17
God Goin Punish Da Judah Peopo
1 “Da bad kine stuff da Judah peopo do,
Jalike somebody stay write inside dem
Wit one real sharp iron chisel o wit diamond poin,
Jalike stay write on top one metal plate,
An jalike fo write um on top da tings jalike horns
Dat stick out from da cornas a dea altars.
2 Even dea kids no foget fo pray in front da altars fo odda gods,
An in front da tiki poses fo da idol kine wahine god Asherah,
An undaneat ery big tree dat get plenny leaf
An on top da high hills.
3 I goin let da army dat goin come take ova da hill dat stay spesho fo me.
An all da rich kine stuffs you guys stash,
An all yoa sacrifice places on top da hills—
I goin let da army guys rip um all off.
Dass how you guys goin pay
Fo all da real bad kine stuff you guys do
All ova yoa country.
4 You guys get da blame!
Az why you guys goin lose da land I wen give you guys fo come yoa property.
I goin make you guys come slaves fo da peopo dat stay agains you
Inside one land you guys donno from befo time.
Az cuz you guys wen make me come real huhu,
Jalike one real hot fire dat goin burn foeva.”
5 Dis da message from Da One In Charge:
“Da guys dat stay strong ony trus peopo, not me.
I goin put kahuna on top dem.
Dey tink, cuz dea body strong, dey strong enuff.
But da way dey tink, dey stay bag from me, Da One In Charge.
6 Dose guys goin be jalike one bush dat no mo leaf inside da up country boonies.
Good tings goin happen, but dose guys no goin see um.
Ony da odda guys goin see um.
Da bad guys goin live inside da boonies wea ony get lava rock all ova,
Inside one land wea get plenny salt in da groun an no can grow notting,
An no mo peopo live ova dea.
7 “But fo da guys dat trus me, Da One In Charge,
An stay shua I goin do wat I tell um I goin do,
I goin do good kine stuff fo dem.
8 Dey goin be jalike da trees dat somebody plant nea da watta.
Dea roots go to wea da watta go.
Dat kine tree, no stay sked wen da hot time come.
Da leaf stay green erytime.
Even da years wen no mo rain, da tree no need worry.
Dat kine tree erytime goin get fruits.”
9 “Us peopo, inside we stay sly, fo real kine!
Jalike us get one sick dat no can come good.
No mo nobody undastan how bad us!”
10 “Me, Da One In Charge, I da One dat know wat erybody tink.
I tes how dey feel inside an wat dey like,
So dis wat dey goin get from me fo wat dey do:
Good if dey do good kine,
O bad if dey do bad kine.
11 “Da guy dat come rich but he no do um da right way,
He jalike da partridge bird,
Dat sit on top her eggs but some a dem not born.
Wen dat guy make thirty-five, da rich stuffs he wen steal, all gone awready,
An wen he mahke, peopo goin tell he stupid.”
12 “You Da One In Charge, an yoa Temple, az yoa throne, da Awesome One!
From da start, az da mos importan place!
Fo real kine, dass da place us guys make spesho fo you!
13 You Da One In Charge, da One us Israel peopo wait fo!
Erybody dat bag from you goin come shame.
Da peopo dat no go yoa way,
Ony get one place wea somebody goin write dea name:
Az on top da dirt.
Cuz dey wen bag from you, Da One In Charge.
No matta you jalike one watta spring fo dem
Wea da watta come out all da time an make peopo come alive.
14 “Da One In Charge make me come good all ova,
Fo me come good fo real kine!
Get me outa trouble,
Fo me stay outa trouble.
Cuz you da One I talk good bout.
15 But you know wat? Peopo stay tell me,
‘Dis “message from Da One In Charge” you stay talk bout—
Eh, us like see dat happen right now!’
16 “But me, I neva bag from yoa sheeps
Fo take kea dem.
I neva like see da time come
Wen nobody can handle wat you do to dem.
An you, you know dat eryting I tell,
I tell um in front you.
17 No make me come sked a you!
You jalike my city a refuge wen bad kine tings happen.
18 “Da guys dat stay come afta me,
I like you make dem come shame,
But no make me come shame.
Bum dem out, but no bum me out.
Make bad kine stuff happen to dem,
An bus um up, ova an ova!”
Make Da Res Day Spesho Fo Da One In Charge
19 Dis anodda message from Da One In Charge fo me: “Go stan by da main town gate dat da peopo use. Dass da one wea da Judah king guys come inside an go outside Jerusalem. Den go stan by all da odda gates fo Jerusalem too.
20 Tell um: ‘Lissen wat Da One In Charge stay tell, you Judah kings, an all da Judah peopo, an all da Jerusalem peopo dat come inside dese gates!
21 Dis da message from Da One In Charge: You betta watch out if you like stay alive! No carry stuff on da Res Day, an no bring stuff inside da Jerusalem gates dat day!
22 No bring stuff outa yoa house an no work on da Res Day! Make dat day spesho fo me, jalike I wen tell yoa ancesta guys dey gotta do!
23 But yoa ancesta guys neva lissen fo real kine. Dey ony come hard head. Wen I tell um fo do stuff da right way, dey ony make deaf ear.’
24 “Den Da One In Charge tell: ‘But if you guys lissen me fo real kine, you no goin bring stuffs inside da gates fo dis big town on da Res Day. Make dat day spesho fo me, an no work on da Res Day!
25 Den garans goin get king guys dat sit on top David throne, an dey goin come inside da gates fo dis big town wit dea leada guys. Dey goin come inside on top war wagons an horses, dem an dea leada guys, an da guys from Judah, an da peopo from Jerusalem. Den dis big town goin get peopo living inside, all da time.
26 Da peopo goin come from da Judah towns, an da small towns aroun Jerusalem, from da Benjamin ohana land, an da small hills makai side, from up country Judah, an from da Negev boonies. Dey goin bring animals fo make burn up kine sacrifice an odda kine sacrifice, da wheat o barley sacrifice, da incense fo burn fo me, an da sacrifice fo tell me mahalo plenny. Dey goin bring all dat to da Temple Fo Da One In Charge.
27 But if you no lissen wat I tell you fo do, an no make da Res Day spesho fo me, wen you come inside da Jerusalem gates an carry stuff wit you on da Res Day, den I goin burn up da Jerusalem gates wit one fire dat no mo nobody can pio. Da fire goin wipe out da strong wall all aroun Jerusalem.’ ”