13
Jesus Tell Da Temple Goin Come Bus Up
(Matthew 24:1-2; Luke 21:5-6)
Jesus go outside da open lanai fo da Temple, an one guy he stay teach tell, “Eh, Teacha, check out dese buildings, da big stone blocks! Awesome, aah?”
Jesus tell, “You see all dese awesome buildings? Bumbye no goin get one stone on top da odda ova hea. Dey goin throw um all down.”
Peopo Goin Get Trouble An Suffa
(Matthew 24:3-14; Luke 21:7-19)
Bumbye, Jesus go da Olive Ridge, an sit down ova dea fo see da Temple da odda side a da valley. Peter, James, John, an Andrew come by him wen no mo odda guys dea. Dey tell um, “Wat time all dat kine stuff goin happen? How we goin know wen da time come?”
Jesus tell um, “Watch out! No let nobody bulai you guys! Plenny guys goin show up an use my name. Dey goin tell, ‘Eh, me, I dat Spesho Christ Guy from God!’ An dey goin bulai plenny peopo lidat. No come all shook up. You guys goin hear, ‘Dey stay fight, an get war all ova da place.’ Dat gotta happen, but dat no goin mean eryting goin come pau yet. One country goin fight anodda country. One king goin fight anodda king. Plenny diffren places, da groun goin shake hard plenny. Plenny peopo goin get notting fo eat. Dey goin suffa plenny, but all dat ony fo start.
“Watch out! Dey goin bring you guys in front dea leadas. Dey goin punish you guys wit whips inside da Jew churches. You guys goin stan in front da govnas an kings, cuz you my guys. An you goin tell um bout me. 10 But befo dis stuff happen, all da diffren peopos all ova da world gotta hear da Good Stuff From God. 11 Erytime dey bus you guys, an bring you in front da judge, no worry wat you goin tell. Ony tell wat da Spirit tell you right den an dea. Dat time goin be da Good An Spesho Spirit stay talk, not you. 12 Braddahs goin sell out dea braddahs fo mahke, an da faddahs goin sell out dea kids. Kids goin fight dea muddah an faddah, an set um up fo mahke. 13  Erybody goin hate you cuz you my guys. But whoeva hang in dea to da end, dey goin come out good.
Da Real Bad Ting
(Matthew 24:15-28; Luke 21:20-24; Daniel 9:27; 11:31; 12:11)
14  “Someting goin happen dat God hate plenny. Da bad ting goin stan wea not suppose to. Dat ting so horraz, goin make erybody bag from dea. (Whoeva read dis, dey gotta watch out.) You know, wen you guys see dat happen, if you stay Judea side, run to da mountains. 15  If you stay on top one house dat get flat roof, no go inside fo take yoa stuffs wit you. 16 If you stay inside da fields, no go home fo get yoa clotheses.
17 “Dat time goin get hard time fo da hapai wahines an da muddahs dat stay breas feed dea bebes! 18 Go aks God fo no let dis stuff happen winta time. 19  Cuz dat time erybody goin suffa to da max. Neva get notting lidat eva happen befo, not even from wen God wen make da world till now, an no goin get notting lidat eva goin happen one mo time. 20 If Da One In Charge no make dat time mo short, nobody goin come out okay. But fo help da peopo dat Da One In Charge wen pick, he goin make dat big trouble time mo short.
21 “Dat time, if somebody tell you guys, ‘Eh, look! Christ, da Spesho Guy God Wen Sen, he stay ova hea! He stay ova dea!’ no go trus dat kine guy! 22 Goin get plenny fake kine guys dat tell dey Christ, an goin get plenny fake kine guys dat tell dey talk fo God. Dey goin do unreal an awesome stuff fo try show proof dat dey fo real, an dey goin even try bulai da peopo dat God wen pick, if can. 23 Watch out, aah! Befo all dat happen, I stay tell you guys eryting now awready.”
Da Fo Real Kine Guy Goin Come Back
(Matthew 24:29-31; Luke 21:25-28; Isaiah 13:10; 34:4; Joel 2:10, 31; 3:15; Daniel 7:13-14)
24  “Right afta dat time fo suffa,
Da sun goin come black.
Da moon no goin shine.
25  Da stars goin fall down from da sky.
An all da spirits inside da sky dat get powa,
Dey goin come all hamajang.
26  “I da Fo Real Kine Guy. Dat time, da peopo goin see me come inside da clouds wit all kine powa, an I goin be awesome! 27 Den I goin sen my angel messenja guys fo bring togedda all da peopo God wen pick from all ova da world, ery place dat get unda da sky.
Da Fig Tree Teach Us Someting
(Matthew 24:32-35; Luke 21:29-33)
28 “Eh, you guys, try learn someting from da fig tree. Erytime da fig tree make new branch an get new leafs, you guys know dat summa time stay come. 29 Same ting, wen you guys see all dis stuff happen, den you goin know, I stay come, an eryting stay ready, jalike I outside da door. 30 Dass right! An I like tell you guys dis too: From da peopo dat stay hea right now, get guys dat no goin mahke befo all dis stuff goin happen. 31 Da sky an da world goin go way, but da tings I tell no goin go way foeva.
Nobody Know Da Day O Da Time
(Matthew 24:36-44; 25:13-14; Luke 12:36-38)
32  “Nobody know wen all dat goin happen, not even da day, o da time. Da angel messenja guys inside da sky, even dem, dey donno. Even me, I God Boy, an I donno da time. Ony my Faddah know da time! 33 So watch out! Get ready! Cuz you guys donno wat time Da One In Charge a you goin come back. 34  Jalike one guy go on one trip. Befo he go, he tell his worka guys, ‘Go come an take kea my house.’ All dem get someting fo do. He tell da security guard, ‘Get ready!’ 35 You guys gotta make lidat! Get ready! Cuz you guys donno da time I goin come back. Maybe afta da sun go down, o midnite, o real early in da morning wen da roosta crow, o wen da sun come up. 36 If I come wen you not ready, you no goin like if I find you guys stay sleeping, aah? 37 I tell you guys an erybody dis: Get ready an watch real good!”
13:9 13:9: Matt 10:17-20; Luke 12:11-12 13:13 13:13: Matt 10:22 13:14 13:14: Dan 9:27; 11:31; 12:11 13:15 13:15: Luke 17:31 13:19 13:19: Dan 12:1; JShow 7:14 13:24 13:24 a: Isa 13:10; Joel 2:10, 31; 3:15; JShow 6:12; Isa 13:10; Ezek 32:7 13:25 13:25 a: Isa 34:4; JShow 6:13; Joel 2:10 13:26 13:26: Dan 7:13; JShow 1:7 13:32 13:32: Matt 24:36 13:34 13:34: Luke 12:36-38