29
Job Talk Bout How Was Befo Time
1 Job talk some moa:
2 “Fo shua, I like how was dat time dat awready wen happen!
Jalike da days wen God wen take kea me!
3 Dat time, jalike God make his light shine on top me,
An I go thru dark places cuz he give me light!
4 I like da time come one mo time wen I stay strong,
Wen me an God stay good frenz,
An he do good kine stuff fo my ohana.
5 Az was da time wen Da God Dat Get All Da Powa still stay wit me,
An my kids stay aroun me.
6 Wen my cows give plenny milk,
An da stone press fo olives pour out plenny oil fo me jalike streams.
7 “Dat time, wen I go out wit da leadas to da town gate,
An sit down at my place in da main square,
8 Da young guys move one side wen dey see me.
Even da ol guys stan up fo show me respeck.
9 Da main guys no talk no moa.
Dey cova dea mout wit dea hand fo show dey lissen.
10 Da importan guys stay quiet.
Dey no talk, fo dem lissen me.
11 “Whoeva hear me, dey tell I stay good inside.
Da guys dat see me, dey tell I okay.
12 Cuz I wen get da peopo dat no mo notting outa trouble
Wen dey yell fo help.
An I help da kids dat no mo faddah fo help dem.
13 Da guys dat know dey goin mahke,
Dey talk good bout how I wen help um.
An da widows dat I wen help, dey like sing,
Cuz I make um stay real good inside.
14 I make shua I do da right ting erytime,
An judge peopo da right way.
Cuz a dat, peopo know wat kine guy me,
Jalike I get spesho kine clothes.
15 I was da eyes fo da guys dat no can see,
An da feets fo da peopo dat no can walk.
16 I was jalike one faddah fo da peopo dat no mo notting.
I wen find out wat was da trut,
Even fo peopo I donno dat gotta go in front da judge.
17 Da guys dat do wass not right, I wen bus up dea teets.
I wen grab da peopo dey like kill, so dey no can kill nobody.
18 “I wen tink, ‘Fo shua I goin mahke inside my house.
I goin live plenny year, jalike da plenny sand on da beach.
19 I goin be jalike one tree. My roots goin stay spread out an reach da watta.
An da dew goin stay all nite on top my branches.
20 Peopo goin get respeck fo me,
An dey goin tell me dat ova an ova.
I goin come mo an mo strong all da time.’
Befo time, dass how I wen tink.
21 “Erybody wen wait fo dem lissen me,
Dey stay quiet till I tell wass good fo dem do.
22 Afta I wen talk, dey no like change notting I tell um.
Da tings I tell, fall on dem jalike rain.
23 Dey wait fo me talk
Jalike peopo wait fo da rain come.
Jalike dea mout stay open fo taste
Da las rain befo da hot time.
24 Wen I smile at dem, dey no stay shua az fo real wat I stay do.
Wen my face light up, make um feel mo strong inside!
25 I da guy pick da way dey gotta go. I da leada guy fo dem.
I stay jalike one king dat live wit his army guys.
I make da sad guys feel mo betta.”