9
Jesus Make One Guy See Dat Born Blind
Afta dat Jesus walk aroun, an he spock one guy dat wen born blind. Da guys Jesus stay teach aks him, “Eh, Teacha! Who wen do bad kine stuff, dis guy o his muddah an faddah? Az why he born lidat, aah?”
Jesus tell dem, “Not him o his faddah o his muddah do someting bad. Not cuz a dat he born blind. He wen born lidat fo erybody see da awesome stuff God do fo da guy. God sen me hea cuz us guys gotta do da kine work he tell us fo do now wen still get da light. Bumbye nite time come, an den nobody can work. I stay inside da world now, an I jalike da light fo da peopo all ova da world.”
Afta Jesus tell dat, he spit on top da dirt, an make some mud. Den he take some a dat an put um on top da guy eyes. Den Jesus tell um, “Go, wash yoa face inside da Siloam watta place.” (Siloam mean, “Dey Sen Watta Dea.”) Az why da guy go ova dea an wash his face, an wen he go home, he can see!
So da peopo dat live nea da guy, an da oddas dat see him beg befo time, dey tell, “Eh, dis da guy dat stay sit an beg befo time, aah?”
Some peopo tell, “Yeah, he da guy!” Odda peopo tell, “Nah! He ony look jalike him.”
But da guy tell, “Yeah! I da guy!”
10 Az why dey tell him, “How come you can see now?”
11 He tell um, “Da guy Jesus wen make mud, an put um on top my eyes, an tell me, ‘Go wash yoa face da Siloam watta place.’ Az why I go an wash my face, an den I can see!”
12 Dey tell him, “Wea he stay?”
He tell, “I donno.”
Da Pharisee Guys Check Out Da Guy Dat Was Blind
13 Den dey take da guy dat no stay blind no mo to da Pharisee guys. 14 Was da Res Day wen Jesus make da mud an make da guy see. 15 Az why da Pharisee guys tell him, “Eh, how come you can see?”
Da guy tell dem, “He put mud on top my eyes, an I wash um out, an den I can see!”
16 Den some a da Pharisee guys tell, “Dis guy no can come from God, cuz he do stuff he not suppose to do on da Res Day.” But odda Pharisee guys tell, “Nah! How can one bad kine guy do da kine awesome stuff dat show who him?” An dey make argue wit each odda.
17 So one mo time dey tell da guy dat no stay blind no moa, “Eh, wat you figga bout da guy dat make you see?”
Da guy tell, “He one guy dat talk fo God.”
18 Da Jew leada guys no tink az fo real kine, dat da guy stay blind befo time. So dey sen guys fo bring his muddah an faddah. 19 Dey tell da muddah an faddah, “Dis yoa boy? You tell he born blind? How come he can see now?”
20 Da muddah an faddah tell, “Yeah, dis oua boy. An he wen born blind. 21 But we donno how come he can see now, o who da guy wen make him see. Try aks him. He ol enuff. No need somebody dat can talk fo him.” 22 His muddah an faddah guys talk lidat, cuz dey sked da Jew leada guys. Cuz dem guys awready talk togedda, an tell, “If anybody tell dat Jesus da Christ, da Spesho Guy God Wen Pick, we goin throw him outa da Jew church.” 23 Dass why his muddah an faddah guys tell, “He ol enuff. Try aks him.”
24 So dey tell da guy dat no stay blind no mo fo come back one mo time. Dey tell, “Eh! Tell da trut in front God! Us guys know fo shua dat dis buggah Jesus, he one bad guy.”
25 Da guy tell dem, “I donno if he one bad guy o wat. But I know dis: befo time I no can see—now I can see!”
26 Dey aks him, “Wat he do to you? How he open yoa eyes?”
27 He tell dem, “I wen tell you guys awready, but you guys neva lissen. How come you guys like hear um one mo time? You guys like come his guys fo him teach you guys too?”
28 Den dey talk mean to him, an tell, “You his guy, an you lissen him. Us guys, we Moses guys, an we ony lissen Moses. 29 We know dat God wen talk to Moses. But dis buggah, we donno wea he come from.”
30 Da guy tell um, “Aah! Dis blow my mind! You guys donno wea he come from, but still yet he make me see.” 31 An da guy tell dis too, “Eh! we know dat God no lissen da bad kine guys. But he lissen da guys dat get respeck fo him an do wat he like.” 32 An da guy tell, “Lissen up! From da time God make da world till now, nobody eva hear dat somebody make one guy see dat wen born blind.” 33 An da guy tell, “If dis guy neva come from God, den he no can do notting.”
34 Dey tell him, “Eh, you ony do bad kine stuff from da time you born! How come you tink you can teach us guys someting?” Den dey throw um outa da Jew church.
Blind Inside
35 Jesus hear dat dey throw da guy outa da Jew church, so he go find da guy, an tell him, “You trus da Fo Real Kine Guy?”
36 Da guy tell, “Who da guy, Mista? Tell me, fo me trus him.”
37 Jesus tell him, “You wen see him awready. Dass me, da guy stay talking to you.”
38 Da guy tell, “You Da One In Charge! I trus you!” An he go down on his knees in front Jesus.
39 Jesus tell um, “I wen come inside dis world fo show who do da bad kine stuff. Bumbye da guys dat no can see, goin see, an da guys dat see goin come blind.”
40 Had some Pharisee guys dea dat hear dat. Dey tell Jesus, “Eh! You figga us guys no can see too?”
41 Jesus tell um, “If you guys no can see, den nobody can poin finga you guys. But you guys tell dat you guys can see, but you no can see fo real kine. Dass why God poin finga you guys.”
9:5 9:5: Matt 5:14; John 8:12