2
Get Da Same Kine Good Heart
An Head Jalike Christ
1 Cuz all us guys stay tight wit God Spesho Guy Christ, you know he give us plenny good kine words. He show love an aloha fo us guys, so we no need stay sad inside. God Spirit help us all come togedda. An we all feel aloha an pity fo each odda fo real kine.
2 Dass how stay, aah? So! You know how you guys can make me feel real good inside? All you guys, try tink bout tings da same way. Try get da same kine love an aloha fo each odda, an da same kine good heart an head jalike Christ.
3 No go do stuff cuz you tink you mo betta den da odda guys, o cuz you like make one big show. Mo betta, figga lidis: odda peopo can do some tings mo betta den you. No get big head.
4 No good you ony tink bout da tings you tink stay importan—make shua you tink bout da tings da odda peopo tink stay importan too.
One Song Bout Christ
5 All you guys, figga lidis, jalike Jesus Christ.
6 Jesus, he erytime stay jalike God.
But no matta,
He neva tink he gotta go hang on to dat.
7 He let um all go
Fo him come one pooa worka guy,
An come jalike peopo.
Wen da peopo see him,
Dey tink he jus one guy.
8 He make jalike he no stay importan.
He do eryting God tell um fo do,
Even if he gotta mahke.
An not jus regula kine mahke, you know.
Was mo worse, he gotta mahke on top one cross!
9 Dass why God make Jesus da Main Guy.
He give him one spesho name,
Fo tell wat kine guy him.
Cuz he mo importan den all da big name guys!
10 So erybody, wen dey find out wat kine guy Jesus,
Dey goin go down on dea knees in front him.
Erybody up dea inside da sky,
An all ova da world,
An undaneat da groun!
11 Wit dea mout, erybody goin tell,
“Jesus Christ, da Spesho Guy God Wen Sen,
He Da One In Charge!”
Cuz a dat, peopo goin tell,
“God da Faddah, he awesome fo shua!”
Us Guys Shine Jalike Da Stars,
Hea Inside Da World
12 So den, my good frenz, you guys erytime stay do wat God tell you fo do. Wen I was wit you guys, dass how you guys wen live. An now, wen I not wit you guys, you guys stay do um even mo plenny. Do eryting you guys gotta do cuz God take you guys outa da bad kine stuff you wen do befo time. Do um jalike you guys sked an shaking in front God.
13 God, he da One stay make you guys like do da tings he like you fo do. An he help you guys fo do um.
14 Eryting you guys do, no grumble, no make argue.
15 Den nobody can poin finga you guys cuz you guys ony do good kine stuff. Fo real, you guys God kids! Erybody all aroun you guys stay crooked an all jam up. But you guys, you diffren. You erytime do wass right, hea inside da world. Dass jalike da stars dat shine no matta stay dark all ova.
16 You guys tell erybody da tings God wen tell you, fo make peopo come alive inside fo real kine. Dat goin make me real proud a you guys bumbye wen Jesus come back! Wen dat happen, den I goin know dat da hard work I wen do, no was fo notting! An da race I wen run, no was wase time!
17 Da way you guys trus God, he like dat. Dass jalike you stay make one spesho sacrifice fo him. Same ting wit me—even if da odda peopo make me bleed an mahke, dass jalike fo pour wine on top da sacrifice you guys stay make. I goin feel real good inside bout dat, an bout wat stay happen wit you guys too!
18 An same ting wit you guys. You guys goin feel good bout wat stay happen to me jalike I goin feel good bout um.
Timoty
19 Pretty soon I like sen Timoty by you guys, if dass wat Jesus, Da One In Charge, like me fo do. I like find out how you guys stay, an wassup wit you guys. Dat goin make me feel good inside.
20 Timoty, he da ony guy ova hea by me dat tink bout tings jalike me. Fo real kine, he tink plenny how fo kokua you guys.
21 You know, all da odda peopo ova hea, dey all tink wateva dey stay do, az da mos importan ting—dey no tink dat fo do stuff fo Jesus Christ da mos importan ting.
22 An you guys know wat kine guy Timoty—you know he get da stuff fo do da job. Him an me, we work togedda fo tell da Good Kine Stuff From God. Jalike him my boy an me his faddah.
23 Dass why, az him da guy I like sen. I goin sen him right afta I find out wass goin happen to me.
24 I stay shua I goin go by you guys pretty soon cuz dass wat Da One In Charge like.
Epafroditus
25 I figga I gotta sen Epafroditus back by you guys. He one braddah fo real kine, an he work an get hard time same jalike me. You guys wen sen him ova hea fo tell me how you guys stay, an fo kokua me wateva I need cuz he stay work fo God.
26 He tink plenny bout all you guys. Bodda him plenny dat you guys wen hear he stay sick.
27 Da guy was sick fo shua—he litto mo mahke. But God get pity fo him, an give him chance fo come good. An God get pity fo me too, so I no come all sore inside—eh, you know, I stay plenny sore inside awready.
28 Dass why fo real kine I sen him back ova dea. Wen you guys see him one mo time, you guys goin feel good inside, an me, I no need worry notting.
29 Az why good you take him in an show him plenny aloha, cuz you guys stay tight wit Da One In Charge. You guys can feel good inside bout da guy. You gotta figga, anybody dat do wat Epafroditus wen do, gotta show um plenny respeck.
30 He wen work fo Christ. Dass why he litto mo mahke. He do all da kine stuff dat you guys neva can do fo kokua me, an neva bodda him if he mahke. He wen chance um.