11
Two Guys Tell Wat Dey Know
1 Den, jalike one dream, somebody give me one bamboo, jalike one stick fo measure. An dey tell me, “Go. Measure God temple an da altar, an count how plenny peopo get dea dat show God love an respeck.
2 But no go measure da open lanai outside da temple, cuz God let da ones dat not his peopo take ova. Dey goin walk all ova Jerusalem, da town dat stay spesho fo God, fo three an a half year. (Dass 42 month, o 1,260 days, you know.)
3 “Goin get two guys. I goin give dem da powa fo talk fo me fo all dat time. Dey goin put on burmbag kine clotheses fo show dat dey stay cry inside.”
4 Dese two guys, dey da two olive trees an da two stans fo lamp dat Zekariah wen tell bout inside da Bible. Dese guys, dey stay stan in front God, Da One In Charge a da earth.
5 If somebody like hurt dem, fire come outa da guys mout an burn dem up. Dass how da guys goin wipe out whoevas go agains dem.
6 Dose guys get da powa fo shut up da sky fo da rain no come. Dey goin stay tell wat God tell. Dey get da powa fo make da watta change fo come blood. An dey get da powa fo make all kine trouble come on top da peopo all ova da world too, weneva dey like.
7 Den, wen dey pau tell wat God tell, da Wild Animal dat come up outa da Deep Dark Hole, he goin fight dose two guys. Da Wild Animal goin win, an kill um.
8 An dea bodies goin stay on top da street inside da Big Town, da one you can tell stay jalike Sodom town o jalike Egypt. Dat Big Town, dass wea dey wen put Da One In Charge, Jesus, on top da cross fo mahke.
9 Fo three an a half days goin get peopo from all da countries, ohanas, diffren language, an diffren kine peopos from all ova da world ova dea. Dey goin look at da guys bodies, an dey no goin let nobody bury um.
10 All da peopo all ova da world goin feel good inside cuz dose two guys mahke. All da peopo goin party, an sen plenny present to each odda. Cuz dose two guys dat talk fo God wen make all da peopo suffa plenny.
11 But you know wat? Afta three an a half days, God make dose two guys breave one mo time, an dey stan up. Erybody dat see um come real sked.
12 Den da two guys dat wen talk fo God hear one loud voice from da sky dat tell um, “Go come up hea!” An wen da guys dat stay agains dem look, dey see um go up to da sky inside one cloud.
Da Numba Two Big Trouble
13 Right den an dea da earth start fo shake real hard. An ten percent a da Big Town come wipe out, an seven tousan peopo mahke. Da res a da peopo was real sked, an dey tell dat God dat stay inside da sky, he awesome.
14 Dat was da numba two big kine trouble. Horraz! Pretty soon goin get da numba three big kine trouble!
Da Numba Seven Trumpet
15 Den da numba seven angel guy blow his trumpet. Had real loud voices come from da sky. Dey tell,
“Now da time!
God an his Spesho Guy Christ get da powa
Fo take ova an be King ova all da peopos inside da world.
Dey goin lead da peopo foeva an eva!”
16 Den da twenny-four older leadas dat stay sit on top dea thrones in front God, dey go down an put dea face on top da groun, an show God love an respeck.
17 Dey tell,
“Eh, God! Mahalo plenny!
You Da One In Charge, Da God Dat Get All Da Powa!
You stay now,
An wen stay befo time!
Now you stay show all yoa powa,
An you start fo take charge a all da peopo inside da world!
18 Da peopos dat no trus you,
Dey real huhu,
But you tell ‘Laytas’ to da bad kine stuff dey do.
“Time awready fo you
Fo come da Judge fo da mahke peopo.
An fo give yoa worka guys da good kine stuff you get fo dem
Fo wat dey do fo you.
Same ting you goin give to all da guys dat talk fo you,
An all yoa spesho peopo,
An you goin give um to da ones dat get respeck fo how you stay,
Da big peopo an da litto peopo.
“Time awready fo wipe out da guys
Dat wipe out all da odda peopo
Dat stay on top da earth!”
19 Den God temple inside da sky come open fo see da Box Fo No Foget Da Deal dat get da Ten Main Rules inside. Den had lightning, an noise, an loud thunda. Da earth shake, an get big hail come down.