40
God Ansa Back Job
1 Da One In Charge ansa back Job lidis:
2 “Eh you! Da guy dat make argue wit me!
Me, Da God Dat Get All Da Powa! You stay tell me I wrong, o wat?!
You da one dat poin finga me! I like you ansa me!”
3 Den Job tell Da One In Charge:
4 “Me, I one nobody! No ways I can ansa back you.
I shut my mout!
5 I wen tell someting ony one time—
Two time, some time.
But da secon time I tell ony da same ting.”
6 Den Da One In Charge ansa back Job from inside da real strong wind storm. He tell:
7 “Make ready fo show you strong!
Cuz I goin aks you some questions,
An you goin let me know yoa ansa.
8 “You tink az fo real dat I no judge da right way, o wat?
You goin tell I get da blame fo you show proof you right?
9 You tink you strong jalike me, God, o wat?
You tink you can talk strong jalike me an make thunda?
10 Kay den. If you can do wat I can do, den go do um!
Come awesome! Wear fancy kine clotheses!
Ack jalike one king dat get plenny respeck!
11 Show wat kine powa you get wen you come huhu!
Look at all da big head guys an make um come shame!
12 Look at all da big head guys an make dem come notting!
Throw down da bad guys wea eva dey stay.
13 Bury dem togedda inside da dirt.
Cova dea face inside da grave.
14 If you can do wat I can do, den even I goin tell you
Dat you get da powa fo get outa trouble.
15 “Look da big Behemot monsta!
I wen make him da same way I make you.
He eat green stuff an grass jalike one cow.
16 Look how strong his back!
He get powa inside his belly muscles.
17 His tail no bend, jalike one cedar tree.
Da muscles fo his thighs stay tight.
18 His bones jalike bronze tubes,
Strong jalike iron rods.
19 Da Behemot monsta, he da numba one animal
From all da odda tings me, God, wen make.
But me, da One wen make him, I can use my sword agains him.
20 Jalike da stuff dat grow on da mountain az food fo him,
Ova dea wea da wild animals play.
21 He lay down unda da thorn bushes.
He hide wea get reeds in da marsh.
22 Da thorn plants hide him inside dea shadow.
Get poplar trees by da stream all aroun him too.
23 Him, wen da riva come dangerous, he not sked.
He stay shua he safe, no matta da whole Jordan Riva come up to his mout.
24 Nobody can catch him wen he stay watching,
O put bait fo one trap him an make one puka thru his nose.”