46
God Goin Punish Da Diffren Nations
1 Dis, da message from Da One In Charge fo Jeremiah, da guy dat talk fo him, bout da diffren peopos:
Agains Da Egypt Peopo
2 Dis da message bout Egypt: Dis wat Da One In Charge tell bout da Egypt army. Pharaoh Neko, da Egypt king, wen take all dem Karkemish side by da Eufrates Riva. Nebukadnezzar, da Babylon king, wen win ova dem. Az was da year numba four dat Jehoiakim, Josiah boy, stay da Judah king.
3 Da One In Charge tell: “Line up da Egypt army guys wit small shield an big shield!
An march out fo fight!
4 “Tie da horses to da war wagons!
Climb on top inside da war wagons!
Line up in yoa place
Wit yoa helmet on!
Make yoa spear sharp!
Put on yoa body armor!
5 “But how come I see dis?
Da Egypt guys stay real sked!
Da Babylon guys stay push dem back!
Dea bestes fighta guys, dey all bus up!
Dey run away real fas,
An dey no even look behind dem wen dey go.
All aroun dem, erybody stay real sked!”
Az wat Da One In Charge tell.
6 Da guys dat can run fas no can run away mo fas from dea,
An da bestes fighta guys no can get outa dea too.
Da north side, by da Eufrates Riva,
Dey trip an fall down.
7 Who dis dat stay come real big,
Jalike da Nile Riva?
Jalike how da rivas come
Wen get flash flood?!
8 Az da Egypt army, dat come real big
Jalike da Nile Riva.
Jalike how da rivas come
Wen get flash flood.
Da Egypt guys stay tell,
“Us guys goin come mo big, an cova up da earth.
Us guys goin wipe out da big towns
An da peopo dat live inside um.
9 “Attack, you horse ridas!
Go fo broke, you war wagon drivas!
March, you guys dat fight—
You guys from Sudan an Libya
Dat carry one shield.
You guys from Lydia
Dat fight wit bow an arrow!
10 But Da One In Charge a me stay in charge a dat day too!
He da God Ova All Da Armies!
Dass wen he goin pay back
Da peopo dat stay agains him.
His sword goin kill peopo
Till dey all mahke die dead.
Cuz Da One In Charge a me,
Da God Ova All Da Armies,
Goin make sacrifice
In da north country by da Eufrates Riva!
11 “You Egypt peopo,
You weak, jalike one young girl,
Go up Gilead side
An try get medicine from dea.
But wase time you try fo get all kine medicine!
Cuz no way you goin come good!
12 All da peopos goin hear how you wen lose face.
All ova da world, peopo hear you stay yelling real loud.
One fighta guy goin trip ova anodda fighta guy.
Den da two a dem goin fall down togedda.”
13 Dis da kine stuff Da One In Charge tell Jeremiah, da guy dat talk fo him. He tell bout how Nebukadnezzar da Babylon king goin come attack da Egypt land.
14 “Tell dis inside da Egypt towns!
Make shua erybody hear um inside Migdol,
Inside Memphis, an Tahpanhes:
‘Line up, an make ready fo fight!
Cuz da war stay wipe out da peopo all aroun you!’
15 How come Apis, yoa bull god from Memphis in Egypt, stay lie on top da groun?
How come he no can stan up?
Az cuz Da One In Charge push um down!
16 Da One In Charge wen make plenny army guys trip
An fall down on top each odda.
Dey goin tell each odda, ‘Stan up!
Us go back by oua peopo,
Da place we wen born,
Away from da swords a da guys dat give us hard time.’
17 Ova dea peopo goin tell,
‘Pharaoh, da Egypt king,
He ony mout!
He wen miss his chance!’ ”
18 Da real king get da name Da One In Charge,
Da God Ova All Da Armies, an he tell:
“Jalike I shua I stay alive,
I stay shua one man wit plenny powa goin come,
He big, jalike how Mount Tabor stay mo big den all da odda mountains.
Big, jalike Mount Carmel by da sea.
19 You peopo dat live inside da Egypt towns,
Get yoa stuff ready fo go way jalike you prisonas!
Cuz Memphis town goin come one pile a junk,
All bus up.
No mo nobody goin live ova dea.
20 “Da Egypt land stay jalike one nice looking young girl cow.
But somebody jalike one biting horse fly
Goin attack Egypt from da north side.
21 Da Egypt guys pay guys from anodda place
Fo go fight fo dem.
Dey feed um plenny fo dem come
Jalike fat young cows dat peopo feed.
But even dem, dey goin turn aroun
An run away togedda.
Dey no goin stan up fo fight.
Cuz da time fo dem come all wipe out goin come on top dem,
Az da time fo punish dem.
22 Da Egypt army goin make noise jalike one snake dat stay run away
Wen plenny guys from da odda army come.
Dey goin come agains Egypt wit axes,
Jalike guys dat cut down trees.
23 Da Egypt peopo, dey jalike one fores
Wit real plenny trees fo no go thru dea.
But da army dat stay come,
Dey goin cut down all da trees.
Dat army get plenny guys,
Jalike wen da locust kine grasshoppas come.
No can count dem.
24 Dey goin make da peopo dat live inside da small towns Egypt side come shame.
Da guys from da north goin take dem ova.”
Dass wat Da One In Charge tell.
25 Da One In Charge, da God Ova All Da Armies, da God fo da Israel peopo, tell: “I stay ready fo punish Amon, da god fo da Thebes peopo, Pharaoh, da Egypt peopo, an dea gods an dea kings. I goin punish da Pharaoh king guy an da peopo dat trus him.
26 I goin turn dem ova to da peopo dat like kill dem—az Nebukadnezzar da Babylon king, an his officer guys. But bumbye, goin get peopo live Egypt side one mo time, jalike befo time. Az wat Da One In Charge tell.
27 “But you peopo
Dat get my worka guy Jacob fo yoa ancesta,
No sked!
You peopo dat get Israel fo yoa ancesta,
No lose fight!
Fo shua, I goin get you guys outa trouble
No matta you stay live one far place,
I goin get yoa kids outa da land wea dey stay prisonas.
Nobody goin bodda da Jacob ohana one mo time.
Dey goin come so notting bodda dem,
An nobody goin make dem come sked an shaking.
28 “No sked, you Jacob peopo, my worka guys,
Cuz I stay wit you guys.
No matta I stay wipe out all da peopos
Wea I wen make you come dea prisonas,
I no goin wipe out all you guys.
I goin judge you guys da right way,
An den I goin punish you guys, ony fo teach you.
I no goin jus let you guys go,
But I goin punish you guys.”
Az wat Da One In Charge tell.