66
Da Judge Help Da Peopo
Dat Trus Him An Wait Fo Him
(Matthew 5:34-35; Mark 9:48; John 16:22; Jesus Guys 7:49-50; 2 Tessalonika 1:8; 2 Peter 3:13)
Dis wat Da One In Charge tell:
“Da sky, jalike one throne wea I sit down.
Da earth, jalike one stool wea I put my feets on top.
Wea da house you guys goin build fo me?
Wea I goin res?
You guys know dat I wen make
Eryting dat get, da sky an da earth, aah?
Az how come dey stay hea.”
Da One In Charge, he da One tell dat.
 
An he tell: “I tell you, wat kine peopo
I like lissen to!
Da kine peopo dat no mo big head,
An dat stay all bus up inside,
An stay sked an shaking
Wen dey hear wat I tell.
But da odda kine guys,
Dey do wat dey goin do,
An feel real good inside
Wen dey stay do dat kine pilau stuff.
Wit dem, wen dey kill one cow fo make sacrifice,
Az bad, cuz az jalike dey wen kill one guy.
Wen dey kill one bebe sheep fo make sacrifice,
Az bad, cuz az jalike dey wen broke one dog neck.
Wen dey give one wheat offering,
Az bad, cuz az jalike dey wen give pig blood fo make sacrifice.
Wen dey burn incense fo God no foget dem,
Az bad, cuz az jalike dey stay talk good bout dea idol kine god.
So den me too,
I goin do um my way an punish dem!
I goin make tings happen to dem
Dat dey stay sked awready goin happen.
I goin do all dat,
Cuz wen I wen call dem,
No mo nobody dea fo ansa me.
An wen I wen talk to dem,
No mo nobody lissen.
Dey do stuff dass bad, da way I see um.
Dey pick da kine stuff fo do,
Dat I no like!”
 
You guys dat stay sked an shaking wen Da One In Charge talk,
Lissen wat he tell:
“Da odda Israel guys dat hate you guys,
Dey no let you guys stay wit dem
Cuz you know wat kine god me.
Dey make fun a you guys, an tell,
‘Good, you show respeck fo Da One In Charge!
We like see you guys stay good inside!’
But dey da ones goin come shame!
Lissen up! Get plenny noise from da town,
An from da Temple.
Az da noise Da One In Charge stay make
Wen he pay back da guys dat stay agains him!
 
“Da ting dat goin happen fo Jerusalem town
Goin be jalike one wahine dat goin born one bebe
Befo she even start fo get labor pain!
Even befo da labor pain come
She born one boy!
Nobody hear bout dat kine ting befo time!
Nobody see dat kine stuff befo time!
No can born one whole country in one day!
No can make one peopo in one minute!
But da Jerusalem peopo on top Mount Zion,
Dey jalike one wahine, wen her bebes ready fo come,
An she born um real fas.
Yoa God, Da One In Charge, tell: ‘You tink I no goin let dis nation born,
Jalike if one wahine start fo born one bebe,
An den no let da bebe come?! No way!
I da One make her born um,
So how come you tink I goin hold her back?! Not even!’
 
10 “All you peopo dat get love an aloha
Fo da Jerusalem peopo,
Dance an sing wit dem
An stay good inside!
Show erybody how you feel good jalike dem,
No matta befo time you wen stay sad inside.
11 Cuz bumbye, you guys goin be
Jalike one bebe dat stay breas feed,
An no worry bout notting no moa,
Cuz get plenny fo drink,
An feel good bout eryting.”
 
12 Dis wat Da One In Charge tell,
“You know wat?!
I goin make eryting come out good fo da Jerusalem peopo,
Jalike one big riva
Wit watta all da time!
I goin bring plenny rich kine stuff from plenny countries,
Jalike wen da watta fill up one stream
An den go all ova da place!
An da Jerusalem peopo goin be
Jalike da muddah fo all you guys,
An you guys goin be jalike one bebe dat stay breas feed,
An da muddah carry um all ova in her arm,
An bounce um on top her knee.
13 Jalike one muddah help her bebe calm down,
Even afta he grow up an come big,
I goin do da same ting fo help you guys come so notting bodda you.
Wen you guys stay Jerusalem town,
I goin let you come so notting bodda you!
 
14 “Wen you guys see all dis,
Yoa heart goin feel jalike stay jump
Cuz you stay real good inside!
An yoa body goin feel real good
Jalike wen da new grass come up.
Da peopo dat work fo Da One In Charge,
Dey goin know wat kine powa he get.
But da peopo dat stay agains Da One In Charge,
Dey goin find out how feel
Wen he had it wit wat dey do.
15 Cuz you know wat?!
Wen Da One In Charge come, he goin come wit fire!
His war wagons goin come
Jalike one strong wind storm!
He goin come fo pay back
Da peopo he stay real huhu wit.
He goin bring da big fire
Fo tell um no do bad kine tings.
16 Da One In Charge goin use da fire an his sword
Fo punish all da peopo jalike one judge.
Da One In Charge goin wipe out plenny peopo.
 
17 “Get peopo dat make religious kine ceremonies
Fo make um come spesho fo dea idol kine gods,
An fo go in front dea gods
Inside da places wit trees wea dey pray.
Dey follow one leada guy fo go inside da middo.
Den dey eat da kine stuff togedda dass kapu fo dem,
Pig meat an rats.
An dey all goin mahke togedda.”
Az wat Da One In Charge tell.
 
18 “But me, I know
Eryting dey do, an eryting dey tink.
I ready fo come
Fo bring togedda all da diffren peopos
An all da diffren languages.
Wen dey come, dey goin see
How awesome I stay.
19 “I goin do one awesome ting wea my peopo stay. Den I goin sen some a da peopo dat still yet stay alive to da odda countries: to Spain, an Libya, an Lydia (wea get plenny guys dat know how fo use da bow an arrow), an Tubal, an Greece. Dey even goin go to islans dat stay far away, wea get peopo dea dat neva hear bout me, an neva see how awesome I stay. Dey goin tell da diffren peopos ova dea, how awesome I stay. 20 Da peopo I sen, goin bring all yoa braddah guys from all da countries to Jerusalem, da mountain dat stay spesho fo me. Wen all dem come, dat goin be jalike one wheat sacrifice fo tell me, ‘Eh! You Da One In Charge, mahalo plenny!’ Dey goin come on top horses, in war wagons an wagons wit cloth on top, an on top mules an camels.” Az wat Da One In Charge tell.
“Dey goin bring dem jalike da Israel peopo bring dea wheat in clean baskets fo make sacrifice inside da Temple Fo Da One In Charge. 21 An I goin take some a da ones dat come fo be pries guys an helpa guys jalike da Levi ohana. Az wat me, Da One In Charge, tell.
22  “Jalike da new sky an da new earth dat I stay ready fo make, goin stay long time in front me, da peopo dat goin come from you guys goin stay long time, an peopo no goin foget wat kine peopo you guys, long time too. 23 All da time, ery new moon time an ery Res Day, all da peopo all ova da world goin come an go down in front me.” Az wat Da One In Charge tell.
24  “An wen peopo go outside Jerusalem, dey goin see all da mahke bodies a da peopo dat wen go agains me. Da worm dat stay eat dem no goin mahke, an da fire dat burn dem no goin pio. Erybody goin feel pilau wen dey see da bodies.”
66:1 66:1 a: Matt 5:34; 23:22; Matt 5:35 66:1 66:1: JGuys 7:49-50 66:7 66:7: JShow 12:5 66:22 66:22: Isa 65:17; 2Pet 3:13; JShow 21:1 66:24 66:24: Mark 9:48