4
Da Farma Dat Plant Seed Story
(Matthew 13:1-9; Luke 8:4-8)
Anodda time Jesus teach by da lake. Plenny peopo come aroun him, so he go inside one boat, an sit down dea. Da boat stay inside da lake. Da peopo, dey stay stan on da beach. He tell plenny stories fo teach um. Dis wat he tell:
“Lissen up! You guys wen hear da farma guy story? He go throw seeds fo plant. Some fall down by da trail, an da birds eat um up. Some fall down on top da rocks wea had ony litto bit dirt. Da plants grow up fas, no matta ony litto bit dirt dea. But wen da sun come up, da plants dry up cuz no mo deep root. Odda seed fall down inside da kine bushes wit thorns. Da bushes grow up, an choke da wheat, so no mo wheat. Odda seed, dey fall down inside da good dirt, an dey grow up good, an come up plenny. Some seed, dey give back thirty time moa, some odda seed give back sixty time moa, an some seed even give back hundred time moa.”
Jesus tell, “If you guys hear dis, den lissen up real good!”
How Come Jesus Teach Wit Stories?
(Matthew 13:10-17; Luke 8:9-10; Isaiah 6:9-10)
10 Wen Jesus stay ony wit da twelve guys he stay teach an some odda peopo, dey aks him wat da stories mean. 11 He tell, “God let you guys know all da stuff bout how he stay King. But da odda peopo on da outside, I tell stories fo teach dem.
12  “Dass fo make happen jalike Isaiah wen tell dat God tell,
“ ‘Dey see wat I stay do, but dey no can see fo real kine.
Dey hear wat I tell, but dey no can hear fo real kine.
If dey fo real kine fo see an hear,
Den dey goin change,
An I goin let um go an hemo dea shame
Fo all da bad kine stuff dey wen do.’ ”
Wat Da Story Mean
(Matthew 13:18-23; Luke 8:11-15)
13 Jesus tell um, “You guys no undastan dis story? Den how you guys goin undastan da odda stories?
14 “Da farma plant da seed. He jalike da guy dat tell wat God tell.
15 “Da seed dat fall down by da trail, dass jalike wen one guy hear wat God tell, an right den an dea Satan come an jam up da guy so he no can rememba wat he wen hear.
16 “Da seed dat fall down on top da rocks, dass jalike wen one guy hear wat God tell, an right den an dea he stay plenny good inside. 17 But da guy, he jalike da plant dat no mo deep root inside him. He stick wit um fo one short time. But wen get trouble, o wen da peopo make him suffa cuz he trus da stuff he wen hear, da guy give up right den an dea.
18 “Da seed dat fall down inside da kine bushes wit thorns, dass jalike wen one guy hear wat God tell, 19 but bumbye da guy all bodda bout all da stuffs he need hea inside dis world. He like come rich, an all dat throw him off. Az why all dat stuff choke out all da tings God tell dat was inside him. He no can do da right tings. He jalike one wheat plant dat no can give wheat, cuz stay growing inside da kine bushes wit thorns.
20 “Da seed dat fall down inside da good dirt, dass jalike wen one guy hear wat God tell an trus um. Da guy do da right tings, jalike da good plant dat give wheat. All da good stuff da guy do, he do um thirty time moa, some guys do um sixty time moa, an some odda guys hundred time moa.”
Da Lamp On Top Da Shelf
(Luke 8:16-18)
21  Den Jesus tell dem, “Eh, try tell me dis. You bring da lamp fo put um unda one bowl? O you put um unda da bed? Nah! You goin put um on top da shelf fo you see da light, aah? 22  Kay den, wateva you no undastan now, you goin undastan bumbye. 23 If you guys hear dis, den lissen up real good!”
24  He tell um dis too: “Tink real good bout wat you hear. If you do dat, God goin give you even mo fo know. 25  If you guys undastan all da kine stuff, den God goin tell you moa. But if you guys no like know all dat stuff, den God goin make you foget even da litto bit you know now.”
Nobody Know How Da Seeds Grow,
But Dey Grow
26 Jesus tell um anodda story. He tell: “Wen God stay king, dass jalike one farma dat throw da seeds all ova da groun. 27 Nite time an day time, no matta he sleep o wake up, da plant goin poke da head up from da groun an goin grow, even if da farma guy donno how. 28 Da dirt no need nobody fo help um make da wheat. Firs da stalk come, den da head, den da food inside da head. 29  Wen da wheat come ripe, da farma harves um wit da sickle, cuz dey stay ready.”
Da Mustard Seed Story
(Matthew 13:31-32; Luke 13:18-19)
30 Jesus tell um anodda story. “God, he stay King. Wat story I get fo tell you guys fo you undastan? 31 Wen God stay king, dass jalike one mustard seed. Dat seed mo small den all da odda seeds, you know. If get one guy plant um inside his field, 32 an da seed grow, da plant come mo big den all da odda plants in da garden. Da branches real big, az how da birds from da sky sit on top um in da shade!”
Jesus Ony Teach Dem Wit Stories
(Matthew 13:34-35)
33 Jesus teach da peopo wit plenny stories lidat. He ony tell dem stuff dey can undastan. 34 He neva teach dem odda stuff, ony wit stories. But erytime he stay ony wit da guys he stay teach, he tell dem wat da stories mean.
Jesus Make Da Storm Pau
(Matthew 8:23-27; Luke 8:22-25)
35 Dat time afta da sun go down, Jesus tell his guys, “Eh, we go da odda side a da lake.” 36 Dey leave all da peopo, an Jesus guys take him inside da boat. Had odda boats dea too. 37 Den get one big storm ova dea. Da waves stay bussing ova da boat an da boat almos huli. 38 But Jesus still yet stay sleep in da back on one pillow. His guys go wake him up, an tell um, “Eh, Teacha! You no kea us goin mahke, o wat?”
39 Jesus get up, an scold da wind an da waves. He tell, “Quiet! Come calm!” Den da wind die down an da watta come calm. 40 An he tell his guys, “How come you guys sked? You guys no trus me, o wat?”
41 Dey so sked, dey tell each odda, “Eh, wat kine guy dis? Even da wind an da waves do wat he tell um fo do!”
4:1 4:1: Luke 5:1-3 4:12 4:12: Isa 6:9-10 4:21 4:21: Matt 5:15; Luke 11:33 4:22 4:22: Matt 10:26; Luke 12:2 4:24 4:24: Matt 7:2; Luke 6:38 4:25 4:25: Matt 13:12; 25:29; Luke 19:26 4:29 4:29: Joel 3:13