2
Good Tings Goin Happen
If You Know Wat Fo Do
Wen I talk to my boy, I tell um,
 
“Lissen wat I tell!
No foget da tings I stay tell you dat you gotta do,
An make shua you make dat way all da time.
An you know, da peopo dat know wat fo do,
Wen dey talk, you betta lissen good,
An work hard fo undastan da peopo
Dat know how fo do one good job.
Go yell fo get somebody
Fo help you know importan kine stuff,
Fo help you know how fo do one good job.
Try hard fo find out,
Jalike you was looking fo silva,
O fo da kine treasure dat stay bury inside da groun.
Cuz if you do dat,
Den you goin undastan fo real kine
Wat mean, ‘You betta come sked Da One In Charge.’
An bumbye you goin know God.
Cuz Da One In Charge, he da One
Dat teach peopo wat fo do.
Da stuff he tell,
Dass wat goin make you know stuff
An undastan stuff.
Wen peopo stay do da right ting,
God make um fo dem figga how fo get outa trouble,
An dass how he take kea dem.
Da peopo dat erytime do stuff da right way,
He no let notting hurt dem.
He jalike one shield
An notting can go thru him.
So God watch da way da peopo judge.
God no let notting bad happen
To da peopo dat stay tight wit him,
 
“You do all dat stuff,
An den you goin undastan wass right,
An how fo judge da right way
An make same kine to erybody,
An how fo find da good way fo go erytime.
10 Cuz inside, you goin start fo know wat fo do,
An you goin stay real good inside
Cuz you know plenny stuff.
11 Notting bad goin happen to you
Cuz you goin know how fo make one good plan,
Cuz you undastan stuff real good.
 
12 “Wen you know wat fo do erytime,
You can get outa trouble
From da peopo dat like do bad kine stuff
An from da peopo dat talk sly kine.
13 Cuz dose peopo, dey wen go da right way but dey go back,
So den dey go da dark roads wea bad tings happen.
14 Wen dey do someting bad,
Dey feel all good inside.
Wen dey make eryting kapakahi,
Same ting dey feel good.
15 Da way dey do tings, dey ony do crooked kine stuff.
Dey stay go da wrong way erytime.
 
16 “Wen you know wat fo do,
You no goin fool aroun da wahines dat not yoa wife.
Wen da kine wahines try talk nice kine to you,
You no goin lissen.
17 Dat kine wahine, she wen go dump
Da husban she had trus wen she was young,
An she no like tink bout
Da deal her an da husban wen make in front her God.
18 You go her house, easy fo fall down
Inside da Mahke Peopo Place.
Her road go strait to da place
Wea da mahke peopo spirits live.
19 Erybody come by dat kine wahine,
Garans dey not goin come back.
Dey not goin find da way
Fo get da real kine life.
 
20 “I stay tell you dis,
So den you goin make same jalike da good kine peopo.
An jalike da peopo dat stay do da right ting,
You goin stay on da same way an hang in dea.
21 Cuz da peopo dat erytime do da right ting,
Ony dem goin live long time on top dea ohana land.
Da peopo dat you no can poin finga dem, dey goin stay dea.
22 But da peopo dat no stay do wass right,
Dey goin get wipe out so dat no mo dem on top da land.
Da peopo dat you no can trus,
God goin hemo dem from dea.”