142
David Pray Fo God Help Him
(1 Samuel 22:1-2)
One poem from David, how he pray wen he hide inside da cave.
I yell fo Da One In Charge help me.
I talk loud wen I pray
To Da One In Charge
Fo give me chance.
I tell him bout my problem,
Jalike I pour eryting in front him.
I make shua he know
Wat stay bodda me.
Wen I come weak inside,
Still yet, you da one dat know
Da way fo me go.
Cuz wea I walk,
Az jalike peopo hide traps dea.
Try look aroun me fo see
No mo nobody kea fo help me!
Da place fo go wea nobody can hurt me,
Gone awready!
Nobody kea if I alive o mahke!
 
I yell fo you fo help me,
Da One In Charge.
I tell, “You, da one take kea me
Fo nobody hurt me.
I get ony you,
All da time I live inside dis world!”
Try lissen wen I yell fo you help me,
Cuz I stay all jam up!
Get me outa trouble from da peopo
Dat chase afta me,
Cuz dey mo strong den me.
Jalike I all lock up,
So get me out!
Den I goin tell good tings bout you
Cuz I know wat kine god you.
I like fo all da peopo
Dat stay do wass right
Come by me too,
Cuz you goin do good tings fo me.