8
Da Assyria Peopo
Goin Fight Da Judah Peopo
1 One time, Da One In Charge tell me, “Go get someting big fo write on top um. Den write wit regula kine alphabets, ‘Dis Fo Maher-Shalal-Hash-Baz.’ (Dat mean, ‘Rip um off an run away fas!’)
2 I goin tell da Main Pries Guy Uriah, an Zekariah Jeberekiah boy, fo come watch you write dat, cuz erybody know dey can trus dem guys an wat dey tell bout wat you wen write, an wat time you write um.”
3 Afta I do dat, I go sleep wit my wife, da wahine dat talk fo God. She get hapai, an born one boy. Da One In Charge tell me, “Call him Maher-Shalal-Hash-Baz.
4 Az cuz befo dis small boy learn how fo tell ‘Daddy’ o ‘Mama,’ da Assyria army guys goin steal all da rich kine stuffs inside Damascus town an Samaria town. Dey goin bring um to da king fo Assyria.”
5 One mo time Da One In Charge talk to me fo tell dis:
6 “Dis Judah peopo tink
Dat wat I stay do fo dem, az no good.
No matta I do good tings fo dem,
Jalike I give um da watta
Dat run slow inside da Siloam watta place.
But dey ony feel good cuz dey hear
Bout wat goin happen
To Rezin da king fo Aram,
An to Remaliah boy da king fo Israel.
7 Cuz dey no like wat I do fo dem,
You know wat goin happen?
Me, Da One In Charge, goin bring da king fo Assyria ova hea,
Wit all his awesome armies,
Fo go agains da Judah peopo!
Dey goin wack um
Jalike wen da big watta come down strong
Inside da Eufrates Riva
An go up ova da sides.”
8 “Wen da armies come,
Goin be jalike one big riva stay run fas thru da Judah land,
Dat go all ova da land
Till da watta come up to da neck!
Wen da armies come,
Goin be jalike one big bird come flying,
An da wings cova yoa whole land.
Immanuel!
9 “All you diffren peopos,
Go do all da bad kine stuff you do!
Den you goin lose fight cuz you sked.
Lissen, you peopo in all da far places in da world,
Get ready fo fight!
But you goin lose fight cuz you sked.
You, get ready fo fight one mo time!
But you goin lose fight one mo time, cuz you sked.
10 You goin talk an make plan,
But dat no goin happen, cuz you no can do um.
You talk bout wat fo do,
But no goin happen lidat,
Cuz God stay wit us.
Dass wat ‘Immanuel’ mean!”
Ony Trus Da One In Charge, Da Boss
(Rome 9:33; 10:11; Hebrews 2:13; 1 Peter 2:8; 3:14-15)
11 Wen he take my hand fo make me strong, dis da ting Da One In Charge tell me. He tell me fo watch out an no go da same way dose peopo go.
12 He tell,
“No go tink you an yoa frenz stay make one plan fo do someting bad,
Jus cuz dis peopo stay tell you guys dey stay making plan fo do someting bad!
Wen dis peopo stay sked bout someting,
You guys no need come sked bout dat,
O let dat ting make you come real sked an shaking!
13 Me, I da one you guys gotta tink bout,
Cuz me Da One In Charge, da God Ova All Da Armies,
An I stay good an spesho.
You gotta come sked a me.
I da one, wen you tink bout me,
You goin come sked an shake!
14 I stay good an spesho,
Fo me come jalike one spesho place fo peopo hide an res.
But fo da Judah ohana an da Israel ohana,
I goin come jalike one stone an make dem trip an fall down.
An one trap fo catch da peopo live inside Jerusalem.
15 Jalike plenny peopo goin fall down ova dat big stone,
An come all bus up.
An jalike dey goin get stuck inside dat trap
An come prisonas.
16 “Go write all dis down fo show proof az true.
An den turn um ova to da guys I stay teach,
Fo keep inside dem all da time,
Jalike you tie um up an put wax seal on top.”
17 Az why I goin wait, cuz I stay shua Da One In Charge goin come.
Right now, he stay cova his face so da Jacob ohana peopo no can see him.
But me, I goin stay wait fo him.
18 Look—I stay right hea wit da kids Da One In Charge wen give me.
We jalike awesome kine signs inside Israel.
Even oua names show
Wat Da One In Charge, Da God Ova All Da Armies, goin do bumbye.
He da One stay on top Mount Zion inside Jerusalem.
19 Peopo goin tell you, “Go by da wahines dat talk to da mahke peopo, an da guys dat know da kine spirit dat wispa an make small kine noise you no can undastan. Aks dem fo tell you wat goin happen bumbye.” But, eh! Mo betta da peopo go aks dea God wat goin happen, aah?! No make sense talk to da mahke peopo, an tink dat goin help da guys dat stay alive!
20 Check out wat dem guys dat lissen da spirits tell. See if dey tell da same ting da Rules From God tell, an if dey talk da same kine jalike wat you know Da One In Charge tell. If dey talk diffren kine, den wat dey tell no goin help you undastan notting.
21 Da peopo goin go all ova da land, one side to da odda side. Dey goin feel plenny presha an dey goin stay hungry. An cuz dey hungry, dey goin come real huhu. Dey goin look up an swear at dea king an dea God.
22 Dey goin look at da land, but dey ony see hard time dey goin get ova dea, jalike one dark time dat goin come, jalike da peopo get plenny presha an no can see notting, jalike somebody goin throw um all outside, inside da dark.