11
Lazarus Come Back Alive
(John 12:1-7)
1-2 Had one guy Lazarus. He get two sistahs, Mary an Marta, an dey all come from Betany town. Mary, she da wahine dat layta put perfume on top Jesus, Da One In Charge. She put um on top his feet an wipe um wit her hair. Den Lazarus come sick.
3 So Lazarus sistahs sen guys fo tell Jesus, “You Da One In Charge, yoa good fren Lazarus, he stay sick.”
4 Wen Jesus hear dat, he tell, “Lazarus no goin mahke from dis sick. Dis happen so erybody goin know how awesome God stay. I God Boy, an erybody goin find out from dis how awesome I stay too.”
5 Jesus get love an aloha fo da sistahs, Marta an Mary, an fo Lazarus too.
6 Afta Jesus hear dat Lazarus stay sick, he still yet stay ova dea da odda side a da Jordan Riva two mo days.
7 Den he tell his guys, “Come on. We go back Judea side, wea Lazarus stay.”
8 Da guys Jesus stay teach tell him, “Eh, Teacha, ony short time befo dis da Jew guys like throw stone at you fo kill you. An you still like go back ova dea one mo time?”
9 Jesus tell dem, “No sked! God goin take kea us guys, cuz he jalike da light. Day time get twelve hour, aah? If you walk aroun day time, you no goin trip an fall down, cuz da light dat shine inside dis world let you see.
10 But if you walk aroun nite time, you goin trip an fall down, cuz you no mo light.”
11 Afta Jesus tell dat, he tell, “Oua fren Lazarus wen go sleep, but I goin go ova dea fo wake him up.”
12 Jesus guys tell, “Eh Boss, if he sleep, he goin come good.”
13 Jesus mean he mahke die dead, but his guys tink he stay talk bout res an sleep.
14 Den Jesus tell um fo real kine, “Lazarus mahke awready.
15 I feel good inside fo you guys, cuz I neva stay ova dea wen he mahke. You guys goin trus me cuz a wat goin happen. An now, we go ova dea by him.”
16 Den Thomas da Twin tell Jesus odda guys, “Eh, mo betta we go wit Jesus too, fo us mahke wit him.”
Jesus Make Da Mahke Peopo Come Alive Fo Real Kine
17 Wen Jesus go Betany, he find out dat Lazarus stay inside da grave four days awready.
18 Betany stay not far from Jerusalem, not even two mile.
19 Plenny Jew guys come fo kokua Marta an Mary, cuz dea braddah mahke.
20 Den Marta find out dat Jesus stay come. She go outside da town fo meet him. But Mary stay inside da house.
21 Marta tell Jesus, “You Da One In Charge! If you was hea, fo shua my braddah no wen mahke!
22 But I know fo shua even now, God goin do wateva you go aks him fo do.”
23 Jesus tell her, “Yoa braddah goin come back alive one mo time.”
24 Marta tell him, “I know fo shua he goin come back alive, bumbye wen all da mahke guys goin come back alive, an dis world goin come pau.”
25 Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke.
26 Whoeva stay live fo real kine an trus me, dey no goin mahke inside, eva! You know fo shua az real, Marta, o wat?”
27 She tell him, “Yeah, you Da One In Charge! I trus you, dat you da Christ, da Spesho Guy God Wen Sen. You God Boy, da Guy dey wen tell us goin come inside dis world.”
Jesus Cry
28 Afta Marta tell dat, she go back by her sistah Mary. Dey talk wea nobody can hear wat dey tell. She tell, “Da Teacha come, an he like see you.”
29 Mary hear dat. She get up quick an go outside wea Jesus stay.
30 Jesus neva come inside da town yet, but he stay da place wea Marta meet him.
31 Da Jew guys dat stay inside da house wit Mary, fo kokua her, dey see her get up quick an go outside. So dey go too. Dey figga she goin go da grave fo cry ova dea.
32 Den Mary come wea Jesus stay, an see him. She go down in front his feets an tell, “Boss, if you was hea, my braddah neva mahke.”
33 Wen Jesus see her crying, an da Jew guys dat come wit her crying too, dat bodda him plenny an he come all shook up inside.
34 He tell, “Wea you guys bury him?”
Dey tell, “Boss, come see.”
35 Jesus cry.
36 Den da Jew guys tell, “Look, how plenny love an aloha he get fo Lazarus!”
37 But some a dem tell, “Eh! Dis guy wen make da blind guys see. How come he no can make Lazarus come good fo him no mahke, aah?”
Lazarus Come Back Alive
38 One mo time Jesus come all bodda inside. He go da cave wea dey wen bury Lazarus. Get one big stone dea dat cova da cave fo nobody go inside.
39 Jesus tell, “Take away da big stone.”
Marta, da mahke guy sistah, she tell, “Haah, Boss? He mahke four days awready! Haunas goin be!”
40 Jesus tell her, “I tell you awready dat if you trus God, you goin find out how awesome he stay, aah?”
41 Den some guys push da stone away from da puka. Jesus look up to da sky an tell, “Faddah, mahalo plenny dat you lissen me.
42 I know fo shua you erytime lissen me. But I tell dat so dese guys goin trus me, dat you wen sen me hea.”
43 Afta he tell dat, he talk real loud, “Lazarus, come outa dea!”
44 Da mahke guy come outside. He get one bandage fo mahke guys aroun his hands an feet, an anodda bandage aroun his face. Jesus tell, “Hemo da bandage from his face, an let him go.”
Da Jew Leada Guys Talk
How Dey Goin Kill Jesus
(Census 9:10; Matthew 26:1-5; Mark 14:1-2; Luke 22:1-2)
45 Den plenny Jew guys dat come fo kokua Mary, an see all da awesome stuff Jesus wen do, dey trus him.
46 But odda guys go by da Pharisee guys, an tell dem all da stuff Jesus wen do.
47 Den da Main Pries guys an da Pharisee guys tell all da Jew leadas fo come togedda. Dey tell, “Dis guy Jesus stay do all kine awesome stuff dat show who him! Wat we goin do?
48 If we let him stay do dis kine stuff, erybody goin go trus him jalike he dea king! An cuz a dat, da Rome army guys goin come an wipe out oua Temple an oua peopo.”
49 One a dem, Kaiafas, da Main Pries Guy dat year. He tell dem, “You guys donno notting!
50 Mo betta fo you guys if one guy mahke fo all da peopo. If not, da Rome guys goin wipe out all us Jew guys!”
51 Kaiafas neva figga fo tell dat, but he da Main Pries Guy dat year, dass why he can talk lidat. He talk fo God wen he tell dat Jesus goin mahke fo all da Jew guys.
52 An he no goin mahke ony fo da Jew guys, but fo all God kids dat stay all ova da world, fo bring dem all togedda fo come one peopo.
53 Dass why, from dat time, da Jew leada guys stay talk togedda how dey goin kill Jesus.
54 Az why Jesus no go aroun no mo wea da Jew leada guys can see him. He go one place nea da boonies, Efraim town. He stay ova dea wit da guys he stay teach.
55 Now, almos time fo da Jew Passova religious kine ceremony. Plenny peopo from da boonies go Jerusalem befo da Passova, fo dem do all da stuff da Rules From God tell fo do fo make um fo dem come clean inside fo pray Passova time.
56 Da peopo stay look fo Jesus. Wen dey stan inside da open lanai fo da Temple, dey aks each odda, “Wat you guys tink? You tink Jesus goin come da spesho religious kine ceremony, o wat?”
57 But da Main Pries guys an da Pharisee guys tell dat if whoevas know wea Jesus stay, dey gotta tell dem, fo dem sen da police guys fo bus Jesus.