Da Prieses
Leviticus
1
Da Burn Up Kine Sacrifice
1 Da One In Charge call Moses fo come by him, an he talk to him from inside da Tent Wea Da Peopo Come Fo Meet God.
2 He tell Moses fo tell da Israel peopo dis: “If any one a you guys make one sacrifice fo me, Da One In Charge, bring one cow o sheep o goat.
3 “If da guy like bring one cow fo make one burn up kine sacrifice, den he gotta bring one bull dat no mo notting wrong wit um. He gotta show da bull to da pries guys outside wea you go inside da open lanai fo da Tent Wea Da Peopo Come Fo Meet Me, Da One In Charge. Az fo make shua da bull stay okay fo me take um.
4 Den da guy goin put his hand on top da head a da bull fo da sacrifice. Dat mean, I goin take da bull fo da guy fo da one come pono wit me, Da One In Charge.
5 Da guy goin kill da bull in front me, Da One In Charge. Den Aaron boys, da pries guys, goin bring da blood from da bull, an sprinkle um on top all da sides a da altar, by da place wea you go inside da open lanai fo da Tent Wea Da Peopo Come Fo Meet Me.
6 Den da guy goin take off da skin from da sacrifice, an cut up da sacrifice fo make pieces.
7 Same time, Aaron boys, da pries guys, goin put wood on top da altar da right way, an make one wood fire.
8-9 Firs, da inside pieces an da legs, da guy goin wash um wit watta. Den da pries guys put da pieces, da head, an da fat, on top da wood dat stay burn on top da altar.
10 “If da sacrifice goin be da kine dey burn up one sheep o one goat, da guy gotta bring one boy kine sheep o one boy kine goat dat no mo notting wrong wit um.
11 Da guy goin kill da animal by da north side a da altar in front me, Da One In Charge. An Aaron boys, da pries guys, goin sprinkle da blood on top all da sides a da altar.
12-13 Da guy goin cut up da animal fo make pieces, an wash da inside pieces an da legs wit watta. Den da pries guy goin put da pieces, da head, an da fat, on top da wood dat stay burn on top da altar.
“One a da pries guys goin burn up da whole animal on top da altar, az one burn up kine sacrifice. Da smoke from da fire goin go up an make one real nice smell fo me, Da One In Charge.
14 “If da sacrifice goin be one bird dat dey burn up, den da guy can give one dove o one young pigeon fo be da sacrifice fo him.
15-16 Da pries guy goin bring da bird by da altar, an pull off da head. He goin take out da neck part an pull out da feathers on top um, an throw um down by da east side a da altar wea dey put da ashes. He goin pull da bird open by da wings, but not pull um all da way off. Den he goin burn up da bird on top da altar. Da blood goin run off da side a da altar.
17 Wen da pries guy burn up da whole bird on top da altar, az one burn up kine sacrifice, so da smoke from da fire go up an make one real nice smell fo me, Da One In Charge.