21
Tell Good Tings Bout God,
Cuz He Make Da King Da Winna
One David kine Song Fo God, fo da main music guy
1 Eh! You Da One In Charge! Da king real happy
Cuz you stay strong!
Da king like throw one party
Cuz you wen help him win da war!
2 You wen give da king da ting he like get da mostes.
You neva hold back notting dat he tell you he like.
(Time out fo da music.)
3 Eh! You Da One In Charge! Wen da king come back,
You give him yoa aloha
An make eryting come good fo him.
You put one crown on top his head,
Da kine dey make wit da bestes kine gold.
4 Da king wen tell you fo give him life,
An you wen give him long life, foeva!
5 Da One In Charge, you make peopo get plenny respeck fo da king,
Cuz you help him win da war.
You make him awesome an importan,
6 You do plenny good tings fo da king,
All da time.
You make him feel real good inside
Cuz you tell him fo stay wea you stay.
7 Eh! You Da One In Charge! You do all dat
Cuz da king trus you.
You da God Dass Mo Importan Den All Da Odda Gods,
An cuz you stay tight wit da king,
No mo nobody goin throw him out.
8 Dass how you goin handle
All da peopo dat stay agains you.
Wit yoa strong right hand,
You goin catch da ones dat stay hate you.
9 Wen you face all dose peopo,
You goin wipe um out
Jalike you put um inside one deep hole wea get fire.
Da One In Charge, he stay huhu wit dem.
Dass why he goin wipe um out.
Dey goin mahke, jalike da fire eat um up.
10 Dea peopo dat goin come from dem, same ting,
You goin wipe dem out from da earth.
Dey no goin be ancesta guys fo nobody.
11 No matta da peopo dat hate you make plan
Fo do bad tings to you,
Da stuff dey like do, dey no can do,
12 Cuz wen dey see dat you ready fo shoot dem wit arrows,
Dose peopo goin turn aroun an bag!
You ony goin see dea back side.
13 Da peopo tell:
Eh! You Da One In Charge! Stan up an show yoa powa!
Come, all us guys goin sing,
An tell erybody bout da powa you get!