3
Wait Fo God
1 I one guy dat wen suffa plenny,
Cuz Da One In Charge stay real huhu wit me.
2 He wen make me go way,
An make me walk in da dark an not in da light.
3 Fo shua, Da One In Charge stay go agains me
Erytime, all day.
4 He make my skin an muscle come ol.
He smash my bones.
5 He go afta me.
All aroun me he give me one hard time.
6 He make me stay wea ony real dark,
Jalike da mahke peopo stay from long time befo time.
7 Jalike he build one wall aroun me
Fo me no get outa dea.
Jalike he put one heavy chain on top me.
8 Even wen I call an yell fo somebody fo come help me,
Da One In Charge make deaf ear wen I pray.
9 He put one wall wit cut stones fo me no go outside.
He make ery road all kapakahi.
10 He wait fo jump me jalike one bear.
He hide jalike one lion fo catch me.
11 He block my road an bus me up.
He put me wea nobody goin help me.
12 He make his bow ready fo shoot,
An put me fo da target fo his arrow.
13 He shoot da arrows from his arrow bag
An stab my heart!
14 All my peopo stay laugh at me.
All day dey make fun a me wit dea songs.
15 God make me suffa plenny,
Jalike I stay swallow someting dat taste real bad.
16 Jalike he push my face in da gravel an broke my teets.
An push me down inside da dirt.
17 Get plenny stuff dat bodda me.
I foget how was, wen eryting stay good.
18 Az why I tell, “No ways I can hang in dea!
I wen wait fo Da One In Charge do someting, but I tink no goin happen!”
19 Wen I tink bout how I suffa an donno wea I going,
Az jalike I wen suffa an swallow stuff dat taste real bad.
20 Wen I rememba all dat kine stuff dat taste real bad,
Make me stay bum out.
21 But I can stay wait fo Da One In Charge
Wen I tink lidis:
22 Da One In Charge, he stay tight wit us guys foeva!
Da tings he do fo show pity fo us guys, goin be lidat foeva!
23 Ery morning yoa love an pity come new.
Us guys can trus you big time!
24 I figga, “I get Da One In Charge fo my share, so I no need notting moa.
Az why I goin wait fo him fo help me.”
25 Da One In Charge do good tings fo da peopo dat wait fo him,
An dat like find out from him wat fo do.
26 Az good fo wait an stay quiet,
Till Da One In Charge get us outa trouble.
27 Az good fo peopo dat still young
Learn how fo work hard.
28 Good, dey sit wit nobody an stay quiet,
Wen Da One In Charge give dem hard work.
29 Even wen dey gotta put dea face on top da dirt,
Still yet maybe Da One In Charge goin help dem bumbye.
30 No matta get peopo dat goin slap dea head,
An make um get plenny shame.
31 You know, wen da Boss throw out his peopo,
Az not foeva!
32 No matta he make us suffa,
He goin show aloha an pity too,
Cuz he stay real tight wit his peopo!
33 Cuz he no like make peopo suffa,
O make dem stay sad inside.
34 If peopo smash all da prisonas inside da land unda dea feet,
You tink da Boss no see dat?!
35 If peopo get da right fo do stuff
In front da God Dass Mo Importan Den All Da Odda Gods,
But odda peopo take away dea rights,
You tink da Boss no see dat?!
36 If somebody judge anodda guy, but no judge da right way,
You tink da Boss no see dat?!
Fo shua, he see um!
37 If da Boss no like fo someting happen,
No mo nobody can make um happen.
38 Get bad kine tings an good kine tings dat happen,
Cuz da God Dass Mo Importan Den All Da Odda Gods, tell wat goin happen.
39 How come somebody dat stay alive squawk,
Wen Da One In Charge punish dem fo da bad kine stuff dey wen do?
40 Good, us guys go check out how we do, an tes um.
Good, we turn aroun an come tight one mo time wit Da One In Charge.
41 Good, fo us guys pray wit one good heart,
An put up oua hands to God in da sky, an tell:
42 “Us guys wen do bad kine stuff,
An stan agains you.
An you neva let us go fo dat!
43 “You stay real huhu wit us guys, an go afta us.
You kill us guys an no give chance.
44 Jalike you cova up wit one cloud,
Fo no hear wen we pray to you.
45 You make us guys come jalike us junk an opala kine stuff,
An dass how da diffren peopos see us guys.
46 “All da peopo dat stay agains us guys
Talk stink agains us.
47 Us stay sked, an dey dig holes fo trap us guys.
Us get real hard time, an dey bus us up.”
48 I stay cry plenny,
Cuz my peopo stay come wipe out.
49 I goin stay cry erytime.
I no can stop
50 Till Da One In Charge look down from da sky
An see wat stay happen.
51 Wat I see make me come sore inside
Cuz I see wat happen to all da wahines inside my big town.
52 Da peopo dat stay agains me,
Dey hunt me jalike I one bird,
No matta I neva do notting agains dem.
53 Dey put me inside one deep hole fo keep watta,
An put down one big stone ova da top, fo kill me.
54 Da watta go ova my head,
An I tink my life pau awready.
55 Da One In Charge, cuz I know wat kine god you,
I yell to you fo help me,
From da bottom a da deep hole.
56 You wen hear wat I yell, “No make deaf ear!
Let me breave some moa, wen I yell to you fo help me!”
57 You come nea weneva I call out to you,
An you tell, “No sked!”
58 Boss, you fight fo me wen I get trouble!
You wen pay da price fo let me stay alive!
59 Da One In Charge, you see how dey no like
Fo nobody judge me da right way.
So now, you go judge me da right way!
60 You see how plenny dey pay me back.
Dey make all kine plan agains me.
61 Da One In Charge, you hear dem talk bad bout me.
You hear how dey make plans agains me.
62 Da peopo dat stay agains me,
Dey stay wispa agains me all day.
63 Look dem! Dey sit o dey stan, looking at me,
An dey make fun a me wit dea songs.
64 Da One In Charge, pay dem back wat dey wen earn,
Jalike how dey wen make me suffa!
65 Make dem come real sore inside,
So dey no can undastan wat you stay do.
An put kahuna on top dem!
66 Go afta dem an wipe um out, cuz you stay huhu wit dem,
So den dey no goin stay unda yoa sky, Da One In Charge!