8
Jesus Feed Four Tousand Guys
(Matthew 15:32-39)
Dat time plenny peopo come aroun Jesus. Dey no mo food, so he tell his guys fo come by him. He tell, “Eh, I get pity fo da peopo. Dey stay hea wit me three days awready, an dey no mo notting fo eat. I no like sen um away hungry. Bumbye dey goin pass out on da way home. You know, some peopo wen come from far away.”
But his guys tell, “Eh, we stay in da boonies, you know. An get plenny peopo. Wea we goin find enuff food fo feed um?”
But Jesus tell, “How much bread you guys get?”
Dey tell him, “Seven small breads.”
So Jesus tell da peopo fo sit down on top da groun. An he take da seven breads, an tell God “Mahalo plenny!” fo um. Den he broke um up, an give um to his guys. An da guys give um to all da peopo. Had some small fish too. So Jesus tell God he get one good heart fo give um da food. He tell his guys fo give um to da peopo.
Dey all eat an come full. An Jesus guys pick up da lefovas, seven big baskets full. Had bout four tousan guys dea dat wen eat. Den he tell um, “Go home now.”
Show Us Proof!
(Matthew 16:1-4)
10 Right den an dea he go inside one boat wit his guys. Dey go Dalmanuta side. 11  Da Pharisee guys come fo make argue wit Jesus. Dey like poin finga him, az why dey tell, “Do someting awesome lidat, fo us guys see proof dat you come from God in da sky.”
12  Jesus moan from deep inside, an tell, “How come da peopo nowdays erytime like see someting awesome? Dass how dey stay, but I tell you guys, dey no goin see notting!” 13 Den he go way from dem, go back inside da boat, an go da odda side a da lake.
Wat Da Pharisee Guys An Herod Teach
(Matthew 16:5-12)
14 Jesus guys wen foget da bread. Ony had one small bread dea inside da boat. 15  Jesus tell um, “Watch out fo da yeast from da Pharisee guys an King Herod. Dey jalike da yeast dat make da bread mo big.”
16 Jesus guys stay talk, an try fo figga out wat he mean. Dey tell, “He stay talk lidat cuz we neva bring bread!”
17 Jesus know wat dey stay talk bout, an he tell, “Wat you guys stay talk bout, no mo bread?! You guys no undastan, still yet? You guys hard head, az why. 18  You guys get eyes but no can see, an ears but no can hear. You guys foget awready, o wat?! 19 Wen I wen broke up da five breads fo da five tousan guys, how much big baskets lefovas you wen pick up afta?”
Dey tell, “Twelve.”
20 “An da seven breads dat wen feed four tousan guys, how much big baskets lefovas you wen pick up afta?”
Dey tell, “Seven.”
21 Jesus tell um, “You guys! You still yet no undastan who me!”
Jesus Make One Blind Guy
Come Good Betsaida Side
22 Jesus dem go Betsaida. Some peopo bring one blind guy, an beg Jesus fo touch him. 23 He take da blind guy by da hand, an dey go outside dat small town. Jesus spit on da guy eyes, an put his hands on top him, an tell him, “Wat you see now?”
24 Da guy look up an tell, “I see peopo, but dey look jalike trees dat walk aroun!”
25 Den Jesus put his hands on top da guy eyes one mo time. Da guy open his eyes wide, his eyes come good, an he can see eryting real good. 26 Den Jesus tell him, “Go home, but no go inside da town.”
Wat Peter Tell Bout Jesus
(Matthew 16:13-20; Luke 9:18-21)
27 Jesus dem go da small towns Cesarea side, da place King Philip wen build. Wen dey stay go, he tell um: “Eh, who da peopo tell who me?”
28  Dey tell, “Some peopo tell, you John Da Baptiza Guy. Get odda peopo dat tell, you Elijah. An get odda peopo dat tell you jalike da odda guys dat wen talk fo God befo time.”
29  Den Jesus tell, “Kay den. Wat bout you guys? Who you guys tink me?”
Peter tell, “You da Christ Guy, Da Spesho Guy God Wen Sen.”
30 Den Jesus tell his guys, “No go tell nobody dat I da Spesho Guy God Wen Sen.”
Jesus Tell He Goin Mahke
An Come Back Alive
(Matthew 16:21-28; Luke 9:22-27)
31 Den Jesus start fo teach his guys. He tell, “I Da Fo Real Kine Guy, you know, an I gotta suffa plenny. All da older leadas, da Main Pries guys, an da teacha guys dat teach da Rules From God, dey goin figga I not fo real, an dey goin kill me fo dat. But I goin come back alive afta three days.” 32 He no hold back bout dis. Den Peter take him on da side an scold him. He tell, “Eh! No way, Boss! No way dass goin happen to you!”
33 But Jesus turn aroun, look at his guys, an scold Peter. He tell, “Get outa my way. You stay ack jalike Satan! You tink jalike da peopo tink, not jalike God tink.”
34  Den he tell all da peopo an his guys fo come by him. He tell, “Whoeva like stay tight wit me, gotta make up dea mind, dat I goin be da boss ova dem, not dem. Goin be hard, jalike az hard fo mahke on top one cross. But wen me, not dem, da boss ova dem, den dey can stay tight wit me. 35  If bodda you dat you goin mahke, fo shua you goin mahke. But if you like do eryting you do fo me, an fo teach da Good Stuff From God, an no bodda you if you mahke fo dat, den you goin live fo real kine. 36 Poho dis: one guy get eryting inside dis world, but da guy end up cut off from God foeva, an no mo da real kine life inside. 37 You figga you rich enuff fo buy back yoa life, o wat?
38 “Da peopo nowdays in dis world, jalike dey stay fool aroun behind God back, an do all kine stuff dey not suppose to do. Anybody dat come shame a me an da tings I tell, kay den, wen I come back, I goin come shame a dem, cuz I da Fo Real Kine Guy. I goin come back wit my spesho angel guys, an I goin be awesome, jalike my Faddah awesome.”
8:11 8:11: Matt 12:38; Luke 11:16 8:12 8:12: Matt 12:39; Luke 11:29 8:15 8:15: Luke 12:1 8:18 8:18: Jer 5:21; Ezek 12:2; Mark 4:12 8:28 8:28: Mark 6:14-15; Luke 9:7-8 8:29 8:29: John 6:68-69 8:34 8:34: Matt 10:38; Luke 14:27 8:35 8:35: Matt 10:39; Luke 17:33; John 12:25