11
David Come Da King Fo Da Israel Peopo
(2 Samuel 5:1-3)
All da Israel peopo come togedda by David Hebron side. Dey tell, “Us guys yoa blood an bones too. Befo time, even wen Saul stay king, you da guy dat wen lead us Israel peopo wen we fight. An yoa God, Da One In Charge, tell you awready, ‘You da one goin take kea my peopo, da Israel peopo, jalike one sheep guy. You goin be dea leada.’ ”
Wen all da older leadas fo da Israel peopo go by King David Hebron side, he make one deal wit dem ova dea in front Da One In Charge. Dey put olive oil on top David head fo make him da king fo da Israel peopo, jalike Da One In Charge wen make one promise an tell Samuel.
David Take Ova Jerusalem
(2 Samuel 5:6-10)
David an all da Israel guys march to Jerusalem, dat befo time dey call Jebus. Get da Jebus peopo dat live dat land befo time. Dey tell David, “No way you goin come inside hea!” But David take ova da part dat get one strong wall aroun Mount Zion, dat nowdays dey call David Town.
Befo David guys go afta Jebus town, David tell, “Whoeva lead da guys fo attack da Jebus peopo, dey goin come da main leada fo all da army guys!” An az Joab, Zeruiah boy an David nephew, dat go up firs, an he come da main leada guy.
Den David start fo live inside da strong wall Jebus side. Az why now dey call dat part, David Town. He build up da town aroun da strong wall, from da level place dey fill in, fo nobody attack Jerusalem an eryting aroun dea. An Joab build da odda part a da town one mo time. David get mo an mo powa, cuz Da One In Charge, da God Ova All Da Armies, stay wit him.
David Strong Guys
(2 Samuel 23:8-39)
10 Dese da leada guys fo David bestes army guys. Dem an all da Israel peopo stay strong fo make shua David stay da king fo da whole country, jalike Da One In Charge wen promise. 11 Dis da lis fo David bestes army guys:
Jashobeam Hakmoni boy stay da main guy fo all da officer guys. One time he wen use his spear agains three hundred guys, an kill dem all one time.
12 Nex was Eleazar, Dodai boy. Dodai come from Ahoh. Eleazar one a da Big Three army guys. 13 He wen stay wit David Pas-Dammim side wen da Filisha guys come togedda ova dea fo fight da Israel peopo, one place inside one field wea get plenny barley. Da Israel guys run away from da Filisha guys. 14 But Eleazar an David, dey stan up agains da Filisha guys inside da middo a da field. Dey stay fight fo keep dat part, an wack da Filisha guys, an Da One In Charge make da Israel guys win big time.
15 Anodda time, da Big Three army guys from da thirty leada guys go down wea David stay, wea get one cliff nea da Adullam cave. Az da same time da Filisha guys make camp inside da Refaim Valley. 16 Dat time, David stay inside da strong place he get ova dea, an same time, had Filisha army guys stay Betlehem side. 17 David come real desperate fo drink da watta from da watta storage place nea da Betlehem town gate, an tell, “Good if somebody bring me some watta from ova dea!” 18 So da Big Three army guys fight thru wea da Filisha guys make camp, get watta from da watta storage place nea da Betlehem town gate, an bring um back by David. But he tell he no goin drink um, an he pour um out fo make one drink kine sacrifice fo Da One In Charge. 19 He tell, “No way my God let me drink dis! Cuz dese guys almos get kill fo bring me dis watta. If I wen drink um, jalike I drink dea blood!” Az why David tell he no goin drink um, cuz da guys dat bring um almos mahke.
Az da kine stuff da bestes army guys do.
20 Abishai, Joab braddah, he da main leada fo da Big Three army guys. One time he use his spear agains three hundred guys, an kill all dem. So erybody know bout him, jalike dey know bout da Big Three army guys. 21 He get plenny mo respeck den da Big Three army guys, an come dea leada, no matta he not one a dem.
22 Had Benaiah too, Jehoiada boy, one guy dat fight good an no sked. He from Kabzeel, an he do big stuff. He kill two boys from Moab, Ariel dea faddah. Anodda time he go down inside one big hole one day wen get snow, an kill one lion. 23 An he da one wen kill one big Egypt guy dat stay seven an a half feet tall. No matta da Egypt guy get one spear inside his hand, da wood part big, jalike da kine beam dat da peopo dat weave cloth use fo move da strings, Benaiah wen go agains him wit one stick. He grab da spear from da Egypt guy hand, an kill da Egypt guy wit dat spear. 24 Az da kine stuff Benaiah, Jehoiada boy do. So erybody know bout him too, jalike da Big Three army guys. 25 Erybody get mo respeck fo him den fo da thirty main army guys, but he not one a da Big Three army guys. David make him da leada guy fo all da guys dat guard David.
26 Dese da bestes army guys:
Asahel, Joab braddah,
Elhanan, Dodo boy from Betlehem town,
27 Shammot from da Haror blood line,
Helez from da Pelon blood line,
28 Ira Ikkesh boy from Tekoa town,
Abiezer from Anatot town,
29 Sibbekai from da Hushah blood line,
Ilai from da Ahoh blood line,
30 Maharai from Netofat town,
Heled, Baanah boy from Netofat,
31 Itai, Ribai boy from Gibeah town inside Benjamin,
Benaiah from Piraton town,
32 Hurai from da Gaash gulches,
Abiel from da Arbah blood line,
33 Azmavet from Baharum town,
Eliahba from Shaalbon town,
34 Hashem boys from da Gizon blood line,
Jonathan, Shagee boy from Harar,
35 Ahiam, Sacar boy from da Harar blood line,
Elifal, Ur boy,
36 Hefer from da Mekerat blood line,
Ahijah from Pelon town,
37 Hezro from Carmel town,
Naarai, Ezbai boy,
38 Joel, Nathan younga braddah,
Mibhar, Hagri boy,
39 Zelek from da Ammon peopo,
Naharai from Berot town, da guy dat carry da body armor fo Joab, Zeruiah boy,
40 Ira an Gareb from Itr,
41 Uriah from da Het peopo,
Zabad, Ahlai boy,
42 Adina, Shiza boy, from da Reuben ohana. Shiza was one leada guy fo da Reuben ohana, an get thirty guys wit him,
43 Hanan, Maakah boy,
Joshafat from Mitna town,
44 Uzziah from Ashterat town,
Shama an Jeiel, Hotam boys from Aroer town,
45 Jediael, Shimri boy,
His younga braddah Joha from Tiz town,
46 Eliel from Mahav town,
Jeribai an Joshaviah, Elnaam boys,
Itmah from Moab,
47 Eliel, Obed, an Jaasiel from Moab.
11:4 11:4: Josh 15:63; Local 1:21