18
1 Da kine guy dat no like somebody tell him wat fo do
Look ony fo da kine stuff he like.
He no make um so notting bodda him
Wen you talk to him bout wass smart fo him do.
2 Same ting, da kine guy dat tink he know eryting
But he donno notting,
He no like bodda fo undastan stuff.
He ony like talk bout wat he tink.
3 You do bad kine stuff,
Peopo goin talk bad bout you.
Wen dey no mo respeck fo you,
Dey goin make you come shame.
4 Wen some peopo talk,
Hard fo tink wat dey like do,
Jalike hard fo know wat stay inside da deep ocean.
But wen da peopo dat know wat fo do erytime talk,
You learn plenny from dem,
Jalike dey one strong riva wit plenny watta you can drink.
5 No good, one judge ony lissen
To da guy dat do someting bad,
An no lissen da guy dat stay hurt.
Same ting, no good, if one judge go agains
Da guy dat do wass right,
An no do fo him wass right.
6 Da kine peopo dat tink dey know eryting but dey donno um,
Weneva dey open dea mout,
Somebody goin like fight wit dem.
Wateva dey tell,
Make odda peopo like use one whip fo wack um.
7 Wen da kine peopo talk dat tink dey know eryting awready,
Eryting dey tell get um in trouble.
How dey talk, jalike one trap fo kill um.
8 Wen peopo talk bad,
Odda peopo like lissen wat dey goin tell,
Az jalike dey stay eat candy!
But wat dey hear, goin stay inside dem.
9 Anybody stay lazy
Wen he gotta do da work he suppose to do,
He jalike one braddah
To da guys dat go aroun bus up eryting.
10 Wen da peopo dat stay do wass right
Know fo shua, wat kine god Da One In Charge,
Den Da One In Charge goin take kea dem.
Jalike Da One In Charge one strong towa fo dem
Wea dey can run inside fo hide.
11 Da money dat one rich guy get,
Fo him, dass jalike one strong wall aroun his town.
Da way he tink,
Da wall too strong fo anybody come inside.
12 Wen one guy tink he too good fo erybody,
Real fas, he goin come wipe out.
Wen one guy no ack high makamaka,
Real fas, peopo goin get respeck fo him.
13 Anybody open dea mout befo dey hear eryting,
Dis jalike dey go all out fo do stupid kine stuff,
An nobody goin get respeck fo dem.
14 Yoa spirit make you strong inside
Even wen you sick.
But if yoa spirit stay all bus up,
Den you no can handle notting.
15 Da peopo dat undastan good,
Easy fo dem learn stuff.
An da peopo dat know wat fo do erytime,
Dey still try fo lissen new kine stuff fo learn.
16 Wen you give one present to importan peopo,
Make um easy fo talk to dem layta,
An help you come tight wit dem.
17 Wen peopo go in front da judge,
Da guy dat poin finga somebody talk firs.
An he soun like he stay right,
Till da odda guy get chance fo tell
If da firs guy stay tell da trut.
18 Wen peopo make argue,
Pull straw fo make um stop.
Even if dey get plenny powa,
Dey no goin come togedda fo fight.
19 If you do someting
Dat make one braddah guy come huhu wit you,
Goin be mo hard fo come braddah braddah one mo time wit him,
Den fo take ova one town dat get one strong wall.
Az cuz wen you make argue wit him,
Az jalike you stay put one heavy bar fo lock yoa gate.
20 You can get wat you need fo live
By da way you talk.
Wat you get from how you talk,
Goin make you no come hungry no moa.
21 Da tings peopo tell
Get da powa fo kill odda peopo,
O fo make um come alive.
Da kine peopo dat like fo talk plenny,
Wateva dey tell, goin come back to dem.
22 If you find one wife, an she good fo you,
Az jalike you get one nice present from Da One In Charge.
23 Da guy dat no mo notting,
Tell da rich guy fo help him,
But da rich guy mout off
To da guy dat no mo notting.
24 One guy dat tink he get plenny frenz
Can get wipe out real fas.
But get anodda kine fren dat love you
An stay mo tight wit you den yoa braddah.