In Charge tell: “Eh my peopo,
Ony short time I wen leave you guys.
But I get plenny love an pity fo you guys,
An I goin bring you guys back togedda wit me.
8 I wen get real mad,
Jalike one flash flood,
Cuz I no like wat you guys stay do dat time.
I turn my face away so you no can see um
Fo short time.
But I get love an pity fo you guys,
An I goin stay tight wit you foeva.”
Dass wat Da One In Charge tell,
Da One dat pay da price
Fo get you guys outa trouble.
9 “Fo me, dis jalike da time da guy Noah live
An da big watta wipe out eryting.
Dat time, I wen make one strong promise
Dat da big watta, da Noah time kine,
No goin cova da earth one mo time.
Same ting dis time,
I stay make one strong promise
Dat I no goin come huhu wit you guys one mo time.
I no goin tell you guys no moa,
Dat you stay do wass wrong.
10 No matta no mo da mountain
An da hills shake,
Da way I stay tight wit you guys,
Dat no goin change,
An da deal I wen make wit you guys
Fo make shua eryting stay good fo you,
Dat goin still stay solid.”
Dass wat Da One In Charge tell.
He get love an pity fo you guys.
11 Da One In Charge tell: “Eh my peopo!
You guys get hard time now,
Jalike one town dat get hard time,
Jalike big storms stay poun da town.
An nobody kea
Fo give you guys good kine words.
But you know wat I goin do,
How I goin change all dat fo you guys?!
Dis da picha!
Jalike I goin build yoa bus up town
Real nice dis time.
Jalike I goin put blue lapis lazuli jewel stones
On top da foundation,
An put up da building stones
Wit da kine mud dat cost plenny.
12 Jalike I goin make da towas aroun da town
Wit ruby kine stones,
An da gates wit stone dat look jalike fire.
Goin get rich kine stones all ova da land.
Dass one picha fo da town,
Fo how I goin make eryting come good fo you guys!
13 “Me, Da One In Charge, I da One
Goin teach all yoa peopo.
I goin make eryting come plenny good fo dem.
14 You guys goin come solid
Cuz you stay do da right ting erytime,
No mo nobody goin put presha on you guys,
An you no need stay sked no moa.
Cuz da tings dat make you sked,
No even goin come nea you guys.
15 Bumbye, if somebody attack you guys,
Dat no goin be cuz a me.
Whoeva attack you guys
Dey goin get wipe out in front you.
16 “Tink bout dis!
I da One wen make da guy
Dat work wit da iron,
An fan da coals fo make fire,
An make tings peopo use fo fight.
An I da One make da army guys
Dat wipe out da peopo.
17 But no matta wat kine tings peopo make
Fo fight you guys wit um,
Dey no goin win.
No matta wat peopo tell in front da judge
Wen dey poin finga you guys,
You guys goin show proof dey wrong.
All dis I goin do fo you guys
Cuz me Da One In Charge an you guys work fo me.
Dass how I goin show
Dat my peopo get um right wit me.”
Dass wat Da One In Charge tell.