95
You Talk Good Bout God,
You Do Wat He Tell You Fo Do
1 Eh! Us guys yell to Da One In Charge,
Cuz us stay good inside!
Us goin make big noise
Fo da One dat stay strong
Jalike he one big rock,
Da One dat get us guys outa trouble!
2 We go da Temple fo meet him
An tell him “Mahalo plenny!”
Fo make big noise fo him wen we sing!
3 Cuz Da One In Charge,
Him da God dass fo real!
Him da awesome King dat get da powa
Ova all da odda gods.
4 From unda da ocean
To da top a da mountain,
Da One In Charge stay in charge.
5 Da ocean, he own um, cuz he wen make um.
Da dry land, he own dat too,
Cuz he da one wen put um togedda.
6 Eh come! We go down
In front Da One In Charge,
We go down in front da One
Dat wen make us guys.
7 Cuz him, he oua God.
Us guys, us da peopo he take kea of,
Jalike us guys da sheeps,
An him da sheep guy.
God Talk To Da Peopo
Dis wat I like fo you guys do today,
Lissen wat God tell you guys!
8 God tell, “Eh! No be hard head,
Jalike befo time
Wen yoa ancesta guys wen stay
Inside da boonies,
Dis da place dey call Meribah,
Cuz yoa ancesta guys wen fight me,
Dey call dat same place Massah too,
Cuz yoa ancesta guys
Wen tes me ova dea.
9 Dat time,
Yoa ancesta guys challenge me
Fo find out how I stay fo real kine.
Neva mind dey awready see plenny
Wat I do.
10 “Was forty year yoa ancesta guys
Was pilau fo me,
An cuz a dat I mad!
Dis how I wen tink:
‘Dese peopo! Inside, dey like do
Wat dey like do!
Dey donno how fo do tings my way!’
11 Cuz a dem, I wen come huhu
An make one strong promise—
I wen tell,
‘No way dese peopo goin go
Da place wea I goin make dem come
So notting bodda dem!’ ”
An dass wat God tell you guys today.