24
1 Dis time, wen Balaam see dat Da One In Charge do good kine tings fo da Israel peopo, he no go way an make one religious kine ceremony fo find out wat Da One In Charge like. He jus turn an look da boonies.
2 Wen he look out dea, he see da Israel peopo inside dea camp wit ery ohana togedda. Den God Spirit take ova him,
3 an he tell dis spesho message from God:
“Dis da word from Balaam, Beor boy,
Da word from me,
Da man dat see tings real good now.
4 I hear da word dat God tell.
I see someting jalike one dream
From Da God Dat Get All Da Powa.
I go down in front dat God
An see tings real good:
5 “Eh, you Jacob peopo! Yoa tents look good!
You Israel peopo, nice wea you stay!
6 “Yoa tents spread out jalike palm trees in da valleys,
Jalike gardens nea one riva,
Jalike aloes dat Da One In Charge wen plant,
Jalike cedar trees nea da watta.
7 Da watta goin spill ova from dea buckets.
Da peopo dat goin come from dem
Goin get plenny watta.
“Dea king goin be mo awesome den Agag.
His peopo goin come real importan.
8 “Da God dat wen bring his peopo outa Egypt,
He make dem strong jalike one wild bull.
Jalike dey eat up da peopos dat stay agains dem.
Dey broke dea bones
An shoot um wit arrows.
9 Jalike one lion
Dey crawl an lay down.
An jalike da wahine lion,
Nobody like wake her up!
“Da ones dat talk good bout you guys,
I like good tings happen to dem.
Da ones dat try put kahuna on top you guys,
I like dem get kahuna on top dem!”
10 Balak come real huhu wit Balaam. He poun his hands togedda an tell, “I wen tell you fo come ova hea fo put kahuna on top da peopo dat come agains me! But you, wat you wen do?! Three time awready, you tell Da One In Charge fo do good tings fo dem!
11 Now get outa hea fas! Go home! I wen tell you I goin pay you good, but Da One In Charge hold you back from get yoa pay!”
12 Balaam tell Balak, “Eh! I even tell da messenja guys you wen sen by me,
13 ‘No matta Balak give me his palace fill up wit silva an gold, I no can do notting good o bad, but ony wat Da One In Charge tell me fo do. I gotta tell ony wat he tell me fo tell.’
14 Kay den, now I goin go back by my peopo. But let me tell you wass good fo you know—I tell wat da Israel peopo goin do to yoa peopo bumbye.”
Da Numba Four Ting Balaam Tell
15 Den Balaam tell dis spesho message from God:
“Dis da word from Balaam, Beor boy,
Da word from me,
Da man dat see tings real good now.
16 Da word from da guy dat hear wat God tell,
Who learn stuff from da God Dass Mo Importan Den All Da Odda Gods.
Da guy dat see someting jalike one dream
From Da God Dat Get All Da Powa.
I go down in front him
An see tings real good:
17 “I see him, but az not fo now.
Wat I see, no stay nea.
One star goin come out from da Jacob peopo.
One king goin come from da Israel peopo.
He goin smash da Moab peopo head,
An da skulls a da Shet peopo.
18 He goin take ova da Edom peopo.
Even da guys from Seir dat hate him,
He goin take ova dem.
But da Israel peopo goin come mo strong.
19 Goin get one leada come from da Jacob peopo.
He goin wipe out erybody dat stay alive still yet inside Ar town.”
Da Las Tings Balaam Tell
20 Den Balaam look wea da Amalek peopo stay. He tell dis spesho message from God:
“Da Amalek peopo was numba one wit da odda nations,
But bumbye dey goin come wipe out.”
21 Den Balaam look wea da Ken peopo stay, an tell dis spesho message from God:
“Wea you live, goin stay long time.
Jalike one bird, you wen put yoa nes on top one cliff.
22 But yoa main town Kayin goin burn up
Wen da Asshurim guys make you guys dea prisonas.”
23 Den Balaam tell dis spesho message from God:
“Bummahs! Who can stay alive wen God make all dis happen?!
24 Goin get big boats come from aroun Cyprus Islan.
Dey goin win ova da Asshur peopo an da Eber peopo.
But da Cyprus Islan boats goin come wipe out too, foeva.”
25 Den Balaam get up fo go back wea he come from. An Balak go his place.