17
Job Talk Moa
1 “Inside I no stay strong.
My time fo live stay pau awready.
Da grave stay wait fo me.
2 Get plenny peopo ova hea dat make fun a me.
Fo shua I can see dey hate me.
3 “God, you gotta stan up fo me!
No odda guy goin do dat.
4 Dese guys dat make fun a me,
You wen jam up dea heads so dey no can tink.
Dey no undastan notting!
Az why you gotta make shua dey no win ova me.
5 Watch out! Peopo tell dis:
‘If somebody tell dat his frenz wen do someting bad
Fo him get some a dea property,
His kids goin suffa cuz a dat.’
6 “God let erybody talk bad bout me.
I da kine guy, peopo spit on my face.
7 My eyes no can see good cuz I stay sad inside an cry.
My whole body come real skinny an I no mo one shadow.
8 Da guys dat do da right kine stuff,
Dey come bum out wen odda peopo make lidat to me.
Da peopo dat no do notting bad,
Dey like go agains da peopo dat no give a rip wat God tink.
9 But da peopo dat do da right kine stuff,
Dey no goin change how dey ack.
An da peopo dat no do bad kine stuff cuz dea hands stay clean,
Dey goin come mo strong.
10 “All you guys, you gotta ack diffren kine now!
O I goin know fo shua you guys donno wat fo do erytime!
11 “My time, pau awready.
My plans, gone wit da wind.
Same ting, eryting I like happen—no goin happen.
12 Dese guys tell, ‘Da nite time, dass da day time, you know.’
Wen come all dark, dey tell, ‘Almos light!’
13 If I ony wait fo make da Mahke Peopo Place my home,
If I gotta put my bed wea ony dark,
14 If I ony wait fo tell da Deep Dark Hole,
‘You, my faddah!’
An call da worms
‘My muddah, my sistah!’
15 Den you tink I stay wait fo someting good happen?! No way!
Nobody goin find one good ting dat goin happen fo me lidat.
16 If da ony ting I wait fo, is go down da Mahke Peopo Place,
Den eryting I wait fo, goin go down wit me too inside da dirt.”