50
Wen You Tell God “Mahalo!”
Dass Da Bestes Kine Sacrifice
One Asaf kine Song Fo God
Da God Wit All Da Powa,
Da One In Charge, he tell dis.
He tell da peopo
From all ova da world
Fo come by him,
From da place wea da sun come up,
To da place wea da sun go down.
From Mount Zion,
Da bestes looking place,
Dass da place wea God show
How awesome he stay!
Wen oua God come,
He no goin stay quiet.
Goin be jalike one fire go in front him
An burn up eryting!
Goin be jalike get one hurricane
Stay aroun him!
He tell da sky an da earth,
“Eh, come watch dis!
I goin judge my peopo!
Tell all da ones dat stay tight wit me
Fo come togedda by me,
Da ones dat wen make one sacrifice
Fo make one spesho deal wit me!”
Jalike da sky goin tell da story,
How God erytime do da right ting,
Cuz he da Judge.
(Time out fo da music.)
 
“Eh! You guys dat know me! Lissen up!
You Israel ohana peopo!
I goin tell da trut bout you guys!
Me, I God—
Da God fo you guys.
But wen I tell you guys you do wrong,
I no talk bout da sacrifices you make.
You guys kill animals fo me
An burn um up on top da altar
All da time.
I no need take one young bull
From yoa house
O da goats from yoa open lanai.
10 Cuz you know wat? All da wild animals
Dat live unda da trees,
Dey mines awready,
Same ting fo all da uku pile
A cows on top da hills, dey mines too.
11 All da wild birds
Dat live inside da mountains,
An all da tings dat run aroun
Wea no mo trees,
I know eryting bout dem
An I stay in charge a dem too.
 
12 “Even if I was hungry, no way I tell you,
Cuz da world an eryting dat get
Inside da world, az mines awready.
13 You tink I gotta eat bull meat
O drink blood from da goats
Fo stay alive? No way!
14 You know wat da real kine sacrifice
You suppose to make
Fo me, yoa God?
You gotta tell me ‘Mahalo!’
Fo wat I do,
An wateva promise you wen make to me,
Do um.
Dass da real kine sacrifice.
15 Erytime you get hard time,
You gotta aks me fo help you.
Den I goin get you outa trouble.
An you goin tell peopo
How awesome I stay.”
 
16 But da peopo dat stay do wass bad,
God tell um:
“Who you tink you,
Fo talk bout da stuff
I tell peopo gotta do?!
No tell notting
Bout da deal I get wit you.
17 Cuz weneva I tell you wat you gotta do,
You come all piss off.
You throw out eryting I tell.
18 If you see one guy dat rip somebody off,
Make you feel good inside.
You hang out wit da kine peopo
Dat stay fool aroun
Behind dea wife o dea husban back.
19 You use yoa mout fo do bad kine stuff,
An da way you talk,
You ony bulai peopo.
20 You tink plenny bout how fo talk bad
Bout yoa ohana guys.
You even talk bad bout yoa braddah.
21 Wen you do all dat kine stuff,
You tink I no goin say notting?!
No way!
You tink I stay jalike you?!
Not even!
I stay tell you right now,
Dat you stay do wass bad,
An I goin be in yoa face
Bout all da bad tings you wen do.
22 You peopo dat ack jalike God no matta,
Tink real good
Bout all da tings I tell you.
Cuz if you no lissen,
I goin rip you guys up,
An no mo nobody
Goin get you outa trouble.
23 Da peopo dat stay tell me ‘Mahalo!’
Fo wat I do,
Dey da ones make
Da real kine sacrifice
Fo show how awesome I stay.
An da peopo dat stay do eryting my way,
Me God goin make shua dey see
How I get um outa trouble.”
Dass wat God tell.