135
Da One In Charge, He Da Greates!
(Hebrews 10:30)
1 All you guys! Tell good tings
Bout Da One In Charge!
Tell good tings bout Da One In Charge
Cuz you know wat kine god him!
All you guys dat work
Fo Da One In Charge,
Tell good tings bout him!
2 Da ones dat work inside da Temple
Fo Da One In Charge
An inside da open lanai
Wea da Temple fo oua God stay,
3 Tell good tings bout Da One In Charge,
Cuz he good!
Tell wat kine god him wit music,
Cuz make you feel good
Wen you wit him.
4 Cuz Da One In Charge wen pick
Oua ancesta guy Jacob
Fo come his spesho boy,
Da same Jacob guy
Dat Da One In Charge wen give
Da name Israel,
Da One In Charge pick him
Fo be his guy.
5 Me, I know dis: Da One In Charge,
He awesome!
Oua Boss guy, he mo awesome
Den all da odda gods!
6 Eryting Da One In Charge like do, he do
In da sky, an on top da earth,
An inside da ocean,
All da way to da bottom.
7 Da One In Charge, he da one
Dat make da clouds come up
From da mos far place in da world.
He make da lightning an da rain.
He da One dat make da wind come
From da place wea he keep um.
8 Fo da Egypt peopo, he wen wack
Da numba one boy inside ery house.
He wen kill da ones dat wen born
From da Egypt peopo,
An from dea animals too.
9 Da One In Charge wen do
Awesome kine tings
Fo show who him.
He wen make miracles
In da middo a da Egypt peopo,
In front a da Pharaoh guy,
An all da peopo dat work fo him.
10 Da One In Charge wack
Plenny odda nations,
No matta dey big.
He kill dea king guys,
No matta dey strong.
11 He kill Sihon, da king fo da Amor peopo,
An Og, da king fo da Bashan peopo,
An all da odda king guys Canaan side.
12 Da One In Charge wen give dea land
To his peopo, da Israel peopo,
Fo be dea land from dat time.
13 Eh! You Da One In Charge!
Peopo goin know who you, foeva!
All da peopo dat goin come bumbye,
All dem no goin foget you,
Da One In Charge!
14 Cuz you Da One In Charge,
You da Judge!
An you goin make shua erybody know,
Dat yoa peopo do wass right.
You goin show pity
Fo da peopo dat work fo you.
15 Da idol kine gods dat da odda peopos
Make wit silva an gold,
Dey ony tings dat peopo make wit dea hands.
16 Dey get mout, but dey no can talk,
Dey get eye, but dey no can see
Notting,
17 Dey get ear, but dey no can hear notting.
Dey no mo life, cuz dey no can breave!
18 Da peopo dat make da idol kine gods,
Dey come jalike dea gods.
An same ting fo da peopo
Dat trus dat kine gods.
19 Eh! All you peopo from da Israel ohana!
Tell Da One In Charge dat he good,
Cuz he help you guys.
All you pries guys from da Aaron ohana
Tell Da One In Charge dat he good,
Cuz he help you guys!
20 All you guys from da Levi ohana
Dat help da prieses!
Tell Da One In Charge dat he good,
Cuz he help you guys.
All you guys dat feel jalike you sked
Wen you stay in front
Da One In Charge!
Tell him dat he good,
Cuz he help you guys.
21 Good fo erybody stan hea
On top Zion Hill an tell
Da One In Charge dat he good!
Tell dat to da one dat live hea
Inside Jerusalem town!
All you guys! Tell good tings
Bout Da One In Charge!