Jesus Go Inside Jerusalem
Jalike One King
(Mark 11:1-11; Luke 19:28-38; John 12:12-19; Isaiah 62:11; Zekariah 9:9; Songs 118:26)
1 Den Jesus dem come nea Jerusalem an come Betpage, da small town on top da Olive Ridge. Jesus tell two guys he stay teach,
2 “You guys know dat town ova dea? Go inside dea. Wen you guys go inside da town, right dea you guys goin find one donkey dat stay tie up, an her bebe donkey stay dea too. Hemo da rope from da fence, an bring um ova hea fo me.
3 If somebody go aks you guys, ‘Eh, how come you guys stay do dat?’ tell him, ‘Da Boss Jesus need um.’ An right den an dea da guy goin let da donkeys go.”
4 Dass wat da guy dat talk fo God long time befo time tell goin happen,
5 “Go tell Zion town,
Eh, look! Yoa King stay come by you,
He make nice kine to erybody,
He stay ride on top one donkey,
Even one real young donkey.”
6 Az why Jesus guys go do wat he wen tell um fo do.
7 Dey bring da donkey an her bebe by Jesus. Dey throw dea coats on top um, an Jesus sit on top um.
8 Plenny peopo put dea coats down on top da road too, jalike fo one king. Odda guys cut branches from da trees an put um down on top da road fo show respeck fo Jesus.
9 An plenny guys stay walk in front an behind, an yell,
“Hui! God goin take us outa da bad kine stuff we stay in!
Dis guy from King David ohana,
God goin do plenny good kine stuff fo him.
He da guy dat come wit powa from Da One In Charge!
Da awesome God goin take us
Outa da bad kine stuff we stay in!”
10 Wen Jesus go inside Jerusalem, all da peopo stay amping out, an dey tell, “Eh, who dat?”
11 An plenny peopo tell um, “Dass da Guy dat talk fo God. Az Jesus from Nazaret town, Galilee side.”
Jesus Inside Da Open Lanai Fo Da Temple
(Mark 11:15-19; Luke 19:45-48; John 2:13-22; Isaiah 56:7; 60:7; Jeremiah 7:11; Songs 8:3)
12 Den Jesus go inside da open lanai fo da temple, an he throw out all da guys dat stay buy an sell stuff ova dea. He huli da tables wea dey sell da spesho kine money fo give to da temple, an da stools fo da guys dat sell doves fo make sacrifice.
13 He tell all dose peopo, “Da Bible tell, ‘My temple goin be one house fo pray inside.’ But you guys stay make um jalike one hangout fo crooks!”
14 Den da blind guys an da guys dat no can walk go by Jesus inside da open lanai fo da temple, an he make um come good.
15 But da Main Pries guys an da teachas dat teach da Rules From God see all da awesome stuff Jesus do. An dey see all da kids stay yell inside da open lanai fo da temple. Da kids tell,
“Eh! Garans God goin take us
Outa all da bad kine stuff we stay in!
Garans az da guy from King David ohana!”
So da pries guys an da teacha guys come huhu.
16 Dey tell Jesus, “Eh, you hear how dese kids stay talking? Dass not good!”
But Jesus tell um, “Yeah, I hear um. Wassamatta you? You guys neva read wat da Bible tell?
“ ‘Outa da mout a da bebes an da small kids,
You let dem tell all da kine good stuff bout you.’ ”
17 Den he go way from dem, an go Betany, da small town outside Jerusalem, an stay ova dea.
Da Fig Tree Dat No Mo Fruit
(Mark 11:12-14, 20-24)
18 Da nex morning, wen Jesus stay go Jerusalem town one mo time, he come real hungry.
19 He spock one fig tree by da road. He go ova dea, an ony find leafs, no mo fruit notting. He tell um, “You no goin give fruit no moa!” Right den an dea da fig tree go dry up.
20 His guys see dat. Dey tell, “Wow! Fas da fig tree dry up!” Dey no can figga how come.
21 Jesus tell um, “Az right! An I tell you guys dis too: If you guys trus God an tink you no stay shua, you goin do da kine tings you wen see me do to dis fig tree. You goin even tell dis mountain ova hea, ‘Eh, get up! Go jump inside da ocean,’ an goin be lidat.
22 Wen you guys pray, eryting you go aks God fo do, trus um jalike you get um awready, an dat goin happen.”
Wat Right Jesus Get Fo Do Wat He Do?
(Mark 11:27-33; Luke 20:1-8)
23 Den Jesus go inside da open lanai fo da temple, an teach da peopo. Da Main Pries guys an da older leadas fo da peopo go by him. Dey tell um, “Wat right you get fo do dis kine stuff? Who tell you good fo you do um?”
24 Jesus tell um, “I like aks you guys one question. You tell me, an den I tell you guys wat right I get fo do dis kine stuff.
25 Da guy John, wen he wen baptize peopo, wea he get da right fo do dat? God in da sky, he give um da right? O da peopo, dey give um da right?”
Da Main Pries guys make argue wit each odda. Dey tell, “If we tell him, ‘God in da sky give um da right,’ he goin tell, ‘How come you guys neva stay shua az fo real kine den wat he tell?’
26 But if we tell, ‘Da peopo give um da right,’ no way! You know, us guys sked wat da peopo goin do, cuz da peopo figga dat John wen talk fo God.”
27 So dey tell him, “Eh, we donno.”
Den Jesus tell, “Kay den, I no goin tell you guys from wea I get da right fo do wat I do.”
Da Two Boys Story
28 “Wat you guys figga bout dis story, bout one guy dat get two boys? He tell da firs boy, ‘Eh, boy, go work da grape farm today.’
29 “But he tell, ‘No. I no goin go.’ Afta dat da boy tink diffren, so he go work inside da grape farm.
30 “Da faddah tell da odda boy da same ting, an he tell, ‘Yeah, I goin go.’ But he neva go.
31 How you guys figga? Wat boy wen do wat da faddah like?”
Dey tell him, “Da firs boy, fo shua.”
Jesus tell, “Dass right! I tell you guys, da guys dat colleck tax money fo da govmen, an da wahines dat fool aroun fo money, dey goin get God fo dea king befo you guys get um.
32 John Da Baptiza Guy wen teach you guys da right way, an you guys neva stay shua wat he tell stay fo real kine. But da tax guys an da wahines dat fool aroun fo money, dey stay fo shua. You guys wen see dat, an you guys still yet neva come sorry fo all da kine bad stuff you guys do an no do um no moa. No matta you wen see dat dose peopo stay shua wat he tell stay fo real kine, you guys still yet no stay shua wat he tell stay fo real kine.”
Da Guys Dat Rent One Grape Farm
(Mark 12:1-12; Luke 20:9-19; Isaiah 5:1-2; Songs 118:22-23)
33 “Try lissen dis story fo you learn someting. Dis one bout da guy dat go plant one grape farm. He make one fence aroun um, an dig one hole inside da groun fo squeeze da grapes, an he build one watch towa. Den he rent da grape farm to some farma guys an go far away.
34 “Wen time fo harves da grapes, da boss guy sen some worka guys fo get his share from da farma guys.
35 But da farma guys grab um, an bus up one guy, an kill anodda, an throw stones at da odda worka guy.
36 Da boss sen plenny mo worka guys, mo den befo, an da farma guys do da same ting to dem, jalike dey do to da odda worka guys.
37 “In da end da boss sen his boy. He tell, ‘Eh, dey goin show respeck fo my boy.’
38 “But wen da farma guys spock da boy, dey tell each odda, ‘Eh, dis da guy goin own da farm. Go come, we go kill him an take ova da farm.’
39 So dey grab da boy, an throw um outside da farm, an kill um.
40 “Den, wen da boss dat own da grape farm come, wat you guys figga he goin do to dem?”
41 Da leada guys tell, “He goin kill da bad guys, an den he goin rent da field to some odda guys, dat goin give him his share wen da time come.”
42 Den Jesus tell um, “You guys neva read dis inside da Bible, o wat? bout da stone dass jalike me:
“Had one big stone,
Da builda guys stay figga,
‘Poho! Dis stone no good!’
An dey throw um out.
But dat stone,
Dass da corna block
Fo make da building strong.
Da One In Charge wen do dis, aah?
An dis awesome!”
43 “I tell you guys, God goin be king fo odda peopos dat do good kine stuff jalike he do. But he no goin be king fo yoa peopo no moa.
44 [Me, da main stone. Da guy dat trip an fall down on top dis stone, da stone goin broke him in small pieces. If dis stone fall down on top one guy, da stone goin make him jalike dus.]”
45 Wen da Main Pries guys an da Pharisee guys hear da stories, dey know Jesus stay talk bout dem.
46 An dey like grab him fo put him inside prison. But dey sked da peopo, cuz da peopo figga he one guy dat talk fo God.