148
Eryting God Make,
Tell Good Tings Bout Him
Eryting Inside Da Sky
1 Eh you guys! Tell good tings
Bout Da One In Charge!
Tell good tings bout Da One In Charge
From da mos high part a da sky!
Good, dey tell good tings bout him!
2 All you angel messenja guys
Fo Da One In Charge,
Tell good tings bout him!
All you army guys inside da sky,
Tell good tings bout him!
3 Jalike peopo tell good tings
Bout Da One In Charge,
Az good fo da sun an da moon
Do da same ting too!
An same ting fo all da stars dat shine!
4 Jalike da peopo tell good tings
Bout Da One In Charge,
Az good, fo da mos high parts a da sky
Do da same ting too!
An same ting fo all da watta
Dat stay ova da sky!
5 I like fo all dem tell good tings,
Cuz dey know wat kine god
Da One In Charge!
He wen tell wat suppose to happen
Inside da sky,
An cuz a dat, az wat wen happen
Up dea.
6 Da One In Charge, he wen put um
Wea dey suppose to be
Fo stay dea foeva.
He wen make one rule fo dem,
An dat rule no goin change.
Eryting On Top Da Earth
7 Da tings dat get on top da earth,
Make shua dey tell good tings
Bout Da One In Charge too,
An all da big animals inside da ocean,
Jalike dey tell da same ting too,
An same ting fo all da watta
In da mos deep places
In da ocean.
8 Da fire too, an da hail from da sky,
Da snow an da smoke,
Jalike dey tell good tings
Bout Da One In Charge too,
An even da hurricane too,
Dat do wat God tell um fo do.
9 Da mountains an all da hills,
Jalike dey tell good tings
Bout Da One In Charge,
An same ting fo da trees wit fruits,
An da big kine cedar trees.
10 Same ting fo da wild animals
An da farm kine animals too,
An same ting fo da tings dat run aroun
On top da groun,
An da birds dat fly.
11 Da king guys all ova da world,
An all da diffren kine peopos,
Good, dey tell good tings
Bout Da One In Charge!
Same ting fo da leada guys
An da govmen guys
All ova da world too.
12 Good, da young guys an wahines
Tell good tings bout Da One In Charge,
Da ol peopo an da young ones
Togedda too.
13 Good, dey all tell good tings
Bout Da One In Charge,
Cuz dey know wat kine god him!
Cuz he da ony one dat get
One big name dass fo real,
Fo be da mos awesome king
In all da world an inside da sky!
14 Da One In Charge
Stay make his peopo come strong.
Dass how come
Peopo tell good tings—
All da ones dat stay tight
Wit Da One In Charge,
Da Israel ohana peopo,
Da peopo dat stay tight wit him.
Eh you guys! Tell good tings
Bout Da One In Charge!